MATEUS 27

Yesu pel Pilatus

(Mk 15:1; Lu 23:1-2; Yoh 18:28-32)

1Ne cok zah'nan mo ceeni, zaluu za joŋzahsyiŋ ne zaluu Yahuduen daŋ taira ka faa ɓǝ tǝ Yesu mor ka in ko pǝ wulli. 2Baŋra Yesu, so zaŋra ge nyi govener Pilatus ne ko.

Wul Yudas

(Yeɓ 1:18-19)

3Yudas mai mo joŋ tǝkor Yesu mo kwo ŋgoŋra kiita wul tǝl ah naiko, ɗii marvǝǝ, so woo solai jemma sai ah ge wo zaluu za joŋzahsyiŋ ne tǝkine zaluu pel zana, 4faa nyi ra: Me joŋ faɓe' ɓe, mor me joŋ tǝkor dǝɓ matǝ goŋga ŋhaa wuu. So zyiira faa nyi ko: Saaŋ ru ɗǝne? Ɓǝ ah ɓǝ ɓo yo. 5So Yudas myah solai ah ɓǝr yaŋ Masǝŋ pǝ̃ǝ kalle, ge swǝ̃ǝ suu ah tǝ kpuu.

6Zaluu za joŋzahsyiŋ woora solai ah so faara: Ɓǝ lai man nyi fahlii ka na rǝk solai mai ge pǝ kes yaŋ Masǝŋ ya, mor lak fan syim yo. 7Ne cok mo faara ɓǝ tǝl ahe, so ɓaŋra lak ah lee 'wah jol pa vuu fan ne mor ka cii za gwǝǝ gŋ. 8Mor ah a ɗiira 'wah ah ne 'Wah Syim ŋhaa tǝ'nahko.

9Ɓǝ mai profeto Jeremias mo faa joŋ ge cok ah ɓe, faa: Woora solai jemma sai ahe, lak mai za Israel mo cuura ɓo ka lee ko ne yo. 10So ɓaŋra lak ah ka lee 'wah jol pa vuu fan ne tǝgbana Dǝɓlii mo faa nyi me.

Pilatus fifii zah Yesu

(Mk 15:2-5; Lu 23:3-5; Yoh 18:33-38)

11Yesu ge uu pel govener, so govener fii ko: Amo ye goŋ Yahuduen ne? Yesu zyii faa: Amo ye faa. 12So ne cok zaluu za joŋzahsyiŋ tǝkine zaluu ma pel za mo tǝ cenra ko, zyii ɓǝ ki ya. 13Pilatus so faa nyi ko: Mo laa mo tǝ cenra mo tǝ ɓǝ camcam ya ne? 14Amma Yesu zyii ɓǝ ki zah ah vaŋno ya, so ŋhaa govener kaa tǝ ɓǝ ah gǝriŋ.

Ŋgoŋra kiita wul tǝ Yesu

(Mk 15:6-15; Lu 23:13-25; Yoh 18:39–19:16)

15Ne fĩi Paska daŋ, govener a wǝǝ dǝɓ daŋgai mai za mo 'yahra nyi ra vaŋno. 16Ne cok ah dǝɓ ki no pǝ daŋgai za daŋ tǝra ko ɓo, a ɗii ne Yesu Barabas. 17Pilatus fii za mo taira ɓo faa: We 'yah me wǝǝ zu ɓoo nyi we ne? Me wǝǝ Yesu Barabas ne? Wala me wǝǝ Yesu ma ɗii ne Kristu ne? 18Mor Pilatus tǝ ɓe, soɓra Yesu ɓo jol ah mor ɓǝ tǝwonni.

19Ne cok Pilatus mo ge kaa tǝ fakal ŋgoŋ kiita, mawin ah pepee ge nyi faa: Mo joŋ fan ki wo dǝɓ matǝ njaŋ mai ka, mor ne suŋ tǝ'nahko lom gaɓ me ɓo tǝ ɓǝ ah pǝlli.

