MARKUS 8

Yésus a ve toyini bôt bidi

(Mt 14:32-36; 15:32-39; Mk 15:30-44; Lk 9:10-17; Yoa 6:1-15)

1E nde ñhe, e mimôs mite, mbôl bôt be mbe abui, teke be bili jôme ya di, ane a nga loone beyéʼé bé a jô be na: 2Ma wôʼô bôte bana éngôngo, amu bia be be bi ntoo den tañe melu mela, ve be nji bi jôme ya di. 3Nge ma suu be na be bulane menda map, zaé e mebum, ba ye ke ba ku som e zene zen . Amu bevoʼo ya été ba so ôyap. 4Ane beyéʼé bé be nga yalane nye na: E môt a ne ve abim abui bôte dina bidi, e fé été va, bi mane yiane be, a ye so vé? 5Ane a nga sili be na: Mi bili belet tañ aya? be na: Zamgbwa. 6E nde a nga jô bôte na be tabee si. A nyoñe ñhe belete zamgbwale nyuna, a mane ve akéva, ane a nga beʼe je a ve beyéʼé bé na be ke ba kabe bôt; ane be nga kabe je bôt. 7Be nga bili fe ayôme kos. E nde fe a nga mane botane je a jô na be ke fe ba kabe je. 8Ane bôte be nga di a jaé. Be nga kee fe bifus bi nga buk, tañe minkoé zamgbwa. 9Bôte be mbe bebé toyini ényin. Ane a nga suu be na be ke. 10E nde fe a nga dañ éfunga été été baa beyéʼé bé, a ke éfas ya Dalmanutha.

Ndem fé Befarizieñ ba beta sili

(Mt 12:38-39; Mt 16:1-4; Lk 11:16-29; Lk 11:54; 12:54-56)

11Ane Befarizieñ be nga zu, baa be nye be nga sañetane nkobô, be siliʼi nye ndem éziñ ya yôp, zen ya bôbôlô nye. 12Asuu a nga suu abuk, e nde a zu jô na: Ndeme fé nje foʼo miaé bôt wu wo sili? Ma jô foʼo mia bebela na, teke ndem éziñ ja ye veban e be miaé bôte wu. 13Ane a nga liʼi be a beta dañ éfunga été a ke kindiʼi yat.

Ye fek é ne foʼo beyéʼé mebum

(Mt 16:5-12; Lk 12:1)

14E nde beyéʼé be nga vuane nyoñe belet, be liʼiya be bili éfunga été va, foʼo ve belete jijia. 15Ane a nga bendé be na: Mi kaleʼe, tukaʼa tabane ntye a mvusu Befarizieñ a nyô Hérôde. 16E nde be nga ke ba fas e zañe jab bebien, môt ase a jôʼô nyô mboʼo na: Bi nji bi belet. 17Eyoñ Yésus a yemeya nalé, e nde a jô be na: Amu jé mia ke mia fas a kobô na mi nji bi belet? E nde mi ngenane foʼo teke yem a teke wôk? Ye minlem mienan mi ngenan ayet?

18nde mi beʼe mis

ve teke yen,

nde mi beʼe melo

ve teke wôk?

ye mi ne te fek?

19Eyoñe me nga beʼe belet étan asu bôt toyini étan, minkoé mi afufus tañ aya mi nga kee mie njalan? Ane be nga jô na: Awôm a mibaé. 20Eyoñe ke me nga beʼe belet zamgbwa asu bôt toyini ényin, mi nga kee minkoé bitune mebukaʼa , tañ aya? Ane be nga jô na: Zamgbwa. 21E nde a nga jô be na: Ye mi ngenan teke tuʼa wôk?

Yésus a bo ndindim mvoʼé

22Ane be nga ke kui e Bétsayida. E nde bôt be nga zuu ndindim e be nye, a yeʼelane nye na a nambe nye. 23Ane a nga bi ndidime wo a kee wô atan, éyoñ a tuiiya wô mendene mis a beté fe wô mo, e nde a sili nye na: Ye wo yene jôm éziñ? 24Akui a nga kui mis, e nde a nga jô na: Me lôô bôt, ma yene be be funaʼane bilé, ba ke ba wulu. 25E mvuse valé, e nde a nga beta beté nye mo e mis, môt a nga fombô ne fonaaa, ane a nga bulane bo mvoʼé , a nga yene fe biôme biseseʼe ne sañe sañ. 26Ane Yésus a nga bulane lôme nye e nda jé a jô na: Te ñhe wo veʼele ke nyiine nlam.

Pierre a mem na Yésus nye a ne Krist

(Mt 16:13-20; Lk 9:18-21)

27E nde Yésus a nga téé baa beyéʼé bé, be nga ke mfaʼa minlame ya Sézaré Filip. E zene zañe wé ane a nga sili beyéʼé bé na: Bôte ba jô na me ne za? 28Ane be nga yalane nye a jô na: Bana na Yôanes Babtist, bevoʼo na Elie, e ba bevoʼo ke na, wua éziñ ya bekulu mejô. 29E nde ñhe a zu sili be na: Mfaʼa wônan, mi mia jô na me ne za? Ane Pierre a nga yalane nye a jô na: Ô ne krist . 30Ane a nga tuʼa bendé be na, be bo teke kate toʼo môt éziñ jam éziñ e tinaʼane nye.

Yésus a kulu mejô ya awu dé a ñwômane wé

(Mt 16:21-23; Lk 9:22)

31E nde a nga taté yeʼele be na, Mone Môt a yiane tôbane mintaé abui. Bemvendé, a Betuni Benen a Beyeme Bekalate ba ye bene nye, ba ye fe wôé nye, ve mvuse môs milal, a ye wômô. 32A nga kobô ajô di ne sañe sañ bôte bese be wôʼôk. Ane Pierre a nga nyoñe nye a kee nye émoʼo, a tebe ñhe na a komekane nye. 33Ve Yésus a nga veñesan a fombô beyéʼé bé, a nga bame Pierre a jô na: Kele mʼôyab mfaʼa ya mvus, a Satan, amu ô nji bi asimesane Zambe, ve di bôt.

Fulu ntôñe Krist

(Mt 16:24-28; Lk 9:23-27)

34E nde a nga loone jama bôt a beyéʼé bé na be zu, a jô be na: Nge môt éziñ a kômbô tôñe ma, a tatéʼé nyum émiene mam, a bekeʼe krôa jé a tôñe ma. 35E môt ase a kômbô nyii ényiñe jé, a ye jañele je; ve nyô ase ki a ye jañele ényiñe jé amu ajô dam a ajô Mbamba Foé, e nye a ye nyii je. 36Da ye volô môte jé na a bi ngume si ôse, nge a viane jañele ényiñe jé? 37A za jômô môt a ye ve, e tañ ényiñe jé? 38Amu na, nge môt éziñ a ye wôʼô mʼ ôson, nge ke mejô mam, e be miaé bôt bijabô wu a bebo abé , Mone Môt fe a ye wôʼô nye ôson, éyoñ a ye zu étôtoʼo Esaa wé été, baa be mimfufub bʼéngele.

Currently Selected:

MARKUS 8: BULU09

Highlight

Copy