2 ZA GOŊE 21

Manasse kaa goŋ Yuda

(2 KeeƁ 33:1-20)

1Ne cok Manasse mo kaa goŋ, ka joŋ syii ɓo jemma tǝtǝl gwa. Kaa goŋ yaŋ Jerusalem syii jemma dappe tǝtǝl dappe. A ɗii mah ah ne Heɓsiba. 2Joŋ fan maɓe' ah pel Dǝɓlii, tǝgbana yeɓ ma ren swãa ah mai za mai Dǝɓlii mo nĩi ra pel za Israel myah ge lal mo joŋra.#Jer 15:4 3So jin vuu cok joŋ syiŋ ma tǝgee sǝŋ ah ra mai pah ah Ezekias mo dah ge lalle. So vuu cok joŋ syiŋ wo Ba'al, zyeɓ foto Astarte tǝgbana Akaɓ goŋ Israel mo joŋni. A juupel wo fan ma coksǝŋ daŋ. 4Vuu cok joŋ syiŋ ɓǝr yaŋ Masǝŋ mai Dǝɓlii mo faa tǝl ahe: Me ga kan tǝɗii suu ɓe ne yaŋ Jerusalem.#2 Sa 7:13 5Vuu cok joŋ syiŋ wo fan ma coksǝŋ ɓǝr pedǝǝ matǝ gwa mai mo ɓǝr yaŋ Masǝŋ. 6Joŋ syiŋ suŋwii ne wel ah maworre. A ẽe ciŋ tǝkine joŋ fasaa, woo za ma faa ɓǝ ne wul rǝkki, tǝkine za kǝndaŋne. 7Ɓaŋ foto Astarte mai mo zyeɓko ge syii ɓǝr yaŋ Masǝŋ mai Dǝɓlii mo faa nyi David ne wel ah Salomo: Me ga kan tǝɗii suu ɓe ɓǝr yaŋ mai tǝkine yaŋ Jerusalem mai me nǝǝ ɓo kǝsyil za Israel daŋ ŋhaa ga lii.#1 ZaG 9:3-5; 2 KeeƁ 7:12-18 8Me ka fǝ̃ǝ soɓ ɓal za Israel pǝ̃ǝ gin pǝ sǝr mai me nyi nyi pa ɓǝǝ lii ka so ga kyãh cok ki yao. Amma sai mo joŋra fan tǝgbana mai me faa ɓo, tǝgbana ɓǝ lai mai dǝɓ yeɓ ɓe Mosus mo cuu ɓo nyi ra daŋ ɗǝ. 9Amma zyii laara ya, Manasse kǝǝ ra ka mo joŋra faɓe' kal za mai Dǝɓlii mo vǝr ra ge lal pel za Israel.

10So Dǝɓlii faa ɓǝ ne zah za yeɓ ah profetoen, faa: 11Mor Manasse goŋ Yuda mo joŋ fan ma ren swãa mai ɓo, joŋ faɓe' kal Amorien mai mo kǝpel ah daŋ, kǝǝ za Israel dan pǝ faɓe' ne joŋ masǝŋ ki ra, 12mor ahe, Dǝɓlii Masǝŋ Israel faa: Me ga pee bone gin tǝ yaŋ Jerusalem ne sǝr Yuda. Koo zune mo ge laa ɓǝ ah ɓe, a lǝr sok nyi ko. 13Me ga lii Jerusalem ne sal mai me lii Samaria ne ko, tǝkine vãm ma lii yaŋ Akaɓ. Me ga vãh Jerusalem tǝgbana dǝɓ moo vãh tahsah moo jǝŋ ga sǝŋ. 14Me ga ɓoo tǝcoŋ za ɓe mai ara ye mo faren ɓe ga lalle, me ga soɓ ra ga mor jol za syiŋ ɓǝǝra. A ga yea wo za syiŋ ɓǝǝ tǝgbana lak ma lwaa zah salle, ne fan mai dǝɓ moo nyiŋ ne swahe. 15Mor joŋra fan maɓe' ah wo ɓe, daga pa ɓǝǝ lii mo pǝ̃ǝra gin sǝr Egiɓ ŋhaa tǝ'nahko, a joŋra fan ka ɓeɓ zahzyil nyi me ne ko.

16Manasse ɗuu syim za ma bai ɓǝɓe' ɓo no cam, ŋhaa baa yaŋ Jerusalem ne daŋ. So ɓoo faɓe' ah ge pel ne fahlii mai mo kǝǝ za Yuda dan ge gŋ ne joŋ faɓe' wo Dǝɓlii.

17Tǝcoŋ ɓǝ Manasse ne yeɓ ah tǝkine faɓe' ah mo joŋ daŋ ŋwǝǝ ɓo pǝ ɗerewol Ɓǝ Za Goŋ Yuda. 18Manasse ge wuu, ciira ko pǝ 'wah Uzza mai mo kah yaŋ ahe. Wel ah Amon kaa goŋ pǝ cok ahe.

Amon kaa goŋ Yuda

(2 KeeƁ 33:21-25)

19Ne cok Amon mo kaa goŋ, ka joŋ syii ɓo jemma gwa tǝtǝl gwa. Kaa goŋ yaŋ Jerusalem syii gwa. A ɗii mah ah ne Mesulemet mǝlaŋ Harus ma Jotba yo. 20Joŋ fan maɓe' ah wo Dǝɓlii tǝgbana pah ah Manasse mo joŋni. 21Ɓaŋ tǝɓal pah ah tǝɗe'. Syee mor masǝŋ ki mai pah ah mo syee mor ahe, juupel wo ɓǝǝra. 22Soɓ Dǝɓlii Masǝŋ pamlii ra ɓoo, syee mor Dǝɓlii ya. 23Za yeɓ Amon urra ɓǝ ne ki, ge ira ko ɓǝr yaŋ ah pǝ wulli. 24Amma za sǝr ah ikra za ma ur ɓǝ ne goŋ Amon manyeeki ah ge lalle. Za sǝr ah so ɓaŋra wel ah Josias kan goŋ ne pǝ cok ahe.

25Tǝcoŋ ɓǝ Amon ne yeɓ ah daŋ ŋwǝǝ ɓo pǝ ɗerewol Ɓǝ Za Goŋ Yuda, 26ciira ko kah pam pǝ 'wah Uzza. Wel ah Josias kaa goŋ pǝ cok ahe.

Currently Selected:

2 ZA GOŊE 21: MUAR

Highlight

Copy