Mishingo 10

Pita na Koneliyo

1Kwakabe kuna mmwe nlume mu Sizariya edang'wa Koneliyo, wakabe ali nlauli we babhayani be Baroma bali zana mu gupo lakabe lidang'wa “Gupo le Italiya.” 2Wakabe ali nlume unotja Ndzimu nge lebeswa iye ne nsha uwe wose, wakabe epa basheti zwipo akasununguka etembezela Ndzimu misi yose. 3Kabona mbono limwe zhuba mu matewuko nge tjibaka tje butatu, muili wakabona zubuyanana ntumwa we kudzimu engina kunli eti, “Koneliyo!”

4Kalingisisa ntumwa ngotja, ngono kati, “Ini she?”

Ntumwa kadabila eti, “Ndzimu unoshathisiwa nge mitembezelo iyo nenge mishingo iyo ye kupa bashayi ngono unokudabila. 5Ndizo ngwenu tuma balume ku Jopa kunodana nlume unodang'wa Simoni Pita. 6Unogala mu ng'umba ye nsuki we makukuta unoyi Simoni we nzi upejo ne gungwa.” 7Ntumwa we kudzimu wakalebeleka naye kati atjiyenda, Koneliyo kadana babili be balanda babe ne mbhayani wakazwipa kudwa muna ibabo bakabe benshinga. 8Ndizo kati ababudza tjimwe ne tjimwe tjashingikala, kabatuma ku Jopa.

9Tjimuka bakati bali mu zila yabo babepejo ne Jopa, Pita katathila pezhugwi kwe ng'umba nge tjibaka tje masikati kunotembezela. 10Kabhakhwa nge zhala, ngono kayemula kuja, koga zojiwa zwakati zwitjalulwamisiwa, kabona mbono. 11Kabona kudzimu kwakazhuka, ngono tjimwe tjideluka tjilingika se jila gulu gulu lidelusigwa pasi nge midzibo yalo minna. 12Mulili kwakabe kuna njudzi dzose dze phuka ne zwinosoba pasi ne nyuni dzinowuluka. 13Hwi likati kunli, “Milika, Pita, ubhaye uje!”

14Koga Pita kati, “She, nge malebeswa andingake! Andithu aja tjimwe tjakatemapala kene tjisi tjibuyanana.”

15Hwi likalebeleka naye kakale gwe bubili liti, “Ndzimu tjawakatjenapadza usitjidane tjisi tjibuyanana.” 16Ikoku kwakashingikala katatu, ngono ipapo jila ilelo likabe libgwilila pezhugwi.

17Pita kati atjakaabadziwa nge kuti mbono yaabona ingabe idwani, bonani balume bakabe batumwa ndi Koneliyo bakati babhuzwa kuti ng'umba ya Simoni iponi bakabe babe mile pa nkoba. 18Bakapindisa bakabhuzwa kene, “Simoni unodang'wa Pita egala ipapo?”

19Pita kati atjakumbula ngekwe mbono, Meya ikati, “Kuna balume batatu banokushaka. 20Ndizo milika udeluke, ngono usizeyeze kuyenda nabo, ngobe ndabatuma.” 21Ndizo Pita kadeluka kati ku balume ibabo, “Ndimi wamunoshaka ini tjamuzhisa pano.”

22Bakadabila beti, “Nlauli we babhayani bali zana, Koneliyo, watituma. Nlume we nlulwami unonamata Ndzimu unotetiwa kwazo nge Bajuta bose. Ntumwa we kudzimu wakayengemala wakambudza kuti akukokele ku ng'umba iye, kuti ndizo ahwe tjaunoleba.” 23Pita kadanila balume ibabo mu ng'umba bakabe bezi babe.

Tjimuka kamilika kayenda nabo; ngono zwimwe zwikamu mu Jopa zwikayenda naye. 24Tjimuka bakaswika mu Sizariya, kwaakabe akalindigwa ndi Koneliyo ne makamu ne bazwalani baanoda baakabe akoka. 25Pita kati engina Koneliyo kanshangamidza, kawila pa makumbo awe ennamata. 26Koga Pita kammilidza. Kati kunli, “Milika, namibo ndi nthu koga.” 27Pita kadwilila elebeleka na Koneliyo, ngono kangina mu ng'umba kwaakawana bathu banjinji bakakubungana. 28Kati ku bali, “Imwi nge kwenyu moziba kuti ate kuli mu nlayo kuti Njuta ashangashangane, kene akumbe mmwe we itjaba tjipoga. Koga Ndzimu wakandilakidza kuti ndisitole mmwe nthu se wakatemapala kene se usi mbuyanana. 29Ndizo wakati unditumila bathu iwe Koneliyo, azha ndikasilambe. Ndizo ngwenu ndobhuzwa tjawandidanila.”

