EXODO 36

1Bezaleel yic'ot Aholiab, yic'ot pejtelel winicob tsa' bʌ aq'uentiyob i ña'tʌbal yic'ot i ch'ejlel cha'an lac Yum yujilob bajche' yom melol pejtelel jini e'tel tac ya' ti Tabernáculo che' bajche' tsi' yʌlʌ lac Yum, che'en Moisés.

Moisés tsi' tiq'uiyob cha'an ma'anix mi' chʌn ac'ob ofrenda

2Moisés tsi' pʌyʌ Bezaleel yic'ot Aholiab, yic'ot pejtelel winicob tsa' bʌ aq'uentiyob i bʌxlel i pusic'al ti e'tel cha'an lac Yum. Tsi' pʌyʌ jini nijcʌbilo' bʌ i pusic'al cha'an mi' majlelob ti e'tel. 3Bezaleel yic'ot Aholiab tsi' ch'ʌmbeyob Moisés jini majtañʌl tac tsa' bʌ i ch'ʌmʌyob c'otel jini israelob cha'an mi' mejlel i yotot Dios. Jini winicob yic'ot x'ixicob tsi' chʌn ch'ʌmʌyob c'otel jini majtañʌl tac tilemo' bʌ ti' pusic'al cha'an mi' yʌc'ob ti jujump'ejl sʌc'ajel. 4Che' jini tsi' cʌyʌyob i ye'tel. Tsa' tiliyob jini x'e'telob woli bʌ i melbeñob i yotot Dios. 5Tsi' subeyob Moisés: Jini winicob x'ixicob woli' ch'ʌmob tilel jini ofrenda ñumenix ti p'is che' bajche' yom c'ʌñol cha'an jini e'tel yom bʌ melol che' bajche' tsi' yʌlʌ lac Yum, che'ob. 6Che' jini Moisés tsi' yʌc'ʌ ti tsictiyel jini t'an ti pejtelel tejclum. Mach yomix mi' chʌn tilel winic mi x'ixic cha'an mi' ch'ʌm tilel jini ofrenda cha'an i yotot Dios, che'en. Che'i tsa' tijq'uiyob jini winicob cha'an ma'anix mi' chʌn ch'ʌmob c'otel jini ofrenda. 7Come tsa'ix ts'ʌctiyi pejtelel jini yom bʌ mi' c'ʌjñel tac cha'an i melol jini otot. Anix i ñumel ja'el.

I melol Tabernáculo

(Éx. 26.1-37)

8Pejtelel jini p'ip'o' bʌ i pusic'al woliyo' bʌ ti e'tel ti Tabernáculo tsi' c'ʌñʌyob fino bʌ lino i melob lujumpajc cortina tac, yʌjyʌx bʌ, chʌccojan bʌ, yic'ot chʌchʌc bʌ. Tsi' meleyob yic'ot i yejtal ángelob, wen i t'ojol bʌ melbil. 9Che' bajche' chʌnlujump'ejl (14) metro i tamlel jujumpajc jini cortina. Cha'p'ejl metro i xuc. Lajal i ñuclel.

10Ti jo'pajc laj bʌ ts'isbil ti pejtelel yic'ot yambʌ jo'pajc pisil lajal chucbil yic'ot pejtelel jini yan tac bʌ. 11Tsi' yʌc'ʌyob xotol bʌ pisil yʌjyʌx bʌ ti' ti' jini pisil, ti jini ñaxan bʌ yic'ot ti wi'ilix bʌ ba' tʌc'bil. Che' ja'el lajal tsi' meleyob jini yʌmbʌ pisil baqui tʌc'bil ti' cha'p'ejlel. 12An lujump'ejl i yuxc'al jini xotol bʌ pisil tac ti jini ñaxan bʌ pisil, yic'ot lujump'ejl i yuxc'al xotol tac bʌ pisil ya' ti yambʌ pisil ja'el. Tsi' yʌc'ʌyob jini xotol tac bʌ pisil ti pisil tac ti' cha'tʌc'lel cha'an laj bʌ an jini alʌ xotol tac bʌ pisil ti' pejtelel jini ñuqui tʌc'bil tac bʌ. 13Tsi' meleyob lujunts'ijt i yuxc'al (50) gancho ti puro oro. Tsi' c'ʌñʌyob i laj bʌ ñejt' ti pejtelel jini pisil tac jinto tsi' meleyob ti jump'ejl jach jini Tabernáculo.

