MARKUS 2

Yesu laɓ dǝɓ syem kokurri

(Mt 9:1-8; Lu 5:17-26)

1Ka zah'nan joŋ fahfal ah nje ɓe, Yesu pii soo ge Kapernaum, laara a no yaŋ. 2Za pǝlli taira ɓo gŋ ŋhaa dǝɓ ka lwaa cok kan ɓal zahfah ya. Yesu cuu ɓǝ nyi ra gŋ. 3Za ki gera wo Yesu ne dǝɓ syem mai mo kokur ɓo, amma za nai ye ɓaŋra ko ɓo. Lwaara fahlii ga wol ah ya, mor za gŋ pǝpãare. 4Mor maiko so mgbaira tǝtǝl yaŋ ɓyaŋ ne cok mai Yesu mo no gŋ. Mo mgbaira vǝr o, so ɗǝrra dǝɓ syem ne faswul ah daŋ ge pel ahe. 5Yesu kwo iŋ ɓǝǝra, so faa nyi dǝɓ syemme: Bai ɓe, faɓe' ɓo daŋ rwah ge lal ɓe. 6Ka za cuu ɓǝ lai kaara ɓo no gŋ, foora pǝ zahzyil ɓǝǝra: 7Dǝɓ ma faa ɓǝ naiko ɗǝne? Tǝ tǝǝ Masǝŋ. Azu ye gak rwah faɓe' ga lal ne? Sai Masǝŋ vaŋno to. 8Ne pel sǝ Yesu tǝ ɓǝ makẽne mo tǝ foora pǝ zahzyil ɓǝǝ daŋ, faa nyi ra: We foo ɓǝ nai pǝ zahzyil ɓii mor fẽene? 9A fẽe pǝgaɓ kal ki ne? Mai me faa faɓe' ɓo rwah ge lal ɓe ye ne? Wala mai me faa mo ur mo syee ye ne? 10Amma me 'yah ka we tǝ njaŋ: We Dǝfuu no ne swah tǝ sǝr ka rwah faɓe' dǝɓɓi. So Yesu faa nyi syemme: 11Me faa nyi mo, mo ur o, mo ɓaŋ faswul ɓo mo ge yaŋ ɓo ne ko. 12Ur ne pel sǝ, ɓaŋ faswul ah pǝ̃ǝ ge lal ne nǝn za daŋ. So mo kwora nai kaara gǝriŋ, yiira Masǝŋ faa: Fan ma morãiko na kwo taa ya.

Yesu ɗii Lewi

(Mt 9:9-13; Lu 5:27-32)

13Yesu so kal ge zahbii Galile faɗa. Za daŋ taira ge wol ah gŋ, so cuu ɓǝ nyi ra. 14Ne cok Yesu mo tǝ syee ganne, kwo Lewi we Alfeus kaa ɓo yaŋ sǝǝ fanne. Yesu faa nyi ko: Mo ge syee mor ɓe. Lewi ur ge syee mor ahe.

15So Yesu kaa ɓo yaŋ Lewi tǝ ren farelle, za sǝǝ fan tǝkine za faɓe' pǝlli kaara ɓo gŋ tǝ renra farel ne Yesu tǝkine za syee mor ahe, mor za gŋ pǝpãare a syeera mor ahe. 16Za cuu ɓǝ lai tǝkine Farisien mo kwora Yesu tǝ ren farel ne za sǝǝ fan tǝkine za maɓea, faara nyi za syee mor ahe: Mor fẽe Yesu re fan ne za sǝǝ fan tǝkine za maɓea ne? 17Yesu laa ɓǝ ah so faa nyi ra: Za ma ne suu tǝhǝraŋ ye ka 'yahra syiŋr a, amma za ma ne syem yee 'yahni. Mor me ge ɓo ka tǝ ɗii za matǝ njaŋ ya, amma me ge ka ɗii za faɓe' ka mo toora bii.

Fii tǝ ɓǝ syẽe fanne

(Mt 9:14-17; Lu 5:33-39)

18Za syee mor Yohana ne za syee mor Farisien daŋ a syẽera fanne. Za ki ge fiira Yesu: Mor fẽe za syee mor Yohana ne za syee mor Farisien daŋ a syẽera fanne, amma za syee mor ɓo ka syẽera ya ne? 19Yesu faa nyi ra: Za mai mo ɗiira ra ge cok ɓaŋ win fuu a gak syẽera fan ne cok pa ɓaŋ win mo no tǝgǝǝ ɓǝǝ ne? Pa ɓaŋ win mo no tǝgǝǝ ɓǝǝ ɓe, ka syẽera fan a. 20Zah'nan ah no ginni, dǝɓ ma ɓaŋ win ga pǝ̃ǝ gin kǝsyil ɓǝǝra, a ga syẽera fan ne cok ahe.

21Dǝɓ ka ɓaŋ zyim fuu dahɓ mbǝro matãa ne ya. Mo joŋ nai ɓe, zyim fuu a ŋgǝ̃ǝ matãa, zah ŋgǝ̃ǝ ah so ŋgǝ̃ǝ ga pelle. 22So dǝɓ ka rǝk bii lee kpuu vin mafuu pǝ dah bii matãa ya. Mor mo rǝk gŋ ɓe, dah bii ah a ŋgǝ̃ǝre, bii lee kpuu vin ah zuu ga lalle, so dah ah a ɓeɓɓe. Amma a rǝkra bii lee kpuu vin mafuu pǝ dah mafuu ta.

Za syee mor Yesu hahra sor ne com 'yakke

(Mt 12:1-8; Lu 6:1-5)

23Comki Yesu ne za syee mor ah mo tǝ pǝ̃ǝra kǝsyil 'wah ne com 'yakke, za syee mor ah tǝŋ hahra sor vaŋno vaŋno kah fahlii. 24Farisien faara nyi ko: Mo ẽe ɗǝ, za syee mor ɓo a joŋra fan mai ɓǝ lai man mo nyi fahlii joŋ ah ne com 'yak ya. 25Yesu faa nyi ra: We kee ɓǝ fan mai David ne zan ah mo joŋra ne cok koŋ mo i ra ya ne? 26Dan ge pǝ yaŋ Masǝŋ ne zah'nan Abiatar mo tǝ joŋ yeɓ pa joŋzahsyiŋ malii, ɓaŋ farel ma nyi mor Masǝŋ re, so nyi zan ah re ta. Farel ah za ki ka ne fahlii ka ren a, sai za joŋzahsyiŋ to. 27So faa nyi ra: Com 'yak joŋ mor dǝfuu, dǝfuu joŋ mor com 'yak ya. 28Mor maiko We Dǝfuu Dǝɓlii com 'yak ye ta.

Currently Selected:

MARKUS 2: MUAR

Highlight

Copy