Luke 8

Bakadzi bakabe beyenda na Jesu

1Shule kwa ikoku, Jesu kayenda, kangina mizi ne mizana, esumikila ndebo mbuya ye bushe gwe Ndzimu. Badiyiwa bali gumi lina babili bakabe banaye, 2#Matewu 27:55, 56; Mako 15:40, 41; Luke 23:49ne bamwe bakadzi bakabe badusiwa meya mibi bapodziwa ne njigwele. Mariya we Magadala wakabe adusiwa meya mibi ili kutendeka wakabe aliyapobo, 3na Joanna nkadzi wa Kuza, nshingili wa Herode, na Susana ne bamwe banjinji bakabe bebabhatsha nge thundu dzabo.

Tjifaniso tje ndzwali

(Matewu 13:1-9; Mako 4:1-9)

4Kwakati mbunga nkulu we bathu wakubungana ne bathu bedwa ku mizi yakathubukana bezha kuna Jesu, kaleba tjifaniso eti:

5“Ndzwali wakabhuda kunodzwala mbewu iye. Kati edzwala mbewu, imwe ikawila mu zijana, ngono ikatshambiwa nge bathu ne nyuni dzikaija. 6Imwe yakawila pa lutombo, ikati imela, mmela ukafa, ngobe ushaya doba. 7Imwe yakawila pakati kwe mihwa, ngono mihwa ikakula nayo ikaimanikanya. 8Imwe mbewu ikawila mu mavu mabuya. Ikamela ikazwala zwizwalo zwinopinda zwakadzwagwa kazana (100).”

Wakati eleba ikoku kamilidza hwi kati, “Iye una zebe dze kuhwa ngaahwe.”

Nshingo we zwifaniso

(Matewu 13:10-17; Mako 4:10-12)

9Badiyiwa bakati bembhuzwa kuti tjifaniso itjetji tjodwani, 10#Isaya 6:9Jesu kati, “Zibo ye masazibgwe ye bushe gwe Ndzimu yakapiwa imwi, koga ku bamwe bose ndolebeleka nge zwifaniso kuti ndizo,

“ ‘Ne bebona, basibonesese ne behwa basihwisise.’ ”

Jesu unotjenesa tjifaniso tje Ndzwali

(Matewu 13:18-23; Mako 4:13-20)

11“Tjifaniso itjetji tjodwa woku: Mbewu i dama le Ndzimu. 12Yawila mu zijana kodwiwa bathu banohwa, ngono ipapo Satani kazha katola dama mu mimoyo yabo, kuti ndizo basigalemoyo bakatjidziwa. 13Yawila mu lutombo bathu banoti bahwa, bakaamutjila dama nge kushatha, koga abana midzi. Banogalamoyo tjibaka tjifutshwanana, koga mu misi ye kulikwa bakakong'wa. 14Mbewu yakawila pakati kwe mihwa, imilile banoamutjila dama, koga bakati boyenda mu zila ye bugalimoyo bakadzipiwa nge zwinoshakika mu butjilo ne fumwa nenge mizipo, zwizwalo zwabo zwikasikombole. 15Koga mbewu imu mavu mabuya, ndi ibabo bana mimoyo yakalulwama, banohwa dama, bakalibhata ngono ngosimisila bakabe ne zwizwalo.”

Luvone gupatjena

(Mako 4:21-25)

16 # Matewu 5:15; Luke 11:33 “Akuna unobhatidza luvone kagutshibikila kene kagubiga kusi kwe bulawo. Koga unogubiga patjena, kuti ndizo ibabo banongina babone tjedza.

17 # Matewu 10:26; Luke 12:2 “Ngobe akuna tjakasumbikiwa tjisingawozumbunugwa ne ikohwa tjisingawozibgwa kene tjisingawodusigwa pa tjena.

18 # Matewu 25:29; Luke 19:26 “Ndizo ibeni ne njele mu kuhwilila kwenyu. Ngoti iye una tjaanatjo unowopaphidzigwa, koga iye usina tjaanatjo ne tjaanokumbula eti unatjo tjowotogwa.”

Mme ba Jesu ne banung'una babe

(Matewu 12:46-50; Mako 3:31-35)

19Mme ba Jesu ne banung'una babe bakazha kuwombona, koga nge bunji gwe bathu bakasitubule kusedzela panli. 20Kabudziwa kuyi “Mme yabo ne banung'una babo bamile pazhe, banoshaka kukubona.”

21Kadabila eti, “Mmeyangu ne banung'una bangu ndi ibabo banohwa dama le Ndzimu ngono bakalilondolodza.”

Jesu unodzikamisa dutu

(Matewu 8:23-27; Mako 4:35-41)

22Limwe zhuba Jesu kadwa badiyiwa babe, kati “Ngati tjulukileni seli kwe gungwa.” Ndizo bakangina mu n'goro bakayenda. 23Bakati batjayenda Jesu kayizela. Dutu likazha mu gungwa, kwakati n'goro ukazhala vula, ndizo bakabe mu mbatsha hwulu. 24Badiyiwa bakamusa Jesu beti, “N'diyi, N'diyi, tapela!”

Kamuka katjemela phepo ne vula yakabe idzongana, dutu likama, kukabe ne kudzikama kukulu. 25Kabhuzwa badiyiwa babe kati, “Kugalamoyo kwenyu kungayi?”

Nge lutjo nenge kukaabala, bakabhuzwana beti, “Ndiani iwoyu? Unolaya kose ne phepo ne vula ngono zwikanteedza.”

