Mishingo 1

Teofilo unodika

1 # Luke 1:1-4 Mu lukwalo gwangu gwe kutanga, Teofilo, ndakakwala ngekwe zwithu zose Jesu zwaakatangisa kuthama kakale kazwidiya, 2kuswikila zhuba laakatolegwa pezhugwi kudzimu, asinopa batumwa baakabe ashalula ndayo nge Meya yakayengemala. 3Shule kwe kudziyila kukwe wakazwilakidza ku balume ibabo ne butendeki bunjinji gwe kuti unotjila. Wakabazwilakidza mu tjibaka mazhuba ali makumi manna, ngono kalebeleka nabo ngekwe bushe gwe Ndzimu. 4#Luke 24:49Ngono wakati anabo, kabadwa kati basibhude mu Jerusalema, koga balindile tjabakagadziwabgwe ndi Tate, sekwa akaleba eti, “Makahwa ndimi, 5#Matewu 3:11; Mako 1:8; Luke 3:16; Johani 1:33ngoti Johani wakabe edubika nge vula, koga mu mazhuba mashomanana anozha imwi mowodubikwa nge Meya yakayengemala.”

Jesu unotolegwa kudzimu

(Mako 16:19-20; Luke 24:50-53)

6Ndizo batumwa bakati bakubungana, bakabhuzwa Jesu bakati, “She, apa mowobgwiliza bushe mu Iziraela mu tjibaka itjetji kene?”

7Jesu kati ku bali, “Akute kuli kwenyu kuziba misi ne zwibaka zwakabigwa ndi Tate nge simba labo. 8#Matewu 28:19; Mako 16:15; Luke 24:47, 48Koga moamutjila simba ha Meya yakayengemala izha mu muli, ngono mowobe batendeki bangu mu Jerusalema ne mu Judiya yose ne Samariya ne ku phelelo dze shango.” 9#Mako 16:19; Luke 24:50, 51Shule kwe kuleba ikoku, wakatolegwa pezhugwi kudzimu bakanlinga, ngono gole likan'dusa mu mesho abo.

10Bakati batjakalingisisa pezhugwi ha iye eyenda, tjinyolotjo balume babili bakaambala butjena bakama pabali 11bakabe beti, “Balume be Galili mumilileni ipapo makalinga pezhugwi? Jesu iwoyu, watogwa mu muli eyisiwa kudzimu, unowobuya nge zila iyo zwayo yamabona eyenda ku Ndzimu ndiyo.”

N'galithaka wa Judasi

(Matewu 27:3-10)

12Ipapo batumwa bakabgwilila ku Jerusalema bedwa ku Dombo le Mitoba, lipejo ne Jerusalema kungabe gwendo gwe Sabata#1:12 gwendo gwe Sabata: Gwendo gwe bulefu gungabe khilomitha ing'ompela gwakabe gudumigwa nge nsi we Sabata kudwa ku Jerusalema. 13#Matewu 10:2-4; Mako 3:16-19; Luke 6:14-16Bakaswika bakatathila pezhugwi ku ng'umba yabakabe begala. Kwakabe kuli Pita na Johani na Jakubo na Enduru na Filipo na Tomasi na Bhatolomeo na Matewu na Jakubo nkololo wa Alifeo na Simoni Nzeloti#1:13 Nzeloti: Mmwe we gubungano le dumo ye Bajuta mu lubaka gwa Jesu. Bazeloti bakabe begwila sununguko ye Bajuta mu Baroma. na Judasi nkololo wa Jakubo. 14Bose ibaba bakazwimisila kutembezela bali moyo nng'ompela, kose ne bakadzi babakabe banabo na Mariya mme ba Jesu ne banung'una babe.

15Mu mazhuba iyawo Pita kamilika kama pakati kwe bagalimoyo (bakabe bali mbunga unolizana zana lina bali makumi mabili 120) 16kabe eti, “Zwikamu zwangu, matama e hwalo dze Ndzimu akalebgwa nge Meya yakayengemala nge nlomo wa Dafite ngekwa Judasi iye wakabe ali ntungamili wa ibabo bakasunga Jesu akafanila kushingikala. 17Judasi wakabe ali mmwe wedu, ngobe wakabe ashalugwa kube ne gobe mu nshingo iwoyu.” 18#Matewu 27:3-8Ngono ngwenu Judasi wakatenga shango nge mari iyawa aakawana nge nshingo uwe wakabipa, iko kwaakawila nge nsholo mu kufa kukwe kaphutukana mabula awe wose kabhudila pazhe. 19Bathu bose banogala mu Jerusalema bakahwa nge kwako, ndizo nge lulimi gwabo bakadana shango iyeyo Akelidama, kunodwa kuti, Shango ye Malopa.

20 # Njimbo 69:25; Njimbo 109:8 “Ngobe kwakakwagwa mu lukwalo gwe Njimbo kuyi,

“ ‘Ng'umba iye ngaibe dongo;

kushete ne unogala muili.’

“Kwakakwagwa kakale kuyi,

“ ‘Mmwe ngaatole mamo awe mu nshingo.’

21 # Matewu 3:16; Mako 1:9; Luke 3:21; Mako 16:19; Luke 24:51 “Ndizo kusheteka kushalula mmwe we balume bakabe banaswi mu tjibaka tjose She Jesu betjila naswi, 22kudwa mu tjibaka tjekudubika kwa Johani kuswikila zhuba Jesu laakatolegwa pezhugwi kudzimu edwa mutili, iwoyo wakafanila abe mmwe wedu ali ntendeki we kumuka kwa She Jesu.”

23Ndizo bakashalula balume babili, Josefa iye wakabe edang'wa Bhasabhasi, kakale edang'wa Jusito, na Matiyasi. 24Ipapo bakatembezela beti, “She, imwi moziba moyo we mmwe ne mmwe, ndizo mutilakidze kuti ndi upi wa ibaba babili wamashalula 25kutola nshingo iwoyu we butumwa wakasiyiwa ndi Judasi eyenda kwaakafanila.” 26Ipapo bakakandila kubona nshalugwa pakati kwe balume ibabo babili, ngono kukawila Matiyasi, ndizo kapapha bali gumi lina nng'ompela.

Currently Selected:

Mishingo 1: KBTP

Highlight

Copy