MATEUS 16

Farisien ne Sadusien fiira dǝǝbǝǝri

(Mk 8:11-13; Lu 12:54-56)

1Farisien ne Sadusien gera wo Yesu mor ka kyeɓra ɓǝ zah ahe, fiira ko ka mo joŋko dǝǝbǝǝri mai moo gak cuu swah ah ur gin wo Masǝŋ ge. 2Yesu zyii zah ɓǝǝ faa: Com mo dan ɓe, we faa cok ga yea tǝ'nan pǝsãhe, mor coksǝŋ syiŋ ɓo pǝsyẽ nyaknyakke. 3So ne zah'nan ɓe, we faa bam ga tǝ tǝ'nahko, mor coksǝŋ joŋ ɓo pǝsyẽ juu. We tǝ fahlii ka woŋ cok tǝlǝǝ sǝŋ pǝsãhe, amma we ka gak woŋ tǝgǝǝ fan ma cuu cok matǝ zǝzǝ̃ǝ ya mor fẽene? 4Za ma zah'nan tǝ'nah maɓe' ma bai ɗuu Masǝŋ rai a fiira dǝǝbǝǝri, amma dǝɓ ka joŋ dǝǝbǝǝri nyi ra ya, sai mǝ profeto Yunas to. So Yesu zol soɓ ra, kalle.

Ɓǝ mbǝ̃ǝ Farisien ne Sadusien

(Mk 8:14-21)

5Ne cok za syee mor ah mo yeera dah kal ge nǝzakǝŋhaa ne ko, yaŋra tǝtǝl ɓaŋra farel ge ne ya. 6So Yesu faa nyi ra: We joŋ yella, we byak suu ɓii wo ɓǝ mbǝ̃ǝ Farisien ne Sadusien. 7Za syee mor ah faara tǝgǝǝ ki: Yesu faa ɓǝ mai nai mor na ɓaŋ farel ge ne ya. 8Yesu laa ɓǝ mai mo tǝ faara ɓe, so fii ra: Awe za iŋ tǝ biŋ, mor fẽe we faa ɓǝ mai tǝgǝǝ ɓii, mor na ɓaŋ farel ge ne ya ne? 9We tǝ mor ɓǝ ah ya ŋhaa zǝzǝ̃ǝ ba ne? We foo ɓǝ zahtǝfah wol dappe me wom nyi za ujenere dappe ya ne? We so woo tǝcoŋ ah col kǝɗǝne? 10We foo ɓǝ zahtǝfah rǝŋ mai za ujenere nai mo re ya ne? We so woo tǝcoŋ ah col kǝɗǝne? 11Me ka tǝ faa ɓǝ wol nyi we ya, we tǝ ya mor fẽene? Me tǝ faa we joŋ yella, we byak suu ɓii wo ɓǝ mbǝ̃ǝ Farisien ne Sadusien.

12So za syee mor ah tǝra gur o, ka tǝ faa nyi ra mo byakra suu ɓǝǝ ne ɓǝ fan mbǝ̃ǝ ma joŋ farel a, amma tǝ faa nyi ra mo byakra suu ɓǝǝ wo ɓǝ cuu Farisien ne Sadusien.

Petar faa Yesu ye Kristu

(Mk 8:27-30; Lu 9:18-21)

13Yesu ur ka ga yaŋ ma pǝ sǝr Kaiseria-Filipi, so tǝŋ fii za syee mor ah faa: Za a faara tǝ We Dǝfuu sye zu ye ne? 14Zyiira zah ah faa: Za ki faara amo ye Yohana ma joŋ baptisma, za ki faara amo Elias, za ki laŋ a faara amo ye Jeremias, so za ki laŋ faara amo ye profeto maki ahe. 15So Yesu jin fii ra: Ma ɓii we faa ame ye zune? 16Simon Petar zyii faa: Amo ye Kristu We Masǝŋ ma ne cee. 17So Yesu faa nyi ko: Simon we Yohana, a pǝ'nyah wo ɓo mor kpak dǝfuu mai mo ne ko ye ka cuu goŋga mai ɓo nyi mo ya, amma Pa ɓe mai mo no sǝŋ ye cuu ɓo mo. 18Ame faa nyi mo, amo ye Petar, me ga vuu eklesia ɓe tǝ tǝsal ahe, wul ka ga yea ne swah tǝl ah ya. 19Me ga nyi lakǝle Goŋ Masǝŋ nyi mo, fan mai mo ga cak fahlii ah wo sǝrri, a ga cak coksǝŋ ta, fan mai mo ga nyi fahlii ah wo sǝrri, fahlii ah ga nyi coksǝŋ ta.

20So Yesu faa nyi za syee mor ah ka mo faara nyi za ki azye ye Kristu ka.

Yesu faa ɓǝ wul ah tǝkine ɓǝ ur ahe

(Mk 8:31-38; 9:1; Lu 9:22-27)

21Daga cok ahe, Yesu tǝŋ faa ɓǝ nyi za syee mor ah ra wat faa: Doole me ga yaŋ Jerusalem, me ga zwǝ bone gŋ jol zaluuri ne zaluu za joŋzahsyiŋrĩ tǝkine jol za cuu ɓǝ lai daŋ pǝlli. A ga ira me pǝ wulli, ne zah'nan sai ah me ga ur gin pǝ wulli. 22So Petar ɗii ko ge uu lal ne ko tǝŋ faa nyi ko: Mo faa nai ka Dǝɓlii, Masǝŋ mo cak ɓǝ ah ka fan ah mo joŋ ka. 23Amma Yesu jin nahnǝn so faa nyi Petar: Mo zol gin fahfal ɓe kalle Satan, mo tǝ kyeɓ ka zyak me, mor mo ka foo ɓǝ tǝ ɓǝ Masǝŋ ya, amma mo foo ɓǝ mǝ dǝfuu to.

24So Yesu faa nyi za syee mor ahe: Koo zune mo 'yah syee mor ɓe ɓe, mo fooko ɓǝ suu ah ka, sai mo ɓaŋko kpuu ɓaa suu ahe, ka mo ge syeeko mor ɓe. 25Mor koo zune mo 'yah ka ǝ̃ǝ suu ah ɓe, a ga muŋ, amma dǝɓ mo muŋko cee suu ah mor ɓe, a ga yea ne cee ma ga lii. 26Koo dǝɓ mo lwaa sǝr mai daŋ laŋ, amma mo muŋko cee ah ɓe, fan ah ga joŋ fẽe wol ah ne? Dǝɓ ah ga nyi fẽe zahwaa cee ah ne? 27Mor We Dǝfuu a ga ge ne yǝk Pah ah tǝkine angeloi ah ra, so a ga soo za vaŋno vaŋno daŋ tǝgbana yeɓ ɓǝǝ mo joŋra ɓo. 28Me faa nyi we goŋga, za ki kǝsyil za mai mo no nyee ka ga wukra bai mai mo kwora We Dǝfuu mo ga ge ne Goŋ ah ya.

Currently Selected:

MATEUS 16: MUAR

Highlight

Copy