1 ZA GOŊE 22

Akaɓ gbǝ zah ne Yusafat

(2 KeeƁ 18:2-27)

1Za sǝr Siria ne Israel kaara jam wo ki kǝsyil syii sai bai ruu salle. 2Ne syii sai ah Yusafat goŋ sǝr Yuda ge wo goŋ Israel. 3Goŋ Israel faa nyi zaluu ah ra: We tǝ ɓe, Ramot ma Giliat sye, ma man o, amma na so kaa ɓo nai na nyiŋ gin jol goŋ Siria ya ba ɗǝne? 4So faa nyi Yusafat: Amo ga ne me mor ka ga ruu sal ne Ramot no ne? Yusafat zyii zah goŋ Israel faa: Ame, me tǝgbana mo, za ɓe a tǝgbana za ɓo, pǝr ɓe ra a tǝgbana pǝr ma ɓo ra.

5So Yusafat faa nyi goŋ Israel: Mo fii Dǝɓlii ɗao ya ne? 6Goŋ Israel tai profetoen masǝŋ mǝ ah temere nai, fii ra faa: Me ge ruu sal ne yaŋ Ramot o ne? Wala me ge ka ne? Zyiira zah ah faa: Mo gyo, Dǝɓlii ga soɓ yaŋ ah ga mor jol ɓo. 7Amma Yusafat faa: Profeto Dǝɓlii maki ah coŋ ɓo ka nyee vaŋno ka na fii Dǝɓlii ne zah ah ya ne? 8Goŋ Israel zyii zah Yusafat faa: Coŋ dǝɓ maki ah mai dǝɓ moo gak fii Dǝɓlii ne zah ah ɓo no nyee vaŋno. Amma me syiŋ ko ɓo syiŋ mor ka faa ɓǝ tǝ ɓe pǝsãh ya, sai a faa ɓǝɓe' nyi me to, dǝɓ ah ako ye Mika we Imla. Yusafat faa: Goŋ mo faa ɓǝ noo ka. 9So goŋ Israel ɗii syẽe yaŋ goŋ vaŋno faa nyi ko: Mo ge ɗii Mika we Imla ge ne gwari.

10Goŋ Israel ne Yusafat goŋ Yuda kaara ɓo pǝ cok matǝ gboŋ mai za moo ŋgoŋ kiita gŋ zahfah yaŋ Samaria. Koo zune daŋ kaa ɓo tǝ fakal goŋ ahe, ɓaara mbǝro goŋ ɓǝǝ ɓo, profetoen daŋ a faara ɓǝ pel ɓǝǝra. 11Sedekias we Kanaana zyeɓ ciŋ ne vãm faa: Dǝɓlii faa: Mo ga ik Sirien ne ciŋ maraiko, ŋhaa mo vǝr ra ne tǝɗe'. 12Profetoen daŋ faara ɓǝ tǝki vaŋno, faara: Mo ge Ramot, mo ga yea ne pejii gŋ, mor Dǝɓlii ga soɓ yaŋ ah ga mor jol goŋe.

13Pa pee mai mo kal ge ɓo ka ɗii Mika faa nyi ko: Profetoen taira zah ɓo tǝki vaŋno mor ka faa ɓǝ masãh ah nyi goŋe, amo laŋ, mo soɓ ɓǝ faa zah ɓo mo yea tǝgbana ɓǝ faa ma ɓǝǝra, mo faa ɓǝ pǝsãhe. 14Amma Mika faa: Me haa zah ne tǝɗii Dǝɓlii mai mo no sǝŋ, ɓǝ mai Dǝɓlii moo ga faa nyi me, me ga faa mooko.

