Kutangisa 46

Jakubo ne nsha uwe banoyenda ku Egipiti

1Ndizo Iziraela katola kose kwaakabe anako katola gwendo kanoti ku Bheerisheba, ipapo kapisila Ndzimu wa tate babe Isaki zwibhayilo. 2Ndzimu ukalebeleka na Iziraela nge mbono mu busiku ukati, “Jakubo! Jakubo!”

Kadabila eti, “Ndipano.”

3Ndzimu ukabe uti, “Ndimi Ndzimu, Ndzimu wa tate babo. Usitje kuyenda ku Egipiti, ngoti ndowokuthama ukabe itjaba tjikulu ikweno. 4Ndowoyenda nawe ku Egipiti ngono ndowokubuza ngeno kakale. Tjiazha tja Josefa tjowozhalila mesho awo nsi waunowofa.”

5Ipapo Jakubo kamilika mu Bheerisheba kawila mu zila. Bana babe bakantathisa ne bana babo ne bakadzi babo mu dzikoloyi dzakabe dzatumigwa ndi Faro kubasenga. 6#Mishingo 7:15Bakayenda ne zwithuwo zwabo ne thundu dzabo dzabakashaba mu Kanana, ngono Jakubo ne bana babe bose bakayenda ku Egipiti. 7Katola bakololo babe ne zwizekugwana zwizwe ne bakololokadzi, bose be ludzi gugwe. 8Mazina e bana ba Iziraela bakayenda ku Egipiti ndiawa: Rubheni mbano ya Jakubo. 9Bakololo ba Rubheni ndi Hanoki na Phalu na Hezironi na Khami. 10Bakololo ba Simiyoni ndi Jemuyele na Jamini na Ohadi na Jakini na Zohari na Shawulu mwana we nkadzi we Tjikanana. 11Bakololo ba Levi ndi Geshoni na Kohati na Merari. 12Bakololo ba Juda ndi Eri na Onani na Shela na Perezi na Zera (koga Eri wakafila mu shango ye Kanana). Bakololo ba Perezi ndi Hezironi na Hamuli. 13Bakololo ba Isakari ndi Tola na Lobe na Puva na Shimironi. 14Bakololo ba Zebuluni ndi Seredi na Eloni na Jahileeli. 15Ibaba ndibo bakololo bakazwagwa ndi Liya na Jakubo batji ku Padani Aramu ne nkololokadzi uwe Dina. Bakololo ne bakololokadzi ibaba bose, bakabe bali makumi matatu ana bali batatu (33).

16Bakololo ba Gadi ndi Zefoni na Hagi na Shuni na Ezibhoni na Eri na Arodi na Areli. 17Bakololo ba Asheri ndi Imuna na Ishuva na Ishivi na Bheriya. Hazwadzi yabo yakabe ili Sera. Bakololo ba Bheriya ndi Heberi na Malekhieli. 18Ibaba bakabe bali bana ba Jakubo na Zilipa, iye wakabe apiwa Liya ndi Labani. Bakabe bali gumi lina bali tathatu bose.

19Bakololo ba Jakubo ne nkadzi uwe Rahele ndi Josefa na Bhenjamini. 20#Kutangisa 41:50-52Mu Egipiti Josefa na Asenati nkololokadzi wa Potifera mpirisiti we Oni bakazwala Manase na Ifureimi. 21Bakololo ba Bhenjamini ndi Bhela na Bhekeri na Ashebheli na Gera na Naamani na Ehi na Roshi na Mupimu na Hupimu na Aridi. 22Ibaba bali gumi lina bali banna ndibo bakololo ba Jakubo na Rahele.

23Nkololo wa Dani ndi Hushimu. 24Bakololo ba Nafutali ndi Jahitsaeli na Guni na Jezeri na Shilemu. 25Ibaba bakololo ba Jakubo na Bhiliha iye Labani waakapa nkololokadzi uwe Rahele, bose bali kutendeka. 26Bose bakayenda ku Egipiti na Jakubo, ibabo bakabe bali bana babe kusingabagwe bakadzi be bana babe, bakabe bali makumi matathatu ana bali tathatu (66). 27#Mishingo 7:14Bana ba Josefa bakazwaligwa mu Egipiti bakabe bali babili. Ndizo be nsha wa Jakubo bose bakayenda ku Egipiti, bakabe bali makumi ali kutendeka (70).

Jakubo ne be nsha uwe ku Egipiti

28Jakubo katuma Juda kuyenda mbeli kuna Josefa kunokumbila Josefa kunobashanganidza ku Gosheni. Kwakati beswika mu ntuthu we Gosheni, 29Josefa katatha koloyi iye kayenda ku Gosheni kunoshanganidza tate babe Iziraela. Kati eswika kagumbatila tate babe katola tjibaka elila akabagumbatila. 30Iziraela kadwa Josefa kati, “Ngwenu ndingatjifa zwangu ngoti ndakuzwibonegwa kuti utjatjila.”

31Josefa kabe elebeleka ne bakulu babe ne nnung'una uwe na bose be nsha wa tate babe eti, “Ndowoyenda anolebeleka na Faro nditi, ‘Bakulu bangu ne banung'una bangu ne nsha wa tate bakabe begala mu shango ye Kanana bazha kundili. 32Ibaba bathu bathuwi, bana zwithuwo, bazha ne pkhwizi dzabo ne ng'ombe ne tjimwe ne tjimwe tjabanatjo.’ 33Ha Faro emudana emubhuzwa eti, ‘Nshingo wenyu ndiwupi?’ 34Mudabile muti, ‘Balanda benyu bakakula bali bathuwi be zwithuwo kudwila mu butukununu gwedu kuswikila ngwenu, sa botate bedu.’ Ha majalo mowodumigwa kugala mu ntuthu we Gosheni.” Josefa wakaleba ikoku ngoti Baegipiti banoyilana ne balisi.

Currently Selected:

Kutangisa 46: KBTP

Highlight

Copy