Luke 7

Jesu unopodza nlanda we nlauli we babhayani be Roma

(Matewu 8:5-13)

1Jesu kati apedza kuleba ikoku kose mu zebe dze bathu, kangina mu nzi we Kapenaume. 2Ikoko kwakabe kuna nlanda we nlauli we babhayani be Baroma wakabe ediwa kwazo ndi tetshi uwe, egwala ali pejo ngofa. 3Nlauli we babhayani kahwa ngekwa Jesu, ndizo katuma bakulu be Bajuta kunli, enkumbila kuti azhe awopodza nlanda uwe. 4Bakati bezha kuna Jesu, bakankumbila kwazo kuti abhatshe nlume iwoyo beti, “Kofanila kuti uthamile iwoyu nlume sa ikoku, 5ngobe unoda itjaba tjedu, kakale wakati bakila ng'umba ye mitembezelo.”

6Ndizo Jesu kayenda nabo. Wakati abe pejo ne ng'umba ye nlauli we babhayani nlauli katuma bazwalani babe kunli eti, “She, musizwidziyidze, ngobe andizolizanila kuti mungangina mu ng'umba yangu. 7Ndizo, ndagala ndazwibona kuti andizolizana kuzha kumuli. Koga lebani dama, ngono nlanda wangu unowopola. 8Ngobe namibo ndi nthu upasi kwe nlayo, ndina babhayani pasi kwangu. Ndoti kuna iwoyu, ‘Yenda,’ kayenda, ati kuna hwouje, ‘Izha,’ kazha. Ndoti ku nlanda wangu, ‘Shinga etji,’ katjishinga.”

9Kukati Jesu ehwa ikoku, kantjenamila, katendebuka kalinga mbunga we bathu bakabe bakantobela, kati ku bali, “Ndolebesa ndoti, andithu atongo bona kugalamoyo kukulu kungapa ne mu Iziraela dumbu.”

10Ipapo bathu bakabe batumwa bakabgwilila ku ng'umba, ngono bakawana nlanda apola.

Jesu emusa mwana we tjilikadzi

11Tjinyolotjo kudwa ipapo, Jesu kayenda ku nzi unoyi Naini, badiyiwa babe ne mbunga nkulu we bathu bakayenda naye. 12Wa kati esedzelela nkoba we nzi iwoyo, kukabe kwakasengegwa kuzhe nthu wakafa wakabe ali iye ega mwana pana mmeyabe, ngono ibo bali tjilikadzi. Mbunga nkulu we bathu unodwa mu nzi iwoyo, wakabe una tjilikadzi iyeyo. 13She kati embona kanhwila zogwadza kati, “Usilile.” 14Ipapo kasedzela kabhata ntengate, ngono ibabo bakabe bakasenga bakama. Iye kati, “Nzhuzha, ndoti ku kuli, muka!” 15Nfi kamuka, katangisa kulebeleka, ngono Jesu kambgwiliza kuna mmeyabe.

16Bose bakatjenama kukulu kwazo, bakakudza Ndzimu beti, “Nlebesambeli nkulu wazha pakati kwedu! Ndzimu wazha kubhatsha bathu bawo.”

17Thawu idzedzi ngekwa Jesu dzikaandama mu ntuthu we Judiya wose ne mituthu ipejo.

Batumwa banodwa kuna Johani we N'dubiki

(Matewu 11:2-19)

18Badiyiwa ba Johani bakabudza Johani ngekwe zwithu zose zwakabe zwiyitiwa ndi Jesu. 19Kadana babili babo, kabatuma kuna She kumbhuzwa woku, “Ndimwi mabe makalindigwa kuzha, kene tilindile mmwe?”

20Kukati balume ibabo bezha kuna Jesu bakati, “Johani we N'dubiki watituma kumuli kumubhuzwa kuti ‘Apa ndimwi mabe makalingiligwa, kene tilingilile mmwe?’ ”

21Nge tjibaka itjetjo Jesu kapodza banji bakabe begwala ne bakabe bakasungwa nge meya mibi, kakale kapofunula banjinji bakabe bali mapofu. 22#Isaya 35:5, 6; Isaya 61:1Ndizo kashandula batumwa kati, “Bgwililani, mubudze Johani tjamabona ne tjamahwa. Mapofu anopofunugwa, zwilema zoyenda, bathu banogwala mapele banopodziwa ne mabhubuzebe anohwa ne bafi banomusiwa ne ndebo mbuya inosumikigwa ku bashayi. 23Wakakombolegwa usingakuthike nge kwangu.”

24Batumwa ba Johani bakati bayenda, Jesu katangisa kulebeleka ne mbunga we bathu ngekwa Johani, ebhuzwa eti, “Ini tjamakayendila kunobona ku tjilambanyika? Apa makabe manobona lushanga gunozunguziwa nge phepo kene? 25Akusakajalo, ini tjamakabe munobona ngono? Makabe manobona nthu wakaambala zwiambalo zwakanaka kene? Bonani, ibabo banoambala zwiambalo zwe ntengo upezhugwi betjila butjilo gwe ipepkhwe ba mu ng'umba dza boshe. 26Ngono ini tjamakayendila kunobona? Makayendila kunobona nlebesambeli kene? Ee, ndomubudza kakale nditi, makabona nkulu pa nlebesambeli. 27#Malaki 3:1Oyu ndiye wakakwagwa nge kukwe kuyi,

“ ‘Ndowotuma ntumwa wangu mbeli kuko,

iye unowolulwamisa zila iyo mbeli kuko.’

