2 ZA GOŊE 13
13
Joakas kaa goŋe
1Ne cok Joas we Akazia mo kaa goŋ Yuda syii jemma gwa tǝtǝl sai, Joakas we Jehu kaa goŋ Israel ne ko. Kaa goŋ yaŋ Samaria syii jemma tǝtǝl rǝŋ. 2Joŋ faɓe' wo Dǝɓlii pǝlli, a syee mor faɓe' mai Jeroboam we Nebat mo kǝǝ za Israel joŋ ɓaa kŋ, cak pǝ ɓǝ ah ge lal a. 3So Dǝɓlii ɓaŋ kpãh tǝ za Israel pǝ'manne, so soɓ ra ge mor jol Hazayel goŋ sǝr Siria, ne jol Benhadat we Hazayel, pǝ zah'nan goŋ ɓǝǝ mo kaara daŋ.
4Amma Joakas pǝǝ Dǝɓlii. So Dǝɓlii laa pǝǝ ahe, mor cuu syak mai za goŋ sǝr Siria mo tǝ cuura nyi za Israel. 5Dǝɓlii nyi pa ǝ̃ǝ nyi za Israel, so wǝǝ ra gin mor swah Sirien, za Israel so kaara yaŋ ɓǝǝ na matãa. 6Amma soɓra faɓe' mai Jeroboam mo kǝǝ za Israel dan gŋ ya. A joŋra faɓe' ah ga pelle. Koo foto Astarte laŋ, soɓ ɓo yaŋ Samaria 'wa.
7Za sal laŋ coŋ jol Joakas ya, sai coŋ za pǝr jemma dappe ne muŋta sal jemma tǝkine mǝǝna ujenere jemma to. Mor goŋ sǝr Siria vǝr ra ɓe, joŋ ra tǝgbana sǝr fahlii ɓal moo syee tǝl ahe.
8Tǝcoŋ ɓǝ Joakas ne yeɓ swah ah mo joŋ daŋ ŋwǝǝ ɓo pǝ ɗerewol Ɓǝ Za Goŋ Israel. 9Joakas ge wuu, ciira ko yaŋ Samaria. Wel ah Joas kaa goŋ pǝ cok ahe.
Joas ma kaa goŋ Israel
10Ne cok Joas mo kaa goŋ Yuda syii jemma sai tǝtǝl rǝŋ, Joas we Joakas kaa goŋ Israel ne ko. Kaa goŋ Israel yaŋ Samaria syii jemma tǝtǝl yea. 11Joŋ faɓe' wo Dǝɓlii pǝlli, soɓ faɓe' Jeroboam we Nebat mo kǝǝ za Israel joŋ ɓaa kŋ ya, a joŋ faɓe' ah ga pelle. 12Tǝcoŋ ɓǝ Joas, ne yeɓ maswah ah ne mai mo ruu sal ne Amazia goŋ Yuda ŋwǝǝ ɓo pǝ ɗerewol Ɓǝ Za Goŋ Israel. 13Joas ge wuu, ciira ko yaŋ Samaria kah za goŋ Israel manyeeki ah ra. Jeroboam kaa goŋ pǝ cok ahe.
Ɓǝ profeto Elisa ma fahfal tǝ lii tǝkine ɓǝ wul ahe
14Ne cok syem mo gbǝ Elisa, so mo tǝ yah ka wun ne syem ahe, Joas goŋ Israel ge wol ahe, ge yeyee pel Elisa faa: Daddǝ, Daddǝ, muŋta sal Israel ne za ma yee tǝl ahe!#2 ZaG 2:12 15Elisa faa nyi ko: Mo ge kyeɓ saŋ ne guu ge ne ko. So pepee ge kyeɓ saŋ ne guu. 16Elisa faa nyi goŋe: Mo woo saŋne. Goŋ so woo saŋne. Elisa so kan jol mǝ ah ge tǝ jol goŋe. 17So faa: Mo gbǝr zahtǝwoo yaŋ ma nefah kǝmorcomzah'nanne. Goŋ so ge gbǝrri. Elisa faa: Mo 'nǝǝ guu o. So 'nǝǝni. Elisa faa: Mai guu ma kaa kacella ɓo mo gee wo Dǝɓlii ge ɓo yo, guu ma ǝ̃ǝ mo pel Sirien yo. Mo ga ik Sirien Afek naiko, mo ga vǝr ra tǝɗe'. 18Elisa so faa nyi ko: Mo woo guu ɓo. So woo. Elisa so faa nyi goŋe: Mo i sǝrri. Goŋ i sǝr zahlǝŋ sai sǝ, so soɓɓe. 19So dǝɓ Masǝŋ ɓaŋ kpãh ne ki faa: Mor fẽe mo i sǝr zahlǝŋ dappe koo yea ya ne? Mo joŋ nai ɓe, mo ga ik Sirien vǝr tǝɗe' ta. Zǝzǝ̃ǝ mai mo ga ik ra zahlǝŋ sai to o.
20Elisa ge wuu, ciira ko. Cok zah bam mo ge dai ɓe daŋ, Moabien a gin ɗaŋra sǝr Israel. 21Dǝɓ ki wuu, so za tǝ ciira ko, kwora kul za sal Moabien tǝ ginni, so za hǝǝ ɓaŋra wul dǝɓ ah ɓoo ge pǝ pal mǝ Elisa. Ne cok dǝɓ ah mo ge palle, juu woiŋ Elisa, dǝɓ ah so syemme, ur uu ne ɓal ahe.
22Hazayel goŋ sǝr Siria cuu syak nyi za Israel ne zah'nan goŋ Joakas daŋ. 23Amma Dǝɓlii joŋ gboŋgboŋ wo za Israel, kwo syak tǝ ɓǝǝra, so ɓaŋ syiŋ ɓǝǝ mor gbanzah ah mo gbǝ ɓo ne Abraham ne Isak ne Yakuɓ, 'yah ka muŋ ra ya. Ŋhaa tǝ'nahko soɓ ra ɓoo ya.
24Hazayel goŋ Siria ge wuu, wel ah Benhadat kaa goŋ pǝ cok ahe. 25So Joas we Joakas nyiŋ yaŋ maluu jol Benhadat we Hazayel, mor Benhadat yea nyiŋ ɓo jol pah ah Joakas ne salle. Joas ge ɗaŋ ko ɓal sai, so nyiŋ yaŋ za Israel maluu mo jol ahe.
Currently Selected:
2 ZA GOŊE 13: MUAR
Highlight
Share
Copy
Want to have your highlights saved across all your devices? Sign up or sign in
Bible Moundang © Alliance Biblique du Tchad, 1996.
