MATEUS 28

Yesu ur pǝ wulli

(Mk 16:1-10; Lu 24:1-12; Yoh 20:1-10)

1Ne cok zah'nan com 'yak Yahuduen mo pǝ̃ǝ kal o, ne damasyi ah ne zah'nan pim, Maria ma Magdala ne Maria maki ah kalra ge zah pal mor ka ẽere. 2Ne pel nai sǝ, sǝr kal tǝ coo gǝrgǝr, angelos ɗǝr gin sǝŋ ge sǝŋ, fiŋ tǝsal coo zah pal ge lal so yee kaa tǝl ahe. 3Suu ah daŋ a sãh tǝgbana bamme, mbǝro ah pǝfãi tǝgbana lok mbǝro. 4Gal re sooje ma byak cokki, suu coora kpakkpak ŋhaa gera tǝgbana wulli.

5Angelos faa nyi ŋwǝǝre: Ma ɓii we ɗuu gal ka. Me tǝ ɓe, we tǝ kyeɓ Yesu mai mo ɓaara ge wo kpuu. 6Ka nyee yao, ur gin pǝ wul tǝgbana mo faako ɓe. We ge ẽe cok ah mai mo yea swǝ ɓo gŋ o. 7We hǝǝ gwari we ge faa nyi za syee mor ah sye, ur gin pǝ wul ɓe, kal ga pel ɓii sǝr Galile zǝzǝ̃ǝko, we ga kwo ko gŋ, we foo ɓǝ faa ɓe. 8Urra gin zah pal ne hǝǝre, gal re ra pǝlli, so laara pǝ'nyah pǝlli ta, ɗuura kal ge kee ɓǝ ah nyi za syee mor ahe.

9So gwari sǝ Yesu ge zyaŋ ne ra, faa nyi ra: Jam mo yea tǝ ɓiiri. So gera wol ah gwari, gbahra ɓal ah juura pel wol ahe. 10So Yesu faa nyi ra: We ɗuu gal ka. We ge faa nyi wee pa ɓe mo gera sǝr Galile, a ga kwora me gŋ.

Nyira lak nyi sooje

11Ne cok ŋwǝǝ mo ɓaŋra fahlii ɓo tǝ ganne, za ki kǝsyil sooje ma byak pal ah gera tǝgǝǝ yaŋ, ge keera ɓǝ fan mai mo joŋ daŋ nyi zaluu za joŋzahsyiŋrĩ. 12Zaluu za joŋzahsyiŋ taira ne zaluu ma pel zana. Ne cok mo zyeɓra ɓǝ vǝrri, so nyira lak nyi sooje pǝ'manne, 13faara nyi ra: Ka we faa za syee mor ah ge lal ɓaŋra wul ah ne nyin ne suŋ ka we nwãh nǝm ɓo. 14Koo ka govener mo laa ɓǝ ah laŋ ru ga faa ɓǝ 'nyah ne ki, we ka lwaa ɓǝ ki tǝ ɓǝ ah ya. 15Sooje nyiŋra lak ahe, so joŋra tǝgbana mai mo faara nyi ra. Ɓǝ ah myah ɓo kǝsyil Yahuduen nai ŋhaa tǝ'nahko.

Yesu cuu suu ah nyi za syee mor ahe

(Mk 16:14-18; Lu 24:36-49; Yoh 20:19-23; Yeɓ 1:6-8)

16Za syee mor ah matǝ jemma tǝ vaŋno kalra ge sǝr Galile, gera tǝwaa mai Yesu mo cuu nyi ra. 17Ne cok mo ge kwora ko, juura pel wol ahe. Amma za ki nyiŋra ya. 18Yesu tǝɓ ge wo ɓǝǝ gwari faa nyi ra: Swah coksǝŋ tǝkine sǝr daŋ a jol ɓe. 19Mor ah we ge wo za sǝr daŋ, we joŋ ra ciŋ za syee mor ɓe, ka we joŋ baptisma nyi ra pǝ tǝɗii Pamme, Welle, ne Tǝ'yak Matǝdaŋdaŋ. 20We cuu nyi ra ka mo syeera mor ɓǝ mai me faa nyi we daŋ. We tǝ, me ga yea ne we zah'nan daŋ ŋhaa sǝr vǝr ne sõo.

Currently Selected:

MATEUS 28: MUAR

Highlight

Copy