2 ZA GOŊE 12

Joas kaa goŋ Yuda

(2 KeeƁ 24:1-16)

1Ne cok Jehu mo kaa goŋ syii rǝŋ, Joas kaa goŋ sǝr Yuda. Ne cok ah Joas joŋ syii ɓo rǝŋ. Kaa goŋ yaŋ Jerusalem syii jemma nai. A ɗii mah ah ne Zibia, mǝlaŋ yaŋ ma ɗii ne Beerseba yo. 2Ne cok zah'nan pa joŋzahsyiŋ Jehojada mo no, a cuu fan nyi Joas daŋ, Joas a joŋ fan masãh ah pel Dǝɓlii. 3Amma za soɓra cok ma tǝgee ya, a ga joŋra syiŋ tǝkine tǝǝ ɓǝrdi pǝ cok ma tǝgee ah ra.

Joas zyeɓ yaŋ Masǝŋ

4Comki Joas faa nyi za joŋzahsyiŋrĩ: Lak mai mo nǝǝ kan ɓo, moo ginra ne mor yaŋ Dǝɓlii, ne mai mo kanra ɓo tǝ zune daŋ ka mo sooko, tǝkine mai koo zune moo gin nyi ne 'yah zahzyil ah mor yaŋ Dǝɓlii, 5ka za joŋzahsyiŋ mo nyiŋra lak ah jol za tan ɓǝǝ ka mo zyeɓra cok mai mo 'wǝǝ ɓo wala mai mo ɓeɓ ɓo yaŋ Dǝɓlii ne ko.#Pǝ̃ǝ 30:11-16

6Amma daga cok ah ŋhaa dai syii goŋ Joas jemma gwa tǝtǝl sai, za joŋzahsyiŋ zyeɓra cok mai mo ɓeɓ ɓo ɓǝr yaŋ Dǝɓlii ya. 7So goŋ Joas ɗii pa joŋzahsyiŋ Jehojada ne za joŋzahsyiŋ manyeeki ahe. Faa nyi ra: Mor fẽe we zyeɓ cok mai mo ɓeɓ ɓo ɓǝr yaŋ Dǝɓlii ya ne? Ga pel mai we ka nyiŋ lak jol za tan ɓii ra yao. Amma awe ye we nyi lak mor ka zyeɓ yaŋ ahe. 8Za joŋzahsyiŋ nyiŋra ɓǝ mai ka rǝ nyiŋ lak ah jol za ka, ka rǝ zyeɓ cok mai mo ɓeɓ ɓo yaŋ Dǝɓlii ka ta.

9So pa joŋzahsyiŋ Jehojada ɓaŋ sunduku, gee zah ah pǝ cok coo zah ah mo ɓaa ɓo, ɓaŋ kan kah cok joŋ syiŋ pǝ cok mai za moo dan ga yaŋ Dǝɓlii nǝjokǝsãhe. Za joŋzahsyiŋ mai moo byakra zahfah a rǝkra lak mai za moo ginra ne daŋ ga ɓǝr sunduku. 10Ne cok mo kwora lak ɓǝr sunduku pǝlli o ɓe, pa ŋwǝǝ fan goŋ ne pa joŋzahsyiŋ a gin woora lak mai mo ɓǝr yaŋ Dǝɓlii a keera.

11So a nyira lak mai mo keera ɓo nyi kapten mai moo joŋra yeɓ ɓǝr yaŋ Dǝɓlii, so a soora za ma zyeɓ kpuu ne za ma zyeɓ yaŋ tǝkine za ma zyeɓ tǝsal ne ko. 12So kapten a leara kpuu ne ta, a leara tǝsal ma zyeɓ ah ne ta, mor ka zyeɓ cok mai mo ɓeɓ ɓo ɓǝr yaŋ Dǝɓlii ne ko tǝkine fan yeɓ mai daŋ ara mo ne 'yah ahe.

13Amma joŋra tahsah ma ne vãm solai, ne nyahe, ne tǝkpelle, wala kokõorĩi, wala fan ma vãm kaŋnyeeri, ne ma vãm solai ah ɓǝr yaŋ Dǝɓlii ne lak mai moo nyira mor yaŋ Dǝɓlii ya. 14Amma a nyira lak ah nyi za mai moo joŋra yeɓ ka mo zyeɓra cok mai mo ɓeɓ ɓo ɓǝr yaŋ Dǝɓlii ne ko. 15Za mai moo nyiŋra lak ah ka soo za ma joŋra yeɓ ne ko, ka so keera joŋ yeɓ naino nyi zan ao, mor a joŋra yeɓ ah pǝsãhe.

16(Ka ɓaŋra lak joŋ syiŋ ma mor faɓe' ga yaŋ Dǝɓlii ne ya, mǝ za joŋzahsyiŋ yo.)#2 ZaG 22:7

Vǝr goŋ Joas

17Ne cok ah Hazayel goŋ sǝr Siria ge ruu sal ne za yaŋ Gat, so re yaŋ ahe. So Hazayel zyeɓ suu ka ga ruu sal ne yaŋ Jerusalem.#Lew 7:7 18Joas goŋ Yuda woo fan yeɓ mai pah ah ra Yusafat ne Yuram ne Akazia za goŋ Yuda mo nǝǝra rǝk ɓo, ne ma syak ah mai mo nǝǝ rǝk ɓo, ne vãm kaŋnyeeri mai mo no pǝ yaŋ rǝk fan pǝ yaŋ Masǝŋ tǝkine ma ɓǝr yaŋ goŋ daŋ pea kal ge nyi Hazayel goŋ sǝr Siria. So Hazayel soɓ yaŋ Jerusalem kalle.

19Tǝcoŋ ɓǝ Joas ne yeɓ ah mo joŋ daŋ ŋwǝǝ ɓo pǝ ɗerewol Ɓǝ Za Goŋ Yuda. 20Amma za yeɓ ah urra ɓǝ ne ki, ira ko yaŋ Millo, tǝ fahlii ka ga nǝfah kǝ Silla ge lalle. 21Josakar we Simiat ne Jezobat we Somer, ara ye i ko pǝ wulli. Ciira ko kah pah ah ra pǝ yaŋ David. Wel ah Amazia kaa goŋ pǝ cok ahe.

Currently Selected:

2 ZA GOŊE 12: MUAR

Highlight

Copy