30Koneliyo kati, “Kwakabe kuli nge tjibaka itjetji mazhuba matatu akapinda, ndakabenditembezela mu ng'umba yangu mu tjibaka tje awara ye butatu mu matewuko. Tjinyolotjo nlume wakaambala zwiambalo zwinopenya kama mbeli kwangu. 31Ngono kati, ‘Koneliyo, Ndzimu wahwa ntembezelo uwo, ne zwipo zwizo ku bashayi wazwikumbula. 32Tuma nthu ku Jopa, ku nlume unodang'wa Simoni Pita. Ugele mu nzi wa Simoni, nsuki we makukuta, unogala pejo ne gungwa!’ 33Abe ndokutumila bathu tjinyolotjo, ngono wathama buthu ukazha. Ngwenu tipano tose mbeli kwe Ndzimu, takalindila kuhwa tjimwe ne tjimwe She tjabakudwa kuti utjilebe.”

Ndebeleko ya Pita

34 # Matama 10:17 Pita kadwa nlomo kati, “Ngwenu ndohwisisa kuti malebeswa Ndzimu autoshalaula. 35Koga mu njudzi dzose, mmwe ne mmwe unotja Ndzimu ethama tjakalulwama, Ndzimu unon'amutjila. 36Unoziba dama Ndzimu lawakatumila ku Iziraela, hwusumikila ndebo mbuya ye kunyalala ndi Jesu Kirisiti, iye ndi She wa bose. 37Ndilo dama lakasumikigwa mu shango yose ye Judiya, kutangisa mu Galili shule kwe kudubikwa kwakadiyiwa ndi Johani; 38Ndzimu sekwa wakashalula Jesu we Nazareta nge Meya yakayengemala nenge simba; sekwa akayenda kumwe ne kumwe eshinga ndulamo, epodza bose bakabe bakatshambilidziwa ndi Satani, ngobe Ndzimu wakabe unaye. 39Iswi ti batendeki be tjimwe ne tjimwe tjaakathama mu shango ye Bajuta ne mu Jerusalema. Bakambulaya nge kunlembeledza mu nti. 40Koga Ndzimu wakammusa mu bafi nge zhuba le butatu, ngono ukathama kuti aboneke, 41kusi ku bathu bose, koga ku tili iswi takashalugwa nge Ndzimu tili batendeki, iswi bakaja naye tikang'wa naye shule kwe amuka mu bafi. 42Ngono wakatilaya kuti tisumikile ndebo mbuya ku bathu ne kuti titendeke kuti ndiye wakabigwa nge Ndzimu kube nsumikilisi we batjili ne bafi. 43Balebesambeli bose banopa butendeki kuti, mmwe ne mmwe unogalamoyo muna Jesu unowozwiibhatigwa zwibi zwizwe nge simba le zina lile.”

Bezwitjaba banoamutjila Meya yakayengemala

44Pita kati atjaleba ikoku, Meya yakayengemala ikadelukila pezhugwi kwa bose bahwa dama. 45Bagalimoyo bakathumbigwa bakabe bazha na Pita bedwa ku Jopa bakatjenamila kuti Ndzimu wadila tjipo tjawo tje Meya yakayengemala muna Bezwitjaba, 46ngobe bakabahwa belebeleka nge ndimi dzipoga be kudza Ndzimu. Pita kalebeleka kati, 47“Ibaba bathu baamutjila Meya yakayengemala, koga saswi. Apa uyapo kene ungadzibila kuti badubikwe nge vula?” 48Ndizo kalaya kuti badubikiwe nge zina la Jesu Kirisiti. Ipapo bakankumbila kuti atongo gala nabo mazhuba mashomanana.

Currently Selected:

Mishingo 10: KBTP

Highlight

Copy