Kutangisa 47

1Josefa kayenda kanobudza Faro eti, “Tate bangu ne bakulu bangu ne pkhwizi dzabo ne ng'ombe ne tjimwe ne tjimwe bazha bedwa ku shango ye Kanana ngono baku Gosheni.” 2Katola bali bashanu be bakulu babe kabayisa kuna Faro. 3Faro kababhuzwa kati, “Nshingo wenyu ini?” Ibo bakadabila beti, “Ti bathuwi be pkhwizi ne mbudzi sa botate bedu bakabe bali bathuwi.” 4Bakabe beti kuna Faro, “Tazha kowokumbila kugala mu shango yenyu ngoti bhamba ligulu ku Kanana, zwithuwo zwedu azwina mafulo. Ndizo tomukumbila muletje tigale mu Gosheni.” 5Faro kadwa Josefa kati, “Tate babo ne bakulu babo bazha ku kuli, 6ngono shango ye Egipiti unoibona, gadza tate babo ne bakulu babo mu ntuthu mbuya we shango. Ubagadze mu Gosheni. Ha ili kuti unoziba kuna bamwe mu bali banotubula bali majatu uthame kuti babe batjengeti be zwithuwo zwangu.”

7Ipapo Josefa kazhisa tate babe Jakubo kuna Faro. Jakubo kakombolela Faro, 8Faro kambhuzwa eti, “Muna makole mangana?”

9Jakubo kadabila Faro eti, “Makole e kutjila kwangu ndiyenda yenda mu shango i zana lina makumi matatu (130), makole angu mafupi muna a bobatategulu bangu koga akabe makole akasima anolema.” 10Jakubo kakombolela Faro kabhuda kayendazwe. 11Ndizo Josefa kagadza tate babe mu shango ye Egipiti, kabapa thundu mu magalo mabuya e shango, mu ntuthu we Ramesesi sekwa akabe adwiwa ndi Faro. 12Josefa kapa tate babe ne bakulu babe ne phuli yose ye nsha wa tate babe zojiwa kuyenda nge kuti bangana.

Bhamba

13Kwakabe kusina zojiwa mu shango yose ngoti bhamba lakabe lili gulu, shango ye Egipiti ne Kanana dzakabe dzapaladziwa nge bhamba. 14Josefa kakubunganya mari wose akabe angawang'wa mu Egipiti ne mu Kanana kutenga mathunde ngono kaayisa ku ng'umba ya Faro ye bushe. 15Kukati mari e bathu be Egipiti nebe Kanana abapelela, Baegipiti bose bakazha kuna Josefa bakati kunli, “Utipe zojiwa. Apa tingafa wakatilinga? Mari edu apela.”

16Josefa kabadabila eti, “Zhisani zwithuwo zwenyu, ndowotenganya zojiwa nge zwithuwo zwenyu se mari enyu apela.” 17Ndizo bakazhisa zwithuwo zwabo kuna Josefa, iye kabapa zojiwa etetshanya nge mbizi dzabo ne pkhwizi dzabo ne mbudzi ne ng'ombe dzabo ne madonki. Kapitsha gole ilelo ebapa zojiwa etenganya nge zwithuwo zwabo.

18Gole ilelo likati lapela, bakazha kunli muna linolitobela bakati, “Atingasumbikile tetshi zibo yekuti mari edu akapela ne zwithuwo zwedu zwabe zwenyu, akutjina tjatisalila tetshi wedu kuzhe kwe mibili yedu ne minda yedu. 19Tingafa ne bana bedu ne minda yedu ingabe makula makatilinga kene? Mutitenge iswi ne minda yedu, mutetshanye nge zojiwa, iswi ne minda yedu towobe balanda ba Faro. Mutipe mbewu kuyita kuti titjile tisife nge zhala ne kuti minda isibe makula.”

20Ndizo Josefa katenga minda yose mu Egipiti ikabe ya Faro. Baegipiti bose bakatengesa minda yabo ngoti bhamba lakabe lakababangalalila. Minda yose ikabe ya Faro. 21Josefa kathama bathu bakabe balanda mu mizi Egipiti yose. 22Ne kwakajalo minda yaasakatenga nge ye bapirisiti ngoti ibo bakabe bana gobe kudwa kuna Faro, ndizo bakabe bana zojiwa zwakalizana. Ndizo basakatengesa minda yabo wali. 23Ipapo Josefa kadwa bathu kati, “Nasi ndamutenga ndimutengela Faro, mbewu eyi dzwalani mu minda. 24Ngono nge tjibaka tje kuvuna, saka le bushanu mu masaka ali mashanu mulipe Faro. Manna asala mubige mbewu, kumwe zwibe zojiwa zwenyu ne be misha yenyu.”

25Bathu bakashandula beti, “Matitjidza, nge kube ne ngoni mutili, ha kushathisa tetshi wedu, towobe balanda ba Faro.” 26Ndizo Josefa kathama kuti kube nlayo mu Egipiti, na nasi utjashinga, saka le bushanu mu masaka ali mashanu nge la Faro. Minda dze bapirisiti koga ndidzo dzakabe dzisidza Faro.

Kukumbila kwa Josefa kwe bupelo

27Baiziraela bakagala mu shango ye Egipiti mu ntuthu we Gosheni. Bakathama fumwa ikoko bakabe ne mbeleko bakawanda kukulu kwazo. 28Jakubo wakagala makole ali gumi lina ali kutendeka mu shango ye Egipiti. Makole wose e bupenyu gugwe makole ali zana lina makumi manna ana ali kutendeka (147). 29#Kutangisa 49:29-32; 50:6Tjibaka tjekuti Iziraela afe tjikati tjiswika kadana nkololo uwe Josefa kandwa kati, “Ha ndiamutjilika mukuli milidza luboko gugo utune kuti unowondithamila buthu ne lebeswa. Usindibiganye mu Egipiti. 30Ha ndifa nditobela botate bangu, undisenge undiduse mu Egipiti, unondibiganya pabakabiganyiwa.” Josefa kashandula eti, “Ndowothama sekwa maleba.” 31Iziraela kabe eti, “Tuna.” Ipapo Josefa katuna. Iziraela kakotamisa nsholo uwe pa bulawo gugwe.

Currently Selected:

Kutangisa 47: KBTP

Highlight

Copy