MALAKI Mejô yʼatataʼa
Mejô yʼatataʼa
Kalate Malaki a ne kalate a suʼulan e nnôma kalate Zambe a nyô a suʼulan e nsamba bone bekulu mejô. Môt a kobô été a ne jôé na Malaki, wua ya bekulu mejô Zambe a nga belane be na be kobô ayoñ Israél e mvuse nsoone minkôme Babilôn. A nga kulu mejô e zañe mbu 480 a mbu 460 valé Esdras a Néhémie be ngenan teke zu bo ésaé ya beta kôme mam e Yérusalém a Israél ase.
Kalate Malaki a bili bekapitel benyin. Ve bi yeme na abui minkôñelan e bili nye ve bekapitel belaa. Ve tañe bifus é ne abime da e minkôñelane mite mise.
Nkpwase ya kalate nyô ô ne avale di:
a) 1:1-5: Nyeʼane Zambe a bikalak bi Israél.
b) 1:6–2:9: Zambe a ve betuni mekua
c) 2:10-16: Malaki a kaman étyi yʼaluk.
d) 2:17–3:5: Nkatane foé ajô môse Nti.
e) 3:6-12: Ajô ngab awômô.
f) 3:13–3:22: Maʼan me bôt ba saane Nti.
g) 3:23-24: Nlôman wo ke bo ésaé ôsu.
Beta bʼasimesan bebaé be ne e nkulane mejô Malaki été: Ôsimesan wo fombô mame ya asuʼulan a wu wo fombô nkômane mame ya nkañane Zambe.
1- Ôsimesane mame ya asuʼulan:
E nsoone minkôme Babilôn, Beyude bese be nga dañe kobô ajô Mesie, nyô a ye kôm a beta telé mam mese ya Israél. Bekulu mejô bevoʼo ya melu mete aval ane Agé, be nga simesane na Zôrôbabél Ngovina ya melu mete nye a ye bo Mesie ate. Ve nalé a nji ke boban.
Mfaʼa Malaki, e môt a ye jalé teb ése ya asuʼulan a ne ve Zambe émien.
Nalé fe na melu Malaki, mvoʼé é nga bômane si ya Yuda akôsa bo monʼanyôs e zañe bôte ya Samari a ba ya Yérusalém. Ve ntabane betuni a wu minsamba mi bôte ya ayoñ mi nga bili mame mo ô mbe abé, mboone te ô nga viane ve minsamba mi bôte mivoʼo mise yʼayoñ ateʼe nyô (3:13-15).
Ajô te Malaki a nga vele mbunane ya ayoñ ese ôyo, a tindi bôt be kômesane nsoone môse Nti, e ñwô bôte bese ba ye tuneban (3:5), e ñwô bôte bese be ne nkpwala ba ye jañ (3:18–4:1) a e ñwô bezôsôô be bôt ba ye nyiiban (3:17; 4:1-3); ba yiane fe yeme na nyiane te wo ye jiʼa so (3:1).
2- Nkômane mame ya nkañane Zambe.
Tine nkômane mame ya nkañan é ne ntoban Zambe a nga tob Israél. Ajô te Malaki a vumelan ôsimesan wu e melo Beyude be yeme na, Zambe a nga tobe be. Mendeme ya ntobane ôte me ne na:
1- Mbôlan ayoñ Edom da mane bôlé a tyamban (1:1-5).
2- Zambe a ne avale da mfaʼa yʼélate jé. (3:6)
3- Beta ngakaʼa a bôô si na: Israél a ye bo édima jôme Zambe Emien (3:17).
Amu mame mana mela, nde Malaki a simesane na ntyendan wo yian mfaʼa mame ya nkañane Zambe.
1- Nti a yiane duma a ésemé (1:6).
2- Mimvean, a dañedañ ngab awômô, mia yiane nyiin, avale mi ne ntelan (3:6-12).
3- Zôsôô a yiane yené ézezañe mevale minsamba yʼayoñ (2:10; 3:5).
4- Mbaʼalan étyi ya nda bôt wo yian, a dañedañ wu aluk (2:10-16).
Ve bebela a ne na nya nkañane Zambe, nyô a ne mfuban, a ye bo nyô meyoñ mese ma ye nyiin été (1:11).
Currently Selected:
MALAKI Mejô yʼatataʼa: BULU09
Highlight
Share
Copy
Want to have your highlights saved across all your devices? Sign up or sign in
© LʼAlliance Biblique du Cameroun, 2009