28“Ndomudwa nditi, muna ibabo bakazwagwa nge nkadzi, akuna iye nkulu pana Johani; koga iye ntukunu tjose mu bushe gwe Ndzimu nkulu panli.”

29 # Matewu 21:32; Luke 3:12 Bathu bose ne bakhethisi dumbu, bakati behwa matama a Jesu bakaduma kuti zila ye Ndzimu yakalulwama, ngobe bakabe badubikiwa nge dubiko ya Johani. 30Koga Bafarasi ne badiyi be nlayo bakazwilambigwa ndongoloso ye Ndzimu, se bakabe balamba kudubikwa ndiye.

31Jesu kadwilila elebeleka eti, “Ini ngono tjandingafanidzanya bathu ibaba bangwenu? Banongani wali? 32Banonga bana bali gele mu thanga, bedanana, belebesana, beti, ‘Tamulidzila nyele, koga mukasizane, tikamumbila lumbo gwe tjililo koga mukasilile.’ 33Ngobe Johani we N'dubiki wakazha asingaje tjiwunga kene kuli kung'wa nkumbi we zhambi, ngono imwi mukati, ‘Una meya mbi.’ 34Nkololo we Nthu kazha eja kakale eng'wa, ngono moti, ‘Yeli govu ne tjidakwa, nzwalani we bakhethisi ne batjinyi.’ 35Koga butjenjedu golakidzika kuti gwakalulwama nge bana bago.”

Nkadzi una bubi unodila motsha mu makumbo a Jesu

36Mmwe we Bafarasi kadanila Jesu zojiwa, ndizo kayenda ku ng'umba ye Nfarasi iwoyo kagala pasi kaja. 37#Matewu 26:7; Mako 14:3; Johani 12:3Nkadzi wakabe ali ntjinyi mu nzi iwoyo kati ehwa kuyi Jesu unoja mu ng'umba ye Nfarasi, kazhisa tjilongo tjakathamiwa nge bgwe linoyi alabhasita, tjina mafuta anonuhwa zwinozipa. 38Ngono kati ali mile shule kukwe pa makumbo awe elila, katangisa kunyolodza makumbo a Jesu nge mishodzi iye. Ipapo kaabukusha nge mavudzi awe kaaputa kadila mafuta iyawo. 39Nfarasi wakadanila Jesu zojiwa wakati ebona ikoku kati tje mu moyo, “Ha nlume iwoyu abe ali nlebesambeli, unobe eziba kuti ndiani iwoyu unombhata kakale kuti nkadzi iwoyu umbimbi.”

40Jesu kan'dwa kati, “Simoni, kuna tjandoshaka kukubudza.”

Simoni kadabila kati, “Ini n'diyi.”

41Jesu kati, “Mmwe nkolotisi we mari wakabe ekolotiwa nge balume babili. Mmwe wabo ana nlandu naye we madinari e mazana mashanu (500) mmwe ana nlandu naye we madinari e makumi mashanu (50). 42Kwakabe kusina wabo una mari kunlipa, ndizo kabukusha milandu yabo. Ngwenu, ndiupi wabo unowon'da kwazo?”

43Simoni kashandula eti, “Ndobona kuti unowodiwa kwazo nge wakabukushigwa nlandu nkulu.”

Jesu kati, “Wabona zubuyanana.” 44Ipapo kashanduka kalingisana na iwoyo nkadzi, ngono kati kuna Simoni, “Apa unobona nkandzi iwoyu, kene? Ndazha mu ng'umba iyo, auzondipa vula kuti ndingule makumbo, koga iye wangudza makumbo angu nge mishodzi iye, kaabukusha nge mavudzi awe. 45Auzotongoti undidumilisa ukandiputa koga iwoyu nkadzi, kudwa mu tjibaka tjandangina, aazotongo letja kuputa makumbo angu. 46Auzodila nsholo wangu mafuta, koga iye wadila mafuta anonuhwa zwinozipa mu makumbo angu. 47Ndizo, ndokubudza nditi, zwibi zwizwe zose zwazwiibhatigwa, ndizo walakidza ludo bukulu. Koga iye wazwiibhatigwa kutukununu, una ludo butukununu.”

48Ipapo Jesu kati ku nkadzi iwoyo “Zwibi zwizo zwazwiibhatigwa.”

49Ndizo bamwe bakabe beja naye bakatangisa kulebeleka tjekwabo beti, “Ndiani iwoyu unozwiibhatigwa zwibi?”

50Jesu kati ku nkadzi iwoyo, “Kugalamoyo kuko kwakutjidza, yenda nge kunyalala!”

Currently Selected:

Luke 7: KBTP

Highlight

Copy