14Che' ja'el tsi' meleyob pisil ti' tsutsel chivo, cha'an i jol jini pisil bʌ otot. An junlujumpajc ti pejtelel. 15Jo'lujump'ejl metro i tamlel jump'ejl cortina. Cha'p'ejl metro i xujc. Che' lajal i p'isol ti' pejtelel junlujumpajc cortina. 16Tsi' laj bʌ tʌc'ʌyob jini jo'pajc cortina tac. Parte tsi' ts'isiyob yambʌ wʌcp'ejl cortina tac. 17Tsi' yʌc'ʌyob lujump'ejl i yuxc'al argolla melbil jach bʌ ti pisil ya' ti' ti' baqui tʌc'bil, yic'ot lujump'ejl i yuxc'al ja'el ya' ti' cha'tʌjc'lel jini cortina tac. 18Tsi' melbeyob lujunts'ijt i yuxc'al (50) i joc'lib melbil bʌ ti bronce cha'an mi' yotsañob ya' baqui xotol tac jini pisil che' bajche' argolla tac. Tsi' laj bʌ chucuyob ya' ti xotol tac bʌ pisil jinto tsa' mejli ti jump'ejl jach. 19Che' ja'el tsi' melbeyob i jol jini Tabernáculo. Tsi' meleyob ti' pʌchʌlel tat tiñʌme', ts'ajbil bʌ ti chʌchʌc bʌ ts'ajc. Tsi' yʌc'ʌyob i pʌchʌlel chivo ya' ti' pam.

20Tsi' yʌq'ueyob i tablajlel jini Tabernáculo ti acaciate'. Wa'al tac tsi' yʌc'ʌyob. 21I tamlel jiñʌch jo'p'ejl metro. I xujc jiñʌch 75 centímetro. 22An i c'ʌclib ti jujunq'uejl tabla ti' cha'wejlel cha'an ñit'ʌl mi' cʌytʌl. Junlajal tsi' meleyob i tablajlel. 23Tsi' meleyob junc'al tabla cha'an i mʌjquil jini Tabernáculo am bʌ ti' tojel sur. 24An cha'c'al i c'ʌclib ti plata, cha'p'ejl cha'an jujunq'uejl jini tabla. An cha'p'ejl i joc'lib cha'an jujunq'uejl. 25An junc'al i tablajlel jini Tabernáculo ti' xujc am bʌ ti norte. 26An cha'c'al i c'ʌclib ti plata ja'el, cha'p'ejl cha'an jujunq'uejl tabla.

27An wʌcq'uejl tabla cha'an i pat jini Tabernáculo ya' ba' mi' bʌjlel q'uin. 28An cha'q'uejl tabla cha'an i xujc tac ya' ti' pat Tabernáculo. 29Junlajal mi' cʌjchel ti ñujp ti ñujp tac jini tabla yic'ot xotol bʌ tsucu taq'uin tac. Ñit'ʌl mi' cʌytʌl ti' chañelal yic'ot ti yebal. Che'ʌch lajal ja'el ti' cha'wejlel i xujc. 30Che' jini an waxʌq'uejl tabla yic'ot i c'ʌclib melbil bʌ ti plata. Ti' pejtelel jiñʌch wʌclujump'ejl i c'ʌclib, cha'p'ejl cha'an jujunq'uejl tabla.

31Melbil jini bara ti acaciate'. 32An jo'ts'ijt bara tac ti junwejl jini Tabernáculo. An yambʌ jo'ts'ijt ti yambʌ i junwejlel, yic'ot yambʌ jo'ts'ijt ya' ba' mi' bʌjlel q'uin. 33Jini yambʌ bara mi' ñumel ti yojlil jini tabla ti jujunwejl. 34Tsi' tep'eyob ti oro jini tabla tac. Melbil ti oro jini xotol bʌ tsucu taq'uin ba' mi' ñumel jini bara tac. Tep'bil ti oro ja'el jini bara tac.

35Tsi' meleyob colem bʌ joc'ol bʌ pisil, yʌjyʌx bʌ, yic'ot chʌccojan bʌ, chʌchʌc bʌ, wen jalbil bʌ lino yic'ot i yejtal ángelob. 36Tsi' meleyob chʌnts'ijt te' ti acacia, tep'bil bʌ ti oro. Tsi' meleyob chʌmp'ejl i joc'lib ti oro. Tsi' meleyob chʌmp'ejl i buchlib ti plata.

37Tsi' meleyob cortina cha'an mi' yajñel ti' ti' Tabernáculo. Melbil ti yʌjyʌx bʌ pisil yic'ot ti chʌccojan bʌ, yic'ot ti chʌchʌc bʌ, yic'ot wen jalbil bʌ lino, wen uts'at bʌ joch'bil. 38Tsi' meleyob jo'ts'ijt te' ti acacia, tep'bil bʌ ti oro. Tsi' melbeyob i joc'lib ja'el. Tep'bil ti oro i jol yic'ot i cʌjchib. Melbil i buchlib ti bronce.

Currently Selected:

EXODO 36: ctuBI

Highlight

Copy