20Amma zaluu za joŋzahsyiŋ tǝkine zaluu pel za kǝǝra zah za ka mo fiira Pilatus mo wǝǝko Barabas ɓoo, mo ira Yesu pǝ wulli. 21So govener fii ra: We 'yah me wǝǝ zu kǝsyil za matǝ gwa rai ɓoo ne? Zyiira faa nyi: Ru 'yah mo wǝǝ Barabas ɓoo. 22Pilatus so fii ra: We 'yah me joŋ fẽe ne Yesu ma ɗii ne Kristu ne? Zyiira ɓǝ zahki daŋ faara: Ɓaa ko ge wo kpuu. 23Pilatus so fii ra faɗa: Joŋ faɓe' fẽe ɓo ne? Amma ŋwaara ɓǝ pǝ'man faara: Ɓaa ko ge wo kpuu. 24Ne cok Pilatus mo kwo zye ka tǝ yah gak joŋ fan ki ya, so ɓǝ gaŋ ah a ga pelle, ge ɓaŋ bii vãh jol ah ne pel za daŋ faa: Ka ɓǝ wul dǝɓ mai ka tǝtǝl ɓe ya, ɓǝ ɓiir o. 25Za daŋ zyiira faa: Mo soɓ ɓǝ wul ah mo ge tǝ ɓuu tǝkine wee ɓuuru. 26So Pilatus wǝǝ Barabas nyi ra, so ɓaŋ Yesu loɓ ne bǝrǝǝ, soɓ ko nyi gee za jol ka mo ge ɓaara wo kpuu.

Sooje syẽara Yesu

(Mk 15:16-20; Yoh 19:2-3)

27Sooje Pilatus zaŋra Yesu ge zahpiicel govener ne ko, kul sooje ryaŋra ko ɓoo cyõ. 28Wǝǝra fan wol ah ge lalle, so ɓoora mbǝro syẽ nyi. 29So kaŋra mbǝlaori ne waa maa ge nyi tǝtǝlli, so nyira kǝndaŋ keeŋgai ge nyi jokǝsãhe. A keara ga sǝŋ pel ah ne zahciŋɓalle, syẽara ko ne a faara: Masǝŋ mo soɓ tǝ goŋ Yahuduen! 30A tǝɓra tǝsǝ̃ǝ ga wol ahe, a ɓaŋra kǝndaŋ keeŋgai in tǝtǝl nyi ne ko. 31Ne cok mo joŋra fan mai daŋ wol ah vǝrri, wǝǝra mbǝro syẽ gin wol ah so ɓaara fan mǝ ah nyi ko, so zaŋra kal ne ka ga ɓaa ga wo kpuu.

Ɓaara Yesu ge wo kpuu

(Mk 15:21-32; Lu 23:26-43; Yoh 19:17-27)

32Ne cok mo tǝ pǝ̃ǝra, ge zyaŋra ne dǝɓ yaŋ Kirene no a ɗii ne Simon, joŋra ko ne doole ka mo ɓaŋko kpuu ɓaa Yesu. 33Ge daira pǝ cok ma ɗii ne Golgata, tǝgba faa: Cok Gbel Tǝtǝlli. 34Nyira bii lee kpuu vin ma suuki ne cen nyi ka mo zwǝko. Amma ne cok Yesu mo laa ge zahe, zyii zwan a.

35So ge ɓaara ko ge wo kpuu, womra mbǝro ah kǝsyil ki ira cahcah tǝl ah ka tan dǝɓ mai moo lwaa re ne ko. 36So kaara byak ko. 37Ŋwǝǝra ɓǝ cen ah rao tǝtǝl ah sǝŋ faara gŋ: Dǝɓ mai Yesu goŋ Yahuduen yo. 38So ɓaara za kaafuu gwa ge wo kpuu kah Yesu, vaŋno jokǝsãh ahe, maki ah jokǝlǝɓai ahe.

39Za mai moo gin pǝ̃ǝra cok ah a haara tǝtǝl ne syak ko, 40a faara nyi ko: Amo pa 'yah dah yaŋ Masǝŋ ga sǝŋ ka so vuu mafuu ah tǝgǝǝ zah'nan sai vǝrri, ko mo ǝ̃ǝ suu ɓo o ya ne? Mo We Masǝŋ ɓe, mo ɗǝr gin tǝ kpuu ge sǝŋ o. 41Zaluu za joŋzahsyiŋ ne za cuu ɓǝ lai tǝkine zaluu pel za syakra ko nai ta, faara: 42A ǝ̃ǝ za ki, amma ka gak ǝ̃ǝ suu ah ya, ako ye mo goŋ Israel ɓe, mo ɗǝrko gin tǝ kpuu ge sǝŋ zǝzǝ̃ǝko, ka na ga nyiŋ ko. 43Soɓ suu ah ɓo wo Masǝŋ, faa azye We Masǝŋ. Na ẽe ɗao, ɗah Masǝŋ gin ǝ̃ǝ ko zǝzǝ̃ǝ no ne? 44Za kaafuu mai mo ɓaara ra ɓo tǝ kpuu kah ah tǝǝra ko nai ta.

