MARKUS 11

Yésus a nyiin e Yérusalém ane Mesie

(Mt 21:1-11; Lk 19:28-40; Yoa 12:12-19)

1Eyoñe be nga subu bebé e Yérusalém, e zia Bétfajé baa Bétani, bebé a nkôle bʼôlivié, e nde Yésus a lôme beyéʼé bé bebaé, 2a jô be na: Kelan e jal e ne mia zoʼone yate vana di, nné ane mia ye kui, mia ye koone mon éjakas a tii, môte mfe éziñ a ngenan teke tame betebe nye yôp, tiʼane nye, mi zuu nye. 3Nge môt éziñ a sili mia na: Jé mia bo le? Mi yalane na: Nti nye a yi nye, a ye fe bulane lôme mia nye vana anaʼana. 4E nde be nga ke, be koone mon éjakas a tii atan bebé a mbé akak, e mfaka yôp; ane be nga tiine nye. 5Ane bôte bʼéziñ ya ba be nga tele valé be nga jô be na: Mia tiine mon éjakas ate amu jé? 6E nde be nga yalane be aval ane Yésus a nga jô. Ane be nga jôʼé be. 7E nde ñhe be nga kee mon éjakas ate e be Yésus, be nga ta mengômesan mab e mvus jé, ane Yésus a nga ke tabe nye e yôp. 8Abui bôt e nga ke da ta mengômesane mab e njoñe njoñ, ba bevoʼo ki mebui bilé be nga ke ba tyiʼi e fé fé.

9E bôte ya ôsu,

a bôte ya mvus,

be nga zu ba yôtane na: Hôzana!

Ébotan a môt a zu e jôé Nti!

10Ebotan a éjôé ja zu,

e ji ésaa wongan David!

Hôzana e susuʼa nkôñ ya yôb été!

11E nde a nga ke kui e Yérusalém, a nyiin e Nda Zambe été. Aman a nga mane fombô biôm bise mbômaʼane, éyoñ éte ngôʼé é nga bo foʼo abui, ane a nga kui atan a ke e Bétani baa Beyéʼé awôm a bebaé.

Yésus a yoʼé élé fiig

(Mt 21:18-19)

12Tyé-kpwa, valé be kôlôʼô e Bétani, e nde Yésus a nga wôʼô zaé. 13Eyoñ a yeneya élé fiig é tele ôyab analé, é beʼe mekaé, ane a nga ke jom nge a ye yene jôm éziñ été. Ve éyoñ a nga ke kui je bebé, a viane koone ve mekaé-mekaé, amu éyoñ éte é nji bo éyoñ befiig. 14Ane a nga kobô a jô élé na: Akekui melu mese ma zu, môt éziñ a boʼo te beta di ébuma ya be wo ne tya! Beyéʼé bé be nga vôʼôlô a wôʼô nkobô ôte.

Yésus a titane bôt ba bo makit e Nda Zambe

(Mt 21:10-17; Lk 19:45-48)

15Ane be nga ke kui e Yérusalém. Anyiin a nga nyiin e Nda Zambe, a tebe ñhe na a titane bôt ba kuan, a bôt ba kuse biôm e Nda Zambe été, a sôʼôlô betebele betyendé moné a bito bekuane bezum e si. 16Teke fe jôʼé na môt éziñ a tulane Nda Zambe a beʼe jôm éziñ. 17A nga yeʼele bôt a jô na:

Ye e nji bo ntilane na:

Ba ye loone nda jam na,

nda meyeʼelan asu meyoñe mese?

Ve mia mi vianeya kôñelane je

mfule befanga.

18Eyoñe Betuni Benen a Beyeme-bekalate be wôʼôtaneya ajô te, be nga jeñe ñhe aval avé be ne jiane nye. Ve be mbe be mateʼe nye amu nkunda bôt ôse ô mbe ô semeʼene ñyeʼelane wé. 19Eyoñe ngôʼé é nga bo, ane be nga kôlô tison éte.

Nkôt élé fiig; meyeʼelan ya mbunan

(Mt 21:20-22)

20Eyoñe be nga zu lôte bia-tyé, ane be nga yen élé fiig é maneya kôt, ataté mindi. 21E nde Pierre a zu beta simesan, a jô nye na: A Rabbi, tame yen ane élé fiig ô nga yoʼé é maneya kôt! 22Ane Yésus a nga nyoñe nkobô a jô be na: Bunaʼane Zambe! 23Ma kate mia bebela na, nge môt éziñ a jô nkôle wuna na: Kôlôʼô si va ô ke ku e mañ, teke bone bisô biziñ e nlem été, a buniʼi foʼo ve na e jam a jô da ye boban, da ye foʼo boban vʼane a jô. 24E nde ma jô mia na, e jam ese mi ne jaʼé a meyeʼelan, bunaʼane foʼo na mi mbili de, da ye foʼo veban ane mia sili. 25A éyoñ mi ntele na, mia yeʼelan, nge mi bili môt jam éziñ e nlem été, mi jaméʼé, ndemben Esaa wônan ya yôb nye fe a ye jamé mia bikobe bienan. 26Ve nge mia bo te yeme jamé, Esoo wônan a ne yôb nye fe a ye bo te jamé mia bivuse bienan.

Ngule fé wo boo je mam ma?

(Mt 21:23-27; Lk 20:1-8)

27Eyoñe be beteya zu kui e Yérusalém, Yésus a nga ke a lôtan e Nda Zambe été. Ane Betuni Benen, Beyeme-bekalate a Bemvendé, be nga zu yene nye. 28E nde be nga jô nye na: Ngule fé, e nje wo boo je mame ma? Nge na: Za a nga ve wo ngule ya bo mam mete? 29Ane Yésus a nga jô be na: Ma fe ma zu sili mia ve nsili wua, mi yalaʼane ñhe ma, nde ma fe me kate mia, ngule fé ma boo je mame ma. 30E nduan Yôanes a nga du bôt, ô nga so vé, ye yôb, ye be bôt? Yalaʼane ma! 31Be nga ke ba fas beebe be jôʼô na: Nge bia jô na: Ô nga so yôp, ke a ye sili na: Vʼamu jé mi nji buni nye? 32Nge bia jô ke na: Ô nga so be bôt be nga viane ko ékoone bôte woñ, amu bôte bese be nga buni na Yôanes a ne foʼo totii nkulu mejô. 33E nde be nga yalane Yésus na: Bi nji ke yem. Ane Yésus a nga jô be na: Ma fe maa ye kate mia, ngule fé nje ma boo je mame ma.

Currently Selected:

MARKUS 11: BULU09

Highlight

Copy