Mako 4

Tjifaniso ngekwe ndzwali

(Matewu 13:1-9; Luke 8:4-8)

1 # Luke 5:1-3 Jesu katangisa kakale kudiya ali pejo ne gungwa. Mbunga usinshoma we bathu ukakubungana panli kwaakati kangina mu n'goro kagala muuli mu gungwa. Bathu bose bakabe bali pa phili ye gungwa. 2Kabadiya zwithu zwinjinji eshingisa zwifaniso, ngono mu kudiya kukwe kati:

3“Hwililani! Ndzwali wakabhuda enodzwala. 4Ngono kati edzwala imwe mbewu ikawila mu zila ngono nyuni dzikazha dzikaija. 5Imwe mbewu ikawila mu lushale, ikashaya mavu manjinji ngono ikatjimbidza yamela, ngobe kwakabe kusina mavu manjinji akaivukidza. 6Kukati zhuba libhuda, mmela ukatshwa ngono ukaswaba, ngobe usina midzi. 7Imwe mbewu ikawila pakati kwe matenjana e mihwa ngono matenjana akakula akaimanikanya ndizo ikasiyite zwizwalo. 8Imwe mbewu ikawila mu mavu mabuya. Ikamela ikakula, zwizwalo zwikapaphidzika ne kungabe makumi matatu kunoti makumi ali matathatu ne kunoti ku zana.”

9Ipapo Jesu kati ku bali, “Iye una zebe dze kuhwa ngaahwe!”

Nshingo we zwifaniso

(Matewu 13:10-17; Luke 8:9-10)

10Jesu kati aliyega, bamwe bakabe bali panli bana badiyiwa babe bali gumi lina babili, bakambhuzwa ngekwe zwifaniso. 11Kabadwa kati, “Masazibgwe e bushe gwe Ndzimu makaapiwa, koga kuna ibabo bakuzhe tjimwe ne tjimwe tjolebgwa nge zwifaniso, 12#Isaya 6:9, 10kuti ndizo,

“ ‘Babone koga basibonesese,

kakale bahwe koga basihwisise.

Nge kuti ha bangahwa bangadwa beshanduka mu matjinyo abo,

bakazwiibhatigwa nge Ndzimu.’ ”

Jesu unotjenesa tjifaniso tje ndzwali

(Matewu 13:18-23; Luke 8:11-15)

13Ipapo Jesu kababhuzwa kati, “Apa amutohwisisa tjifaniso itjetji kene? Mowohwisisa zwimwe zose tjini ngono? 14Ndzwali unodzwala dama. 15Aba ndibo banonga mbewu yawila mu zila, banoti baamutjila dama bakalihwa; Satani kazha tjinyolotjo kadusa dama labaamutjila. 16Koga aba bamwe nge zila inofanana, ndibo banonga mbewu yakadzwagwa mu lushale. Banoti ha behwa dama, bakaliamutjila tjinyolotjo nge kushatha. 17Koga abana midzi, ndizo banobhatilila tjibaka tjifutshwanana koga. Ha kudziyidzika nenge kuhwisiwa zogwadza ngekwe dama kuzha, tjinyolotjo banowa. 18Kakale bamwe banonga mbewu yakadzwagwa pakati pe mihwa, ndibo banohwa dama, 19koga kudziyidzika nge zwe shango nenge kutjengeleka ngekwe fumwa nenge kuyemula zwimwe zwithu, kozha kukadzipa dama, likasibe ne zwizwalo. 20Koga ibabo banonga mbewu yakadzwagwa mu mavu mabuya, ndibo banohwa dama bakaliamutjila, bakadusa zwizwalo, makumi ali matatu kene matathatu kene ali zana etjadzwagwa.”

Luvone gwakatshibikigwa nge itundu

(Luke 8:16-18)

21 # Matewu 5:15; Luke 11:33 Jesu kabadwa kati, “Apa uyapo ungazhisa luvone kakogutshibikila nge itundu, kene kagubiga kusi kwe bulawo wali? Apa aangagubige patjena kene? 22#Matewu 10:26; Luke 12:2Tjimwe ne tjimwe tjakasumbikika tjowodzutunugwa, tjakasitilika tjowodusigwa patjena. 23Ha kuna mmwe una zebe dze kuhwa ngaahwe.”

24 # Matewu 7:2; Luke 6:38 Kadwilila eti, “Yelani njele tjamunohwa! Tjilizanyo tjamunoshingisa mu bamwe nditjo tjinowoshingisiwa mu muli nenge kunopinda ikoko. 25#Matewu 13:12; 25:29; Luke 19:26Iye una tjaanatjo unowopaphidzigwa, koga iye usina tjaanatjo, tjitukununu tjaanatjo unowotjitolegwa.”

Tjifaniso tje mbewu inomela

26Kapapha kati, “Bushe gwe Ndzimu gonga nlume unodzwala mbewu mu mavu. 27Busiku ne masikati ali lele kene amuka, mbewu inomela ikula, koga asingazibe kuti inokula tjini. 28Mavu nge kwawo anokudza zwizwalo. Kotanga mmela, shule kukazha shotje, shule likazhala shanga. 29#Jowele 3:13Ha mathunde ebidwa koga, unovuna, ngobe tjabe tjibaka tje kuvuna.”

Tjifaniso tje mbewu tukununu

(Matewu 13:31-32, 34; Luke 13:18-19)

30Kakale Jesu kabhuzwa kati, “Towoti bushe gwe Ndzimu gofanana neni kene? Tingauyelesedza nge tjifaniso tjipi wali? 31Gofanana ne shanga ye mbewu ye lusaba, iyo tukununu mu mbewu dzose dzinodzwagwa mu shango. 32Koga ha yadzwagwa, inokula ikabe iyo hwulu mu matenjana wose ne thabi dzalo dzikabe hwuluhwulu kunoti ne nyuni dzikabaka mashaka mu ntutshi walo.”

33Jesu kasumikila dama nge zwifaniso zwakajali, elizanyidza kuhwisisa kwabo. 34Aana tjaakaleba ku bali asingashingise zwifaniso. Ngono wakabe eti ana badiyiwa babe koga, etjenesa tjimwe ne tjimwe.

Jesu unotjemela dutu

(Matewu 8:23-27; Luke 8:22-25)

35Zhuba ilelo kuli madekwana kati ku badiyiwa babe, “Ngatitjulukileni seli.” 36Bakasiya mbunga we bathu bakayenda naye bali mu n'goro sekwa akabe ali gele. Kwakabe kuna mimwe migoro inoyendabo kwabakabe beyenda. 37Kukamuka dutu gulu, mapundu e vula kangina mu n'goro, ngono n'goro wakabe wozhala vula. 38Jesu wakabe akaizela tjandishule, akasazamila nsazamilo, badiyiwa babe bakammusa bakati kunli, “N'diyi, amuna hanya naswi kene ha tiloba?”

39Kamilika katjemela phepo, kadwa gungwa kati, “Nyalala! Udzikame!” Ndizo phepo ikama kukabe ne kudzikama kukulu. 40Kabadwa kati, “Motjisiwa ngeni, amuna kugalamoyo kene?”

41Bakabe ne kutja kukulu, bakabhuzwana beti, “Ndiani iwoyu unohwiligwa nge phepo nenge gungwa!”

Currently Selected:

Mako 4: KBTP

Highlight

Copy