Wul Yesu

(Mk 15:33-41; Lu 23:44-49; Yoh 19:28-30)

45Ne com kǝsyitǝtǝl, cokfuu ge tǝ sǝr ah daŋ ŋhaa dai cok com sai ma ne lilli. 46Ne cok com sai ah Yesu ɓyaŋ ɓǝ ne kyaŋ pǝ'man faa: Eli, Eli, lama sabaktani, tǝgba faa: Masǝŋ ɓe, Masǝŋ ɓe, mo soɓ me mor fẽene? 47Za ki kǝsyil za mai mo uura ɓo gŋ mo laara ɓǝ ah naiko, faara: A ɗii Elias profeto Masǝŋ. 48Dǝɓ ki kǝsyil ɓǝǝ ɗuu kal ge ɓaŋ tãa yeri maa ge pǝ bii mbǝ̃ǝre, so baŋ ge tǝ keeŋgai nyen ge nyi Yesu ka mo zwǝko. 49Amma za ki faara: Na byak ɗao, na ẽe ɗah Elias gin ǝ̃ǝ ko ne? 50Yesu so ɓyaŋ ɓǝ ne kyaŋ pǝ'manne, lee wulli.

51Ne cok ah godel ma cee ɓǝr yaŋ Masǝŋ ŋgǝ̃ǝ gin sǝŋ ge sǝŋ kǝsyil gwa. Sǝr coo gǝrgǝr, pǝɗakka ra dah kǝsyil gwa gwa. 52Zah pal daŋ gbǝrri, za syee mor Masǝŋ pǝlli mo yea wukra ɓo uura ne cee. 53Pǝ̃ǝra gin pǝ pal fahfal Yesu mo ur gin pǝ wulli, danra ge yaŋ matǝdaŋdaŋ, za pǝlli ge kwora ra gŋ.

54Ne cok dǝɓ swah sooje Romanen tǝkine sooje mapãa ah mo tǝ byakra Yesu ne ki mo kwora sǝr coo tǝkine fan camcam mo joŋ daŋ, gal re ra pǝlli, so faara: 'Manna, dǝɓ mai We Masǝŋ yo. 55Ŋwǝǝ no gŋ pǝpãare, uura ɓo lal pǝɗǝk tǝ ẽera cok ginni, yea tǝ syeera mor Yesu ne cok mo yea sǝr Galile, joŋra yeɓ mor ah ta. 56Kǝsyil ŋwǝǝ ah Maria ma Magdala gŋ, ne Maria mah Yakuɓ ne Yuseɓ, tǝkine mah wee Zebedeus.

Kanra Yesu ge pǝ palle

(Mk 15:42-47; Lu 23:50-56; Yoh 19:38-42)

57Ne cok ah lil mo joŋ o, pa joŋ no yaŋ Arimatea ge daini, a ɗii dǝɓ ah ne Yuseɓ, dǝɓ syee mor Yesu ye ko ta. 58Zol kal ge wo Pilatus fii wul Yesu jol ahe. So Pilatus faa mo soɓra wul ah nyi ko. 59Yuseɓ so ɓaŋ wul Yesu, koo ne zyim mafuu marwãh ahe. 60So ɓaŋ ko kan ge pǝ pal mǝ ah mai mo cii ɓo tǝ pǝɗakka na yii. So hǝr tǝsal malii ah ge coo zah pal ne ko, zol kalle. 61Maria ma Magdala ne Maria maki ah haira gŋ kah pal ah ta.

Za ma byakra palle

62Tǝ'nan ahe, tǝgba faa com 'yakke, zaluu za joŋzahsyiŋrĩ tǝkine Farisien kalra ge tai yaŋ Pilatus, 63faara: Dǝɓlii, ru foo ne cok pa ber mai mo yea ne cee faa: Fahfal zah'nan sai zye ga ur gin pǝ wulli. 9:22; 18:31-33 64Pǝram mo nyi fahlii ka mo byakra pal ah ŋhaa zah'nan sai ah mo kal ɗǝ, mor ka za syee mor ah mo lal ge ɓaŋra wul ah ne nyin ka mo so faara nyi za ŋ ur gin pǝ wul ɓe ka. Nai ɓe, ber ah ma fahfal a ga kal ma kǝpelle. 65Pilatus faa nyi ra: Sooje ko rai sye we gyo, we byak pal ah tǝgbana we gakke. 66So zolra kal ge zah palle, kanra lamba tǝ tǝsal ahe, so rǝkra sooje gŋ mor ka mo byakra.

Currently Selected:

MATEUS 27: MUAR

Highlight

Copy