PROVERBIOS 30

I t'an Agur

1Jiñʌch i subal Agur i yalobil Jaqué tsa' bʌ i sube Itiel yic'ot Ucal. 2Melelʌch ñumen tontojon bajche' yaño' bʌ. Ma'anic c ña'tʌbal yubil. Mach lajalonic bajche' yaño' bʌ winicob mu' bʌ i ch'ʌmbeñob isujm. 3Anto yom c ña'tʌbal. Mach c tajayic i ña'tʌbal jini Ch'ujul Bʌ. 4¿Majqui jini tsa' bʌ letsi ti panchan tsa' bʌ jubi tilel? ¿Majqui tsi' yʌc'ʌ ti' wenta jini ic' cha'an ma'anic mi' ñumel? ¿Majqui tsi' melbe i ti' ja' cha'an cʌchʌl yilal jini ja' che' bajche' ti pisil? ¿Majqui tsi' p'isi pañimil che' ti' cajibal? ¿Chuqui i c'aba'? ¿Chuqui i c'aba' i yalobil? ¿Mach ba a wujilic?

5Sʌc pejtelel i t'an Dios. Lac Yum i mʌctʌjibʌch jini mu' bʌ i yotsañob i bʌ ti' wenta. 6Mach a xʌb otsan a bajñel t'an, ame i yʌq'ueñet a tsico' pusic'al mi xlotet.

7An cha'p'ejl j c'ajtibal. Mach yomic ma' tic'beñon chubʌ wolij c'ajtibeñet. 8Tʌts'beñon lolom jax bʌ yic'ot lot. Mach a wotsañon ti pobre, mach a wotsañon ti rico. Cojach yom ma' wʌq'ueñon cha'an jasʌlon ti jujump'ejl q'uin, 9ame c ñusañet che' ñajonix, ame c sub ¿bac'an tsiquil lac Yum? ame cho'onic, ame cajicon ti xujch' mi pobrejon, ame c p'ajben i c'aba' lac Dios.

10Mach a suben i mul mozo ti' tojlel i yum, ame i p'ajet ame a toj. 11An mu' bʌ i p'aj i tat. An mach bʌ mi' wen pejcan i ña'. 12An mu' bʌ i lon q'uelob i bʌ ti sʌc anquese mach pocbilic loq'uel i bibi'lel. 13An mu' bʌ i chañ'esañob i bʌ. Yujilob ts'a'leya. 14An winicob x'ixicob lajal bʌ i bʌquel i yej bajche' espada. Lajalob i cha'am bajche' alʌ machit cha'an mi' c'uxob jini p'ump'uño' bʌ ti pañimil mach bʌ añobic i chubʌ'an.

15An cha'chajp i pi'ʌlob jini sip. Mi' yʌlob: Anto yom, anto yom, che'ob. An uxchajp mach bʌ anic mi' jastʌyelob ti pejtelel ora yic'ot ja'el i chʌnchajplel mu' bʌ i yʌl mach jasʌlic. 16Jiñobʌch ti chajp ti chajp: I yajñib chʌmeño' bʌ, jini to'ol wa'al bʌ x'ixic, jini lum am bʌ i tiquin ti', yic'ot jini c'ajc. Ti pejtelel ora ma'anic mi' jastʌyel.

17Mi' caj ti chʌmel jini ch'iton mu' bʌ i wajlen i tat mu' bʌ i ts'a'liben i cʌntesʌbal i ña'. Jini xta'jol mi caj i ch'ojch'oben loq'uel i bʌc' i wut. Mi caj i c'uxob i yalob xiye'.

18An uxchajp jini mucul tac bʌ tic wut. An chʌnchajp mach bʌ ña'tʌbilic c cha'an: 19I bijlel jini xiye' ti ic', i bijlel jini lucum ti xajlelol, i bijlel colem barco ti ojlil colem mar, yic'ot ja'el bajche' mi' c'uxbiñob i bʌ jini winic yic'ot i yijñam.

20Jini x'ixic am bʌ i ts'i'lel leco bajche' mi' mel. Mi' ñaj'an, mi' sujcun i yej. Mi' lon al: Ma'anic c mul, che'en.

21Mach tijicñayic mi laj q'uel jini uxchajp. An chʌnchajp mach bʌ cujchic lac cha'an: 22Jini mozo mu' bʌ i cha'len yumʌl, jini tonto bʌ mu' bʌ i yʌq'uentel pejtel chuqui yom, 23jini ts'a'lebil bʌ xch'oc che' añix i ñoxi'al, yic'ot ja'el jini xmozo bʌ x'ixic mu' bʌ i wa'chocontel ti co'ʌl ti' wenta i yum.

24An chʌnchajp c'ax biq'uit tac bʌ ti lum, pero ñumen an i pusic'al bajche' winicob. 25Jini xiñich' anquese mach p'ʌtʌlic mi' tempan i bʌl i ñʌc' che' ti' yorajlel ticwal. 26Jini t'ujl anquese mach ch'ejlic mi' mel i yotot ti xajlelol. 27Jini sajc' mach bʌ anic i rey mi' cha'len xʌmbal ti mojt ti mojt. 28Jini p'oc mu' bʌ a chuc ti a c'ʌb mi' yochel ti' yotot tac rey.

29An uxchajp i t'ojol jax bʌ ti xʌmbal yic'ot ja'el an i chʌn chajplel uts'at bʌ mi' majlel. 30Jini bajlum, ñumen cabʌl bʌ i p'ʌtʌlel ti' tojlel bʌte'el, ch'ejl i pusic'al. Ma'anic mi' xoy i bijlel cha'an i pi'ʌlob. 31Jini ajtso' mu' bʌ ti son, jini tat chivo, yic'ot jini rey mu' bʌ i pʌy majlel motolo' bʌ soldadojob.

32Mi tsa'ix a chañ'esa a bʌ cha'an tontojet o mi tsa'ix a ña'ta a mel chuqui mach wenic, tiq'ui a bʌ. 33Melel, jini mu' bʌ i jaxulan lech mi' taj mantequilla. Jini mu' bʌ i tsʌts sijman i ñi' mi caj i loq'uel i ch'ich'el i ñi'. Jini mu' bʌ i xic' mich'ajel mi' tech a'leya.

Currently Selected:

PROVERBIOS 30: ctuBI

Highlight

Copy