15Ne cok mo ge dai wo goŋe, goŋ so fii ko faa: Mika, ru ge ruu sal ne Ramot o ne? Wala ru ge ka ne? Zyii zah ah faa: Mo gyo, mo ga yea ne pejii gŋ, Dǝɓlii ga soɓ yaŋ ah ga mor jol ɓo. 16Amma goŋ faa nyi ko: Me lai mo ɓal kǝɗii ka mo faa ɓǝ ki nyi me ka, sai ka mo faa goŋga nyi me pǝ tǝɗii Dǝɓlii to ne? 17Mika zyii faa: Me kwo za Israel daŋ myahra ɓo tǝgǝǝ waa tǝgbana pǝsǝ̃ǝ mai mo ka ne pakǝpii ya, Dǝɓlii faa: Pa kal pel ɓǝǝ kǝka, koo zune kǝsyil ɓǝǝ mo pii sooko ge yaŋ ah jam.#KeeZ 27:17; Mt 9:36; Mk 6:34 18Goŋ Israel so faa nyi Yusafat: Me faa nyi mo ya ne? Me faa: Ka faa ɓǝ sãh nyi me ya, sai a faa maɓe' ah to. Mika faa: Mo laa ɓǝ faa Dǝɓlii. 19Me kwo Dǝɓlii kaa ɓo tǝ fakal goŋ ahe, zapee ma coksǝŋ daŋ uura ɓo kah ah nǝjokǝsãh tǝkine jokǝlǝɓai ahe.#Esa 6:1; Joɓ 1:6 20Dǝɓlii faa: Azu ye ga kǝǝ Akaɓ ka mo ge ruuko sal ne Ramot sye ne? Angelos maki zyii faa naino, maki ah laŋ a zyii faa naino. 21So tǝ'yak ki pǝ̃ǝ ge, ge uu pel Dǝɓlii faa: Me ga kǝǝ ko. Dǝɓlii so fii tǝ'yak: Mo ga kǝǝ ko ne fẽene? 22Tǝ'yak zyii faa: Me ganne, me ga ciŋ tǝ'yak maber ah pǝ zah profetoen ah ra daŋ. Dǝɓlii faa: Mo gyo, mo ge kǝǝ ko, mo ga kaa kacella laŋ ta, mo ge joŋ naiko. 23Mo ẽe, zǝzǝ̃ǝ Dǝɓlii maa tǝ'yak maber ah pǝ zah profetoen ɓo rai daŋ, mor Dǝɓlii faa ɓǝɓe' ɓo tǝ ɓo.

24Sedekias we Kanaana so i sok nyi Mika faa: Tǝ'yak Dǝɓlii soɓ me ɗii ka so kal ga faa ɓǝ nyi mo ne? 25Mika zyii faa: Mo ga tǝ ɓǝ ah com mai moo ga ɗuu gin ɓǝr yaŋ ki ka ga ɓǝr yaŋ maki ah ka muŋ suu ɓo gŋ ba. 26Goŋ Israel faa: We ɓaŋ Mika, we pii soo ge nyi dǝɓlii yaŋ Samaria ma ɗii ne Amon ne ko ne yerima Joas. 27Ka mo faa nyi ra: Goŋ faa sye: Mo ɓoo dǝɓ nyẽe ge pǝ daŋgai, we nyi farel bone nyi ko tǝkine bii bone ka mo zwǝko, ŋhaa sai ka me pii soo ge jam ɓe. 28Mika faa: Mo pii soo ge jam ɓe, ka Dǝɓlii ye ka pee me faa ɓǝ ah ɓo ya. So faa: Awe za daŋ we laa pǝsãhe.

Wul Akaɓ

(2 KeeƁ 18:28-34)

29So goŋ Israel ne Yusafat goŋ Yuda pǝ̃ǝra sal ge zah Ramot ma Giliat. 30Goŋ Israel faa nyi Yusafat: Me ga fer suu ɓe ne mbǝro maki ahe, ka me ge dan ka ruu sal ba, amma ma ɓo mo yea ne mbǝro ma wo ɓo. Goŋ Israel fer mbǝro ah so kal ge dan salle. 31Amma goŋ Siria faa nyi zaluu muŋta sal ah ra jemma sai tǝtǝl gwa: We ruu sal ne za hai daŋ ka, sai we ruu sal ne goŋ Israel to. 32So zaluu ma lwaa swah ɓǝ muŋta sal mo kwora Yusafat, lǝŋra goŋ Israel yo, so jinra nahnǝn ɓǝǝ rǝk nyi ka ruu sal ne ki. Amma Yusafat so dǝǝgor salle. 33Ne cok zaluu ma lwaa swah ɓǝ muŋta sal mo kwora goŋ Israel ye ka, so pii soora gin wol ahe.

