MATEUS 17

Suu Yesu fer ne nahnǝn za syee mor ahe

(Mk 9:2-13; Lu 9:28-36)

1Fahfal ah zah'nan joŋ yea Yesu ɓaŋ Petar, Yakuɓ ne naa mah ah Yohana yee kal ge tǝ waa mawah ah ne ra, ge haira gŋ syak ɓǝǝra. 2Suu Yesu fer ne nahnǝn ɓǝǝra, zahpel ah sǝǝ tǝgbana comme, mbǝro ah sǝǝ pǝfãi kaŋkaŋ. 3Za syee mor ah matǝ sai kwora Mosus ne Elias tǝ faara ɓǝ ne Yesu. 4So Petar faa nyi Yesu: Dǝɓlii, a pǝsãh ka na yea nyeeko, mo zyii ɓe, me ga gbah jul sai, vaŋno mor ɓo, vaŋno mor Mosus, vaŋno mor Elias. 5Tǝ faa ɓǝ ah faa ba, swãh mafãi ah ge rii ra kǝrik. So kyaŋ cii gin pǝzyil swãh ge faa: We 'yah ɓe ye nyẽeko, me laa pǝ'nyah ne ɓǝ ah daŋ. We laa ɓǝ faa ahe. 6Ne cok za syee mor ah mo laara kyaŋ, gal re ra pǝlli, leara ge sǝŋ ɗǝmra zahpel ge tǝ sǝrri. 7Yesu syee ge wo ɓǝǝ ge juu ra faa: We ur sǝŋ o, we ɗuu gal ka. 8So woora nahnǝn ɓǝǝra, kwora dǝɓ ki yao, sai Yesu to.

9Ne cok mo tǝ ɗǝrra tǝ waa gin sǝŋ, Yesu lai ra faa: We faa ɓǝ fan mai we kwo nyi za ki ka, sai ka We Dǝfuu ur gin pǝ wul ɓe. 10So za syee mor Yesu fiira ko: Mor fẽe za cuu ɓǝ lai faa Elias ga ge kǝpel ɗao ne? 11Yesu zyii faa nyi ra: Ɓǝ ah naiko, Elias ga ge kǝpelle, ka zyeɓ fan daŋ. 12Amma me faa nyi we, Elias ge laŋ ɓe, za tǝra ko ya, joŋra fan mai zahzyil ɓǝǝ mo 'yah daŋ wol ahe. A ga cuura syak nyi We Dǝfuu laŋ nai ta. 13So za syee mor ah ge tǝra gur o, mǝ nai Yesu tǝ faa ɓǝ Yohana ma joŋ baptisma nyi ru.

Yesu laɓ we ma ne syem coksyiŋrĩ

(Mk 9:14-29; Lu 9:37-43a)

14Ne cok mo pii soora ge wo zana, dǝɓ ki ge wo Yesu ge kea ge sǝŋ pel ah faa: 15Dǝɓlii, mo kwo syak tǝ we ɓe sa, mor coksyiŋ cuu syak nyi ko pǝlli, a ɓaŋ ko ɓoo ga tǝ wii, wala pǝ bii. 16Me ge wo za syee mor ɓo ne ki, amma gak laɓra ko ya. 17Yesu zyii faa: Awe za ɓea ma bai iŋ marai, me ga kaa ne we ga dai kẽne? Me ga rõm kaa ne we ga dai kẽne? We gee me nyee ne wel ahe. 18Yesu lai coksyiŋ ne swahe, so coksyiŋ pǝ̃ǝ gin tǝ wel ahe, laɓ ne cok ah sǝ ta.

19Za syee mor Yesu gera wo Yesu syak ɓǝǝra, ge fiira ko: Ru gak nĩi coksyiŋ nyẽe ya mor fẽene? 20Yesu zyii faa nyi ra: Mor we ka ne iŋ pǝlli ya. Me tǝ faa nyi we ne goŋga, kǝnah we ne iŋ tǝgbana nah foo ɓe laŋ, koo we faa nyi waa mai, mo zol gin nyee ge ŋhaano, a zol ga gŋ ta. Fan mai we ka gak joŋ ya, ka yea ya. [21Amma coksyiŋ ma morãi dǝɓ ka gak nĩi ya, sai ne juupel tǝkine syẽe fan to.]

Yesu faa ɓǝ wul ah tǝkine ɓǝ ur ah faɗa

(Mk 9:30-32; Lu 9:43b-45)

22Comki ka Yesu ne za syee mor ah daŋ pǝ sǝr Galile, Yesu faa nyi ra: A ga soɓra We Dǝfuu ga jol zana. 23So a ga ira ko pǝ wulli, amma ne zah'nan sai ah a ga ur gin pǝ wulli. Za syee mor ah swaara ɓǝ pǝlli.

Yesu sǝǝ gǝraama yaŋ Masǝŋ

24Ne cok Yesu ne za syee mor ah mo ge daira yaŋ Kapernaum, za ma sǝǝra gǝraama yaŋ Masǝŋ gera wo Petar fiira ko: Pa cuu fan ɓii ka sǝǝ gǝraama yaŋ Masǝŋ ya ne? 25Petar zyii faa: A sǝǝni. Ne cok Petar mo dan ge ɓǝr yaŋ, Yesu hǝǝ fii ko ne ɓǝ kǝpel faa: Simon, mo lǝŋ ɗǝne? Za goŋ sǝr mai a fiira gǝraama tǝkine sǝǝ fan jol wee sǝr ne? Wala a fiira jol za gwǝǝ ne? 26Petar zyii faa: A fiira jol za gwǝǝre. Yesu faa nyi ko: Goŋga yo, wee sǝr ka sǝǝra ya. 27Amma ka na ɓeɓ zahzyil nyi ra ka, mo ge zahbii, ka mo ɓoo kǝṽǝl ge bii, syiŋ mai mo ga ɓaŋ kǝpel sye, ka mo gbǝr zah ahe, mo ga lwaa solai vaŋno gŋ, ka mo ɓaŋ mo ge sǝǝ gǝraama ne tǝ ɓe tǝkine mo gwa daŋ.

Currently Selected:

MATEUS 17: MUAR

Highlight

Copy