Jakubo 1

1 # Matewu 13:55; Mako 6:3; Mishingo 15:13; Bagalatiya 1:19 Ndimi Jakubo nlanda we Ndzimu ne wa She Jesu Kirisiti. Ku njudzi dzili gumi lina mbili dze Iziraela#1:1 njudzi…Iziraela: Kodwiwa, “Bakirisiti bose mu shango.” dzakaandama mu shango, ndodumilisa!

Galamoyo ne butjenjedu

2Zwikamu zwangu, shathani ha muzwiwana muli mu ndiko dzakasiyana. 3Ngobe moziba kuti kulikiwa kwe bugalimoyo gwenyu kozhisa kudzikitadza. 4Muletje kudzikitadza ikoku kuwidze nshingo nge buzhalo. 5Ha mmwe wenyu eshaka butjenjedu gwe kudzimu, ngaakumbile ku Ndzimu, ngobe unopa mmwe ne mmwe nge sununguko usingakayikanye. 6Koga ha ekumbila agalebgwe kuti unowopiwa, asidudumwe, ngobe ha edudumwa, unonga duthu le vula ye gungwa linotutudzigwa kumwe ne kumwe nge phepo. 7-8Nthu wakajalo, una mikumbulo mibili, unoyenda edudumwa mu mishingo iye, asialakane kuti ungaamutjila tjimwe muna She.

Fumwa ne bushayi

9Ikamu tjisina tjatjo ngatjishathile kuti Ndzimu watjikudza. 10#Isaya 40:6, 7Ikamu tjakafuma naitjo ngatjisihwe zogwadza ha Ndzimu atjiyisa pasi. Ngoti unoloba se luba le bushwa, 11ngobe zhuba lobhuda nge kupisa kwalo kukulu, ngono likapisa bushwa, luba likawa, bubuya gwalo gukapela. Butjilo gwe nfumi gowolobabo nge zila yakajalobo, atjakanginikana nge fumwa iye.

Kulikiwa

12Wakakombolegwa nthu unodzikitadza mu ndiko, nge kuti ha alikiwa kakunda, mbhayilo uwe unowobe butjilo gusingapele, Ndzimu gwawakagadzabgwe banouda. 13Kushete unoti ha elikwa kati, “Ndolikwa nge Ndzimu.” Ngobe Ndzimu aungalikwe nge bubi naiwo awuna nthu waunolika. 14Koga nthu mmwe ne mmwe unolikiwa ha eteyiwa kakale ewongiwa nge njemulo dzidze dzakabipa. 15Njemulo dzoti dzatjiwanda dzikazwala tjibi, tjibi tjoti tjakula tjikazwala lufu.

16Musitongotjebegwa zwikamu zwangu zwinodika. 17Tjipo tjimwe ne tjimwe tjibuyanana, tjakanaka, tjodwa pezhugwi, kuna ibo Tate be tjedza tje nyenyedzi ne mwedzi ibo basingashanduke se mitutshi. 18Nge kuda kwawo wakatibumba nge dama le malebeswa, kuti ndizo tibe iswi mitjelo yekutanga mu zwibumbiwa zwawo zose.

Kuhwa dama ne kulondolodza mishingo

19Bhatani matama iyawa zwikamu zwinodika. Muzwidiye kuhwilila musingatjimbidzile kulebeleka kene kugwadzamoyo. 20Ngobe kugwadzamoyo kwe nthu akutoshinga ndulamo ye Ndzimu. 21Ndizo thubukanani ne shambgwa yose ne bubi gose gunowanda, ngono muzwiyise pasi muamutjile dama linodzwagwa nge Ndzimu, linotubula kumutjidza.

22Koga shingani tjinolebgwa nge dama, musingazwitjengedze nge kuhwilila koga. 23Ngobe ha kuna unohwilila dama, koga asingashinge tjalinoleba, unonga nthu unolinga tjiso tjitje mu iponi, 24nge kuti unozwibona, ngono kayendazwe kati tjinyolotjo kakangang'wa kuti wazwibona akatini. 25Koga iye una njele nge nlayo iwo wakapelela unosunungula bathu, ngono eutobelela, asinga kangang'we tjaahwa koga etjilondolodza, unowokombolegwa muna tjaanothama.

26Ha kuna mmwe pakati kwenyu ezwidwa eti nnamati we Ndzimu, ngono eti elebeleka kasishale matama, unozwitjengedza mu moyo, kunamata kukwe akuna nshingo. 27Kunamata kwakalulwama kusina shambgwa mu mesho e Ndzimu, kakale bali Tate, ndi woku: kubhatsha siyang'wa ne tjilikadzi mu kuhwa zogwadza kwabo nenge kugala kuzhe kwe shambgwa ye shango.

Currently Selected:

Jakubo 1: KBTP

Highlight

Copy