34Pǝ sal ah dǝɓ ki woo saŋ 'nǝǝ guu ge hai, so dǝ goŋ Israel ne gin zah zyaŋ mbǝro vãm ne guu ahe. So goŋ faa nyi pa ma kwak muŋta sal ne ki: Mo fer zah muŋta salle, mo pǝ̃ǝ gin kǝsyil sal ne me ge lalle, mor me lwaa nwãh ɓo. 35Amma com ah sal ah a pǝcwak no cam. Ge soɓra goŋ uu ne muŋta sal ah pel Sirien, ga lil ah wuu. Syim ɗuu zah nwãh ge ɓǝr muŋta sal ahe. 36-37Ne cok com mo dan o, dahra gor zahjul sal faa: Zune daŋ mo pii soo ge yaŋ ahe, zune daŋ mo pii soo ge sǝr ahe, mor goŋ wǝ ɓe. So ɓaŋra ko ge yaŋ Samaria ne ko, ge ciira ko gŋ. 38Ge vãhra muŋta sal ah pǝ el Samaria, pǝ cok mai ŋwǝǝ tǝkoi moo erra bii gŋ, so goo ge lah syim ahe. Ɓǝ ah joŋ tǝgbana mai Dǝɓlii mo faa ɓo.

39Tǝcoŋ ɓǝ Akaɓ ne yeɓ ah mo joŋ ne yaŋ mai mo zyeɓ ne loŋ balle, tǝkine yaŋ maluu camcam mai mo vuuko daŋ, ɓǝ ah ŋwǝǝ ɓo pǝ ɗerewol Ɓǝ Za Goŋ Israel. 40Akaɓ wuu, wel ah Akazia kaa goŋ pǝ cok ahe.

Yusafat kaa goŋe

41Ne cok Akaɓ mo kaa goŋ Israel syii nai, Yusafat we Asa kaa goŋ Yuda ne ko. 42Ne cok Yusafat mo kaa goŋ, ka joŋ syii ɓo jemma sai tǝtǝl dappe. Kaa goŋ yaŋ Jerusalem syii jemma gwa tǝtǝl dappe. A ɗii mah ah ne Azuba, mǝlaŋ dǝɓ ma ɗii ne Silki yo. 43Ɓaŋ tǝɓal pah ah Asa ryakryakke, coŋ ge lal biŋ laŋ ya, joŋ fan ma 'nyah suu Dǝɓlii. 44Sai fan vaŋno to, cok ma vuu tǝgee sǝŋ ah ra ɓeɓ ya, za a ŋgomra fan joŋ syiŋ gŋ ne ko tǝkine tǝǝ syiŋ ɓǝrdi pǝ cok ma tǝgee sǝŋ. 45Amma Yusafat kaara wo ki ne goŋ Israel jam.

46Tǝcoŋ ɓǝ Yusafat ne yeɓ ah tǝkine ɓǝ ruu sal ah ŋwǝǝ ɓo pǝ ɗerewol Ɓǝ Za Goŋ Yuda. 47Amma nĩi za ma joŋra ɓǝǝ pǝ cok joŋ syiŋ ma mor masǝŋ ki mai mo yea coŋ ɓo wo sǝr daga ne cok pah ah Asa daŋ ge lalle.

48Ne cok ah goŋ kǝka pǝ sǝr Edom ya, dǝɓ faadal ki no ye kaa ɓo gŋ na goŋe. 49Yusafat cee dah maluu mor ka ga Ofir ne ka woo vãm kaŋnyeeri, amma lwaa gera ya, mor dah ǝ̃ǝra ɓeɓ Esion-Geber. 50So Akazia we Akaɓ faa nyi Yusafat: Mo soɓ za yeɓ ɓe mo gera ne za yeɓ ɓo ra ne dahe. Amma Yusafat zyii ya. 51So Yusafat ge wuu, ciira ko pǝ yaŋ pamlii David, wel ah Yuram kaa goŋ pǝ cok ahe.

Akazia kaa goŋe

52Ne cok Yusafat mo kaa goŋ Yuda syii jemma tǝtǝl rǝŋ, Akazia we Akaɓ kaa goŋ Israel ne ko, kaa goŋ za Israel syii gwa. 53Joŋ fan maɓea ah wo Dǝɓlii. Ɓaŋ tǝɓal pah ah ne mah ahe, tǝkine mǝ Jeroboam we Nebat mai mo kǝǝ za Israel dan ra pǝ faɓe'. 54Syee mor Ba'al, a kea ga sǝŋ pel ahe, ɓeɓ zahzyil nyi Dǝɓlii Masǝŋ Israel, tǝgbana pah ah mo joŋ tǝɗe'.

Currently Selected:

1 ZA GOŊE 22: MUAR

Highlight

Copy