Mako 5
5
Jesu unopodza nlume una meya mbi
(Matewu 8:28-34; Luke 8:26-39)
1Jesu ne badiyiwa babe bakatjulukila seli kwe gungwa ku shango ye Bagerasa. 2Kati ebhuda mu n'goro, kashangamidziwa nge nlume wakabe ana meya mbi, edwa ku zwikumbu. 3Nlume iwoyo wakabe egala ku zwikumbu, ngono kwakabe kusitjina na iye ungansunga kene nge ketani dumbu. 4Nlume iwoyo wakabe kanjinji esungwa makumbo ne maboko, koga ethubula ketani, evuna tshipi dzakansunga makumbo. Akuna wakabe akasima kwaangankulila nge masimba. 5Misi yose siku ne sikati wakabe egala mu zwikumbu na pezhugwi kwe matombo, emimila tjibaka tjose ezwitjekanya nge mabgwe.
6Wakati ebona Jesu ali thambo kalabuka kanthigamila. 7Kamilidzila hwi pezhugwi kati, “Unoshakashingani ndimi Jesu, Nkololo we Ndzimu Upezhugwi zhugwi? Ndokumbila nge zina le Ndzimu kuti usindihwise zogwadza.” 8Jesu wakabe ati kunli, “Bhuda mu nlume iwoyu, meya mbi ndiwe!”
9Jesu kabhuzwa meya mbi kati, “Zina lilo ndiani?”
Kadabila eti, “Zina langu ndi Mphatho, ngobe tibanjinji.” 10Ukakumbila Jesu utshambilidza uti, asiyitatile kuzhe kwe ntuthu iwoyo.
11Kwakabe kuna ngubi ye hwotji yakabe ifula pejo ne duthu. 12Meya mibi ikakumbila Jesu iti, “Utitatile mu hwotji idzedzi, utidumilile kungina mudzili.” 13Kaidumila, ngono meya mibi ikabhuda ikangina mu ngubi ye hwotji dzili zwiwulu zwibili (2 000). Dzikatizha nge phili ye gungwa yakakunguluka, dzikawila mu gungwa dzikafa.
14Ibabo bakabe bakadzilisa bakatizha, bakanoleba ku nzi nkulu ne mu shango, ngono bathu bakabhuda bakayenda kunobona kuti ini tjashingikala. 15Ngono bakazha kuna Jesu, bakawana nlume wakabe abe ana meya mibi ali gele ipapo, akasungila ali mpezha, ndizo bakatja. 16Ibabo bakabe babona bakabudza bathu tjashingikalila nlume wakabe abe ana meya mibi ne tjashingikalila hwotji.
17Ngono ipapo bakakumbila Jesu kuti abhude mu ntuthu wabo.
18Kukati Jesu engina mu n'goro, nlume wakabe abe ana meya mibi kankumbila kuti ayende naye.
19Jesu kalamba kati, “Yenda kanyi kuna be nsha uwo unobabudza kuti She wakushingila tjikulu kungapani nenge kuti wakuhwila ngoni kungapani.”
20Ndizo nlume iwoyo kayenda, katangisa kuleba kuti Jesu wanshingila kungapani mu mizi ili gumi inoyi Dekapoli. Bathu bose bakakaabala.
Nkololokadzi wa Jairo ne nkadzi wakabhata hazu ya Jesu
(Matewu 9:18-26; Luke 8:40-56)
21Jesu wakati atjuluka gungwa kakale nge n'goro ali seli, mbunga nkulu we bathu ukakubungana panli pa wunde ye gungwa. 22Ipapo kukazha mmwe we balauli be Ng'umba ye Ntembezelo unodang'wa Jairo. Kati ebona Jesu kawila pa makumbo awe, 23ngono kankumbila kwazo eti, “Nkololokadzi wangu unofa. Izha umbige maboko kuti ndizo apole, atjile.”
24Ndizo Jesu kayenda naye. Mbunga nkulu kulu we bathu ukantobela ukammanikanya.
25Kwakabe kuna nkadzi wakabe ana makole ali gumi lina mabili egwala bugwele gwe kubhizha malopa. 26Wakabe adziyila kwazo alapiwa nge ng'anga njinji, ashingisa kose kwaakabe anako, ngono bugwele gugwe gukulila mbeli. 27Kati ehwa ngekwa Jesu kazha ali shule kukwe mu mbunga, ngono kabhata hazu ya Jesu. 28Wakazwidwa mu nkumbulo uwe kati, “Ha ndingabhata nenguba zwili izo zwiambalo zwizwe koga, ndowopola!”
29Ngono kubhizha malopa kukwe kukama tjinyolotjo, kahwa mu mbili uwe kuti wapodziwa bugwele gugwe. 30Jesu kahwa kuti simba lile labhuda munli, ipapo katendebuka pakati kwe mbunga, ngono kabhuzwa kati, “Ndiani wabhata zwiambalo zwangu?”
31Badiyiwa babe bakanshandula beti, “Se mubona bathu bakamumanikanya saikoku mungabhuzwa wali muti, ‘Ndiani wandibhata kene?’ ”
32Koga Jesu kadwilila elinga kumpoteleka kubona kuti ndiani wakabe ambhata. 33Nkadzi iwoyo wakabe eziba tjanshingikalila, ndizo kawila pa makumbo a Jesu etetema ngotja, ngono kambudza malebeswa wose. 34Jesu kan'dwa kati, “Nkadzi, kugalamoyo kuko kwakupodza. Yenda nge kunyalala, upole kugwala kuko.”
35Jesu wakati atjalebeleka, kukazha bathu bedwa ku ng'umba ya Jairo, nlauli we ng'umba ye ntembezelo beti, “Nkololokadzi uwo aatjipo. Utjadziyidzilani N'diyi kene?”
36Jesu wakati ehwa tjabaleba, kadwa nlauli we ng'umba ye ntembezelo kati, “Usitje, galamoyo koga.” 37Ngono kasitongo dumila mmwe nthu kuntobela kuzhe kwa Pita na Jakubo na Johani nkulu wa Jakubo. 38Bakati baswika ku nzi we nlauli we ng'umba ye mitembezelo, Jesu kawana bathu be poyongana belila bekuwa. 39Kangina, ngono kati ku bali, “Kupoyongana ikoku ne kulila ngekweni? Mwana wakayizela aazofa.”
40Koga bakanseka mahanya. Kabadusila kuzhe bose, katola tate be mwana na mmeyabe ne baakabe anabo, ngono kangina kwakabe kuna mwana. 41Kambhata nge luboko kati, “Talitha, kumi,” kunodwa kuti, “Mwanadana, ndoti ku kuli, milika.”
42Tjinyolotjo mwanadana kamilika kayenda yenda. Wakabe ana makole ali gumi lina mabili. Bathu bakakaabala kwazo. 43Ngono kabalaya esimisa eti kusiyite nthu waziba ngekwa ikoku, ipapo kabadwa kati bape mwanadana tjimwe tjaangaja.
Currently Selected:
Mako 5: KBTP
Highlight
Share
Copy
Want to have your highlights saved across all your devices? Sign up or sign in
Kalanga Bible © Bible Society of Botswana, 2008, 2018.
