2 ZA GOŊE 1

Masǝŋ laa pǝ'nyah ne goŋ Akazia ya

1Fahfal wul goŋ Akaɓ, Moabien ŋwoora kyaŋ ne za Israel.

2Comki goŋ Akazia lee gin zahtǝwoo yaŋ tǝ yaŋ sǝŋ ah mai mo yaŋ Samaria, joŋ syemme, so pee zapee, faa nyi ra: We ge fii Ba'al-Zebuɓ masǝŋ yaŋ Ekron, wala me laɓ syem ɓe nyẽe no ne? 3Amma angelos Dǝɓlii faa ɓǝ nyi profeto Elias ma ban Tisbi: Mo ur mo ge zyaŋ ne zapee goŋ Samaria, mo faa nyi ra: Wala Masǝŋ kǝka kǝsyil za Israel yao ne? Mor ah ko we ga fii Ba'al-Zebuɓ masǝŋ ki yaŋ Ekron ne? 4Mor ah Dǝɓlii faa: Mo ka ɗǝr gin tǝ faswul mai mo yee swǝ ɓo gŋ yao, mo ga wuu. Elias so kal ge gŋ.

5Zapee so pii soora ge wo goŋe, goŋ fii ra: We so pii soo ge gwari nai mor fẽene? 6Zyiira zah ah faa: Dǝɓ ki ge zyaŋ ne ru faa nyi ru: We pii soo we ge wo goŋ mai mo pee we ganne, we faa nyi ko: Dǝɓlii faa sye: Wala Masǝŋ kǝka kǝsyil za Israel yao ne? Mor ah ko mo pepee ka ga fii Ba'al-Zebuɓ masǝŋ ki yaŋ Ekron ne? Mor ahe, mo ka ɗǝr gin tǝ faswul ɓo mo yee ge ɓo gŋ yao, mo ga wǝ gŋ. 7So fii ra faa: Dǝɓ mai mo zyaŋ ne we mo faa ɓǝ mai daŋ nyi we a ɗǝne? 8Zyiira zah ah faa: Dǝɓ ah ɓoo mbǝro ma ne syiŋ fan ɓo, baŋ sãh ɓo ne ganda wakke. Goŋ faa: Elias ma ban Tisbi yee yea.#Mt 3:4

Akazia kyeɓ ka gban Elias

9So pee dǝɓlii sooje ah ma tǝtǝl za jemma dappe ne zan ah jemma dappe daŋ kal ge wo Elias. Dǝɓlii sooje ah yee kal ge wo Elias ka Elias kaa ɓo tǝ waa sǝŋ. Faa nyi ko: Amo dǝɓ Masǝŋ, goŋ faa mo ɗǝr ge sǝŋ. 10Amma Elias zyii zah dǝɓlii sooje faa: Ame ye me dǝɓ Masǝŋ ko ɓe, sai wii mo gee sǝŋ ge, mo ge sye mo ne za ɓo matǝ jemma dappe daŋ. Ne cok ah sǝ, wii gee sǝŋ ge, ge sye ko tǝkine zan ah matǝ jemma dappe daŋ.#Lu 9:54

11Goŋ so pee dǝɓlii sooje matǝ za jemma dappe maki ah ne zan ah ge wol ah faɗa. Dǝɓ ah ge faa: Amo dǝɓ Masǝŋ, goŋ faa sye: Mo hǝǝ mo ɗǝr ge sǝŋ. 12Amma Elias zyii zah ɓǝǝ faa: Ame ye me dǝɓ Masǝŋ ko ɓe, sai wii mo gee sǝŋ ge, mo ge sye mo ne za ɓo matǝ jemma dappe daŋ. Ne cok ah sǝ, Masǝŋ pee wii gee sǝŋ ge, so sye ko ne zan ah matǝ jemma dappe daŋ.

13So goŋ pee dǝɓlii sooje matǝ za jemma dappe patǝ sai ah ne zan ah jemma dappe ge faɗa. Dǝɓlii sooje patǝ sai ah yee ge kea ge sǝŋ pel Elias pǝǝ ko faa: Dǝɓ Masǝŋ, oseni mo soɓ tǝtǝl ɓe tǝkine tǝtǝl za yeɓ ɓo matǝ jemma dappe mo yea ne nahnǝn ɓo na fanne. 14Mo ẽe wii gee sǝŋ ge sye zaluu sooje matǝ za jemma dappe ne za ɓǝǝ jemma dappe jemma dappe gwa daŋ kǝpel ɓe. Amma zǝzǝ̃ǝko mo soɓ tǝtǝl ɓe yea sǝŋ sa.

15Angelos Dǝɓlii faa nyi Elias: Mo ɗǝr ge sǝŋ ne ki o, mo ɗuu gal ah ka. So ur ɗǝr kal ge wo goŋ ne ki. 16Ge faa nyi ko: Dǝɓlii faa sye: Amo pee zapee mor ka ga fii Ba'al-Zebuɓ masǝŋ ki yaŋ Ekron. Wala Masǝŋ kǝka kǝsyil za Israel mor ka mo fifii zah ah ya ne? Mor ahe, mo ka ɗǝr gin tǝ faswul ɓo mo yee ɓo gŋ yao, mo ga wuu.

17Goŋ Akazia wǝ tǝgbana ɓǝ mai Dǝɓlii mo faa ne zah profeto Elias. Naa mah ah Jehoram kaa goŋ pǝ cok ahe, mor ka ne wel a. Fan ah joŋ ne syii patǝ gwa ah Yuram we Yusafat mo kaa goŋ Yuda ɓo. 18Tǝcoŋ ɓǝ Akazia tǝkine yeɓ ah ŋwǝǝ ɓo pǝ ɗerewol Ɓǝ Za Goŋ Israel.

Currently Selected:

2 ZA GOŊE 1: MUAR

Highlight

Copy