1 KEE ƁƏ 18
18
Sooje David kaara kacella
(2 Sa 8:1-18)
1Fahfal ah comki David ruu sal ne Filistien, ik ra, nyiŋ yaŋ Gat ne yaŋ manyee ah ra mo kah ah daŋ. 2So ik Moabien ta, joŋ ra wuu syellele, so ciŋra byak sǝǝ gǝraama nyi ko. 3David so ruu sal ne Hadadezar goŋ Zoba gwari ne zahsyee sǝr Hamat, mor ka Hadadezar tǝ kyeɓ ka nyiŋ sǝr ah matãa mai mo kah el Efrat. 4David nyiŋ muŋta sal ah ujenere, gbah za pǝr ah ujenere rǝŋ, ne mǝǝna ujenere jemma gwa. Sai soɓ pǝr ma kwak muŋta sal temere vaŋno to, cee gah nyi tǝcoŋ ah ra belbelle.
5Sirien ma yaŋ Damaskus peera sooje ge ka gbah jol goŋ Hadadezar, so David ruu sal ne ra, ik za kǝsyil ɓǝǝ pǝ wul 22.000. 6So rǝk sooje ma byak cok kǝsyil ɓǝǝra, so ciŋra byak sǝǝ gǝraama nyi ko. Pǝ cok daŋ David moo ga gŋ, Dǝɓlii soɓ ko kaa kacella. 7David nyiŋ bal sal ma ne vãm kaŋnyeeri mai zaluu pel Hadadezar mo ne daŋ kal ge yaŋ Jerusalem ne ko. 8So pǝ yaŋ maluu ma ɗii ne Tibat ne Kun mai Hadadezar ye mo lwaa ɓo, David woo vãm syẽ gŋ pǝlli ta. Fahfal ah Salomo joŋ mabii ne vãm syẽ ahe, ne wǝǝdǝǝ kpuusok tǝkine tahsah ma mor joŋ yeɓ yaŋ Masǝŋ.#1 ZaG 7:40-47; 2 KeeƁ 4:11-18
9Ne cok Toi goŋ sǝr Hamat mo laa David ik sooje Hadadezar tǝɗe' ɓe, 10so pee wel ah Yuram ge wo goŋ David ka haozah wol ah tǝkine joŋ osoko nyi, mor ruu sal ne Hadadezar so nĩi ko ɓe ta. Mor Hadadezar a ruu sal ne Toi cẽecẽe. Yuram ge ne vãm kaŋnyeeri, vãm solai, ne vãm syẽ mor jolle. 11So goŋ David soɓ vãm ah ra mor yeɓ Dǝɓlii, tǝgbana vãm kaŋnyeeri ne vãm solai ma kǝpel mo woo jol za mai mo ɗaŋ sǝr ɓǝǝ ta, sǝr ah ye Edom, Moab, Ammon, Filistia, ne Amalek.
12Abisai we Seruja ik za kǝsyil Edomien pǝ el Tǝm 18.000.#Lǝŋ 60:1 13So rǝk sooje ma byak cok pǝ sǝr Edom daŋ, zan ah so ciŋra byak goŋ David. Pǝ cok daŋ David moo ga gŋ, Dǝɓlii soɓ ko kaa kacella. 14David kaa goŋ tǝ za Israel daŋ, joŋ fan masãh ah ne matǝ goŋga ah wo zan ah pǝlli. 15Joaɓ we Seruja ye swah sooje ahe, Yusafat we Akilut ye wajiiri, 16Sadok we Akitoɓ, ne Akimelek we Abiatar ye za joŋzahsyiŋrĩ, Seraja pa ŋwǝǝ fan o. 17Benaja we Jehojada ye dǝɓlii za ma byak David: Keretien ne Peletien. Wee David laŋ a joŋra yeɓ pǝ cok mabǝ̃ǝ ah wo goŋe.
Currently Selected:
1 KEE ƁƏ 18: MUAR
Highlight
Share
Copy
Want to have your highlights saved across all your devices? Sign up or sign in
Bible Moundang © Alliance Biblique du Tchad, 1996.