Jesu unopodza nlume wakabhakhwa nge meya mbi

(Matewu 8:28-34; Mako 5:1-20)

26Bakaswika ku shango ye Gerasa, seli kwe gungwa kulingisana nge Galili. 27Jesu kati etshamba phili, kashangamidziwa nge nlume wakasungwa nge meya mbi, edwa mu nzi iwoyu. Kwakabe kwabe tjibaka tjilefu nlume iwoyu asingasungile, kene kuli kugala mu ng'umba, koga egala ku zwikumbu. 28Kati ebona Jesu kawila pasi mbeli kukwe kamimilila pezhugwi eti, “Unoshakani mundili kene Jesu, Nkololo we Upezhugwi zhugwi iwo Ndzimu? Ndokukumbila kuti usindihwise zogwadza.” 29Jesu wakabe adwa meya mbi kuti ibhude mu nlume iwoyo. Kanjinji meya iyeyo yakabe insunga, nenguba akabe esungwa nge ketani mu maboko ne makumbo egala akalindiwa, wakabe ethubula ketani, meya mbi entakulila ku tjilambanyika.

30Jesu kambhuzwa kati, “Zina lilo ndiani?”

Kashandula eti, “Ndimi Mphatho,” ngobe meya mibi minjinji yakabe yangina munli. 31Meya ikakumbila Jesu kuti asiyitatile mu gomba lakangina kusina tjilizanyo.

32Hwotji njinji dzakabe dzifula ipapo, mu hwunde ye dombo. Meya mibi ikakumbila Jesu kuti ailetje ingine mu hwotji idzedzo, ngono kaidumila. 33Kukati meya mibi ibhuda mu nlume iwoyu ikangina mu hwotji ngono hwotji dzikapadzamuka dzikatizha nge phili yakakunguluka, dzikangina mu gungwa, dzikang'wa nkokhwi dzikafa.

34Kukati ibabo bakalisa hwotji bebona tjashingikala, bakatizha bakanoleba ikoku mu nzi ne mu mizana, 35ndizo bathu bakamilika bakayenda, kunobona tjashingikala. Bakati beswika pana Jesu, bakawana nlume wakabe meya mibi yabhuda munli, ali gele pana Jesu, akasungila, ali mpezha, ndizo bakatja. 36Ibabo bakabona tjakashingikala bakabudza bathu sekwa kapodziwa nlume wakabe akasungwa nge meya mibi. 37Ipapo bathu bose be shango ye Bagerasa bakakumbila Jesu kuti ayende, ngobe bakabe bakuligwa ngotja. Ndizo kangina mu n'goro kuti abgwilile shule. 38Nlume wakabe meya mibi yabhuda munli, kakumbila kuyenda na Jesu, koga Jesu kandzibisa eti, 39“Shanduka uyende kanyi kwenyu, unoleba kuti Ndzimu wakuyitila kungapani.”

Ndizo iwoyo nlume kayenda kaleba mu nzi wose kuti Jesu wanshingila kungapani.

Nkololokadzi wa Jairusi ne nkadzi wakabe egwala

(Matewu 9:18-26; Mako 5:21-43)

40Kwakati Jesu ebuya mbunga we bathu ukan'amutjila, ngobe bakabe bakanlindila. 41Ipapo koga mmwe nlume unodang'wa kuyi Jairusi, ntungamili we ng'umba ye mitembezelo, kazha kathigama pana Jesu, kankumbila kuti azhe ku ng'umba iye, 42ngobe wakabe ana nkololokadzi nng'ompela koga, mwanadi una makole angabe gumi lina mabili, wakabe efa.

Jesu kati eyenda na Jairusi, mbunga we bathu ukammanikanya. 43Kwakabe kuna nkadzi ipapo wakabe ana makole ali gumi lina mabili egwala bugwele gwe swazwi. Wakabe ashingisa mari wose mu ndapo, koga kusina iye ungampodza. 44Kazha shule kukwe, kabhata lupeto gwe hazu ya Jesu, kukati tjinyolotjo kubhizha malopa kwe nkadzi iwoyo kukama. 45Jesu kabhuzwa eti, “Ndiani wandibhata?”

Kukati bose belandula, Pita kati, “She, bathu ndibo banokubungana bekumanikanya.”

46Koga Jesu kati, “Mmwe wandibhata; ndohwa kuti kuna simba labhuda mundili.” 47Ipapo nkadzi iwoyo kati ebona kuti angashaye zibgwa, kazha etetema ngono kawila mbeli kwa Jesu, mbeli kwe bathu bose kaleba tjaambhatila ne sekwa apodziwa tjinyolotjo. 48Ipapo kati ku nkadzi iwoyu “Nkololokadzi kugalamoyo kuko kwakupodza. Yenda nge mbakiso.”

49Jesu kati atjalebeleka, mmwe nlume kazha edwa ku ng'umba ya Jairusi, nlauli we ng'umba ye mitembezelo kati, “Nkololokadzi uwo wafa, usitjadziyidze n'diyi.”

50Jesu kati ehwa ikoku kati kuna Jairusi, “Usitje, galamoyo koga, ngobe unowopola.”

51Kati eswika pa ng'umba ya Jairusi, kasidumile mmwe kungina naye kuzhe kwa Pita na Johani na Jakubo na tate na mme be mwana. 52Tjibaka itjetjo bathu bose bakabe bekuwa benlilila. Jesu kati, ku bali “Letjani kulila aazofa, koga wakayizela.”

53Bakaseka Jesu mahanya, beziba kuti mwana wafa. 54Koga kambhata nge luboko, kati kunli, “Mwana, muka!” 55Meya iye ikabuya, ngono tjinyolotjo kamilika. Ipapo Jesu kabadwa kati bampe tjimwe aje. 56Bazwadzi babe bakakaabala kwazo, koga Jesu kabadwa kati basitongoyita wabanobudza tjashingikala.

Currently Selected:

Luke 8: KBTP

Highlight

Copy