Mishingo 11

Mbiko ya Pita ku Gubungano liku Jerusalema

1Batumwa ba Jesu ne zwikamu mu Judiya bakahwa kuti Bezwitjaba na ibobo bakaamutjila dama le Ndzimu. 2Ndizo Pita wakati etathila ku Jerusalema ibabo bakabe beda buthumbi bakan'gongobola 3beti, “Ini wangina mu ng'umba dze bathu basakathumbigwa ukaja nabo?” 4Pita katangisa kutjenesa tjimwe ne tjimwe ku bali nge buzhalo sekwa kwakashingikala eti:

5“Ndakabe ndili mu nzi we Jopa nditembezela, abona mbono. Ndakabona tjimwe tjinonga jila gulu gulu tjidelusiwa kudwa kudzimu nge midzibo yatjo minna, ngono tjikazha pasi pandakabe ndilipo. 6Ndakalinga mukati nge njele, abona phuka ne zwibandana ne zwibumbiwa zwinosoba na pasi ne nyuni dzinowuluka. 7Ipapo ahwa hwi lindidwa liti, ‘Milika Pita, bhaya uje!’ 8Koga ashandula nditi, ‘She nge malebeswa andingaje! Akuna tjimwe tjina shambgwa kene tjakatemapala tjakatongo ngina mu nlomo wangu!’ 9Koga hwi likalebeleka kakale gwe bubili lidwa kudzimu liti ‘Ndzimu tjawakatjenapadza usitjidane uti ate tjili tjibuyanana.’ 10Ikoku kwakashingikala katatu, ngono kose kukadwa kukwebegwa kudzimu kakale. 11Ipapo balume batatu bakabe batumwa kundili bedwa ku Sizariya bakaswika pa ng'umba yatakabe tili muili. 12Meya ikandibudza kuti ndisitje kuyenda nabo. Zwikamu izwezwi zwitathatu na izo zwikayenda nami, ngono tikangina mu ng'umba ye nlume iwoyo. 13Ngono katibudza sekwa akabona ntumwa we kudzimu ali mile mu ng'umba iye, ngono eti, ‘Tumila nthu ku Jopa kuna Simoni unodang'wa kuyi Pita. 14Unowomuzhisila matama anowoti iwe ne nzi uwo mukatjidziwa.’ 15Ati nditangisa kulebeleka Meya yakayengemala ikadelukila mubali sekwa yakadelukila mutili mu kutangisa. 16#Mishingo 1:5Ipapo ndakaalakana She tjabakaleba beti, ‘Johani wakadubika nge vula koga imwi mowodubikiwa nge Meya yakayengemala.’ 17Ndizo ha kuli kuti Ndzimu wakabapa tjipo itjo zwatjo tjawakatipa iswi takagalamoyo muna She Jesu Kirisiti, ndakabe ndili ani imi kukumbula kunyanyayidza Ndzimu kene?”

18Bakati behwa ikoku bakanyalala. Bakakudza Ndzimu beti, “Bezwitjaba naibobo Ndzimu wabapa kushandukila kuuli kubapa butjilo.”

Gubungano ku Antiyoki

19 # Mishingo 8:1-4 Koga ibabo bakabe bapaladziwa nge kudziyidziwa kwakakula pakukikithidziwa kwa Sitifani bakayenda kunoti ku Fenikiya ne Sipuro ne Antiyoki besumikila dama ku Bajuta boga. 20Koga bamwe babo, balume banodwa ku Sipuro ne Sirene bakayenda ku Antiyoki bakatangisa kusumikilabo ku Bagiriki ngekwa She Jesu. 21Luboko gwa She gwakabe gunabo, ngono bathu banjinji kwazo bakagalamoyo bakashandukila kuna She.

22Thawu ngekwa ikoko dzikaswika mu zebe dze gubungano liku Jerusalema ngono bakatuma Bhanabhasi ku Antiyoki. 23Wakati eswika ebona ngoni dze Ndzimu kashatha kabakulumbidza bose kudwilila begalamoyo muna She nge mazwimisilo asingazunguzike. 24Wakabe ali nlume wakalulwama ali zhele Meya yakayengemala nenge kugalamoyo, ngono bathu banjinji bakapaphidzika muna She.

25Ipapo Bhanabhasi kayenda ku Taso kunoshaka Saulo, 26ngono kati an'wana kazha naye ku Antiyoki. Ndizo gole lose Bhanabhasi na Saulo bakabe beshangana ne gubungano, ngono bakadiya bathu banjinji. Bagalimoyo bakatangisa kudang'wa Bakirisiti ku Antiyoki.

27Mu tjibaka itjetjo balebesambeli bamwe bakadwa ku Jerusalema beyenda ku Antiyoki. 28#Mishingo 21:10Mmwe wabo unodang'wa kuyi Agabho, kamilika, ngono nge Meya kaleba kuti bhamba gulu lowozhala mu shango yose. Oku kwakashingikala nge tjibaka tje bushe gwa Kilaudiyo. 29Badiyiwa bakazwimisila kuti mmwe ne mmwe wabo unowotumilila tjaangatubula kubhatsha zwikamu zwakabe zwigala mu Judiya. 30Oku bakakuthama, ngono bakabhatisa Bhanabhasi na Saulo zwipo zwabo zwinoyenda ku bakulu be gubungano.

Currently Selected:

Mishingo 11: KBTP

Highlight

Copy