1 KEE ƁƏ 17
17
Ɓǝ faa Natan wo David
(2 Sa 7:1-17)
1Comki ka goŋ David no kaa ɓo yaŋ goŋ ahe, pepee wo profeto Natan faa nyi ko: Mo ẽe me kaa ɓo pǝ yaŋ ma zyeɓ ne kpuu bahre, amma sunduku Masǝŋ kaa ɓo pǝ tal mbǝro. 2Natan zyii zah goŋ faa: Mo ge joŋ fan mai zahzyil ɓo mo tǝ foo daŋ, mor Masǝŋ no ne mo.
3Amma ne suŋ ah Masǝŋ faa nyi Natan: 4Mo ge faa nyi dǝɓ yeɓ ɓe David: Me faa sye, mo ye ka ga vuu yaŋ nyi me ka kaa gŋ ya. 5Mor daga ne cok mai me pǝ̃ǝ gin sǝr Egiɓ ne za Israel ŋhaa tǝ'nahko, me kaa pǝ yaŋ taa ya, amma me kaa pǝ tal mbǝro, so a eera pǝ cok mai ga pǝ cok maki ah ne ko. 6Ne cok mai me syee ne za Israel daŋ, me faa ɓǝ nyi dǝɓ vaŋno kǝsyil zaluu Israel mai me rǝk ra, mor fẽe we zyeɓ yaŋ nyi me ne kpuu bah ya taa ɓe ne?
7Zǝzǝ̃ǝko mo ge faa nyi dǝɓ yeɓ ɓe David: Ame Dǝɓlii ma ne swah daŋ, me faa sye: Ame ɓaŋ mo giŋ mor gwii lalle, me ge kan goŋ ne mo tǝ za ɓe Israel. 8Ame no ne mo pǝ cok daŋ mo syee gŋ, me nĩi za syiŋ ɓo daŋ pel ɓo ɓe. Me ga joŋ tǝɗii ɓo pǝ'man tǝgbana mǝ zaluu wo sǝrri. 9-10Ame nǝǝ cok maki ah ɓo mor za ɓe Israel. Ame rǝk ra ɓo gŋ, a ga kaara gŋ, ka ga laŋra yao, za maɓea ah ka ga cuura syak nyi ra na ma kǝpel ao. Ame faa ɓo me ga jee za syiŋ ɓii nyi we daŋ, me ga nyi wee nyi mo. 11Ne cok mo wuu mo ciira mo ge kah pa ɓo lii ra ɓe, me ga nǝǝ dǝɓ ki kǝsyil wee ɓo kaa goŋe, so me ga joŋ goŋ ah pǝyǝkki. 12Ako ye ga vuu yaŋ mor ɓe, me ga joŋ goŋ ah yea ga lii. 13Ame ye ga yea pah ahe, ako ye ga yea we ɓe. Me ka ga soɓ ko tǝgbana Saul mai me nǝǝ ge lal mo so kaa goŋ ɓo pǝ cok ah ya.#2 Kor 6:18; Yahu 1:5 14Me ga ɓaŋ ko kan ka mo byakko za ɓe ne goŋ ɓe ga lii ga lii, morsǝ̃ǝ goŋ ah ka vǝr a. 15Natan kee ɓǝ mai daŋ Masǝŋ mo cuu nyi ko nyi David.
David juupel joŋ osoko nyi Masǝŋ
(2 Sa 7:18-29)
16So goŋ David dan ge kaa pel Dǝɓlii pǝ tal mbǝro juupel wol ah faa: Masǝŋ Dǝɓlii, ame ne yaŋ ɓe daŋ me kii nǝn pǝ koŋ mai ka mo joŋ fan mai wo ɓe nai ya. 17Zǝzǝ̃ǝ mo so joŋ maki ah ɓe faɗa, amo so cuu ɓǝ morsǝ̃ǝ ɓe moo ga yea pel nyi me. Masǝŋ Dǝɓlii, amo joŋ me ɓo tǝgbana dǝɓ mabǝ̃ǝ ahe. 18Me so gak faa ɗah nyi mo ɗǝne? Amo tǝ me ɓo belbelle, ne daŋ laŋ, mo so yii me dǝɓ yeɓ ɓo. 19Ɓǝ ah 'yah ɓo ne ɓǝ foo zahzyil ɓo ye foo ɓo ka joŋ wo ɓe nai mor ka cuu yǝk ɓe ma pel nyi me. 20Dǝɓlii, dǝɓ ma na mo kǝka, Masǝŋ maki ah na mo kǝka, ru tǝ ɓǝ ah ɓe. 21Zahban maki ah kǝka wo dunia na za Israel mai mo wǝǝ ra pǝ byak mo so joŋ ra ciŋ za ɓo ɓo ne ya. Fan malii matǝ gǝriŋ ah mai mo joŋ mor ɓǝǝra, ɓǝ ah joŋ tǝɗii ɓo myah ɓo wo sǝr ne lii ah daŋ. Amo wǝǝ za ɓo gin sǝr Egiɓ, mo nĩi zahban manyeeki ah ra pel ɓǝǝra. 22Amo joŋ za Israel ɓo na za ɓo ga lii, Dǝɓlii, amo laŋ mo ciŋ Masǝŋ ɓǝǝ ɓo o. 23Zǝzǝ̃ǝko Masǝŋ Dǝɓlii, mo baa ɓǝ mai mo faa ɓo tǝ ɓe ne wee ɓǝr ɓe ge cok ahe, cẽecẽe mo joŋ fan mai mo faa ɓǝ ah ɓo ka joŋni. 24Tǝɗii ɓo ga yea pǝyǝk galii, za ga faara: Dǝɓlii ma ne swah daŋ ako ye Masǝŋ Israel. Mo ga soɓ morsǝ̃ǝ ɓe kaa goŋ ga lii. 25Ame lwaa swah zahzyil ka juupel mai wo ɓo Masǝŋ ɓe, mor amo ye cuu ɓǝ marai daŋ ɓo nyi me dǝɓ yeɓ ɓo, mo faa mo ga joŋ morsǝ̃ǝ ɓe kaa goŋe. 26Dǝɓlii, amo ye Masǝŋ, amo faa ɓǝ malii mai ɓo nyi me. 27Ame fii mo, mo ẽe morsǝ̃ǝ ɓe ka mo laara pǝ'nyah pel ɓo cẽecẽe. Dǝɓlii, mo ẽe ra ɓe, ẽe ɓo yea tǝ ɓǝǝ ga lii ga lii.
Currently Selected:
1 KEE ƁƏ 17: MUAR
Highlight
Share
Copy
Want to have your highlights saved across all your devices? Sign up or sign in
Bible Moundang © Alliance Biblique du Tchad, 1996.
