MALAKI 1

Bôte ya Israél be ne bikalak

(Eze 35; Abd 1)

1Nkulane mejô Nti a nga Kobô Israél e be Malaki.

2Ma nyeʼe mia, nalé Nti a jô. Ve mia jô na: Jé ja liti na wo nyeʼe bia? Ye Esô a nji bo monyañe Yakob? Nalé Nti a jô; ve me nga nyeʼe Yakob, 3a ben Esô; me nga bo minkôle mié ne sangaññ, a ve e ngabe si jé betit ya fé. 4Nge bon bʼEdom ba ye jô na: Be maneya bôé bia; ve bia ye beta lôñe mevôm me ne ntyaman. Nti ya minsamba mewosan a jô na: Be tame lôñ, ve me ma ye tyam, a ba ye loone be na: Si ya mbia be mam, e bôte Nti a yaa be nnôm éto. 5Mise menan ma ye yene de, a mia ye jô na: Anene Nti da lôte minné yʼIsraél!

Nti a ve betuni mekua

(1 S 15:22-23; Sam 66:18; Mink 15:8)

6Mona fam a wumu ésaa, a mbo ésaé a wumu masa wé. Nge me ne ésaa, duma dam e ne vé? Nge me ne masa, ésemé jam é ne vé? Nalé Nti ya minsamba mewosan a jô mia betuni mia biasé jôé dam. Ve mia jô na: Jé ja liti na bia biasé jôé dôé? 7Mia zuu bidi bi ne te mfuban ataʼa metunaʼa dame yôp, ve mia jô na: Bi veya wo mvine nyôl a jé? Eyoñe mia jô na: Tawôlô Nti a ne jôme ya biasé! 8Eyoñe mia soo éyem é ne ntuane dis, ye nalé a nji bo abé ? Eyoñe mia soo éyem ja feñke nge ji ja kon, ye nalé a nji bo abé ? Tame ñhe ve je njôô bôte wôé, ye a ye yene nalé mvaé a nyoñe wo a mevak? Nalé Nti ya minsamba mewosan a jô. 9Eyoñe ji, yeʼelaʼane ñhe Zambe na a mvamane mia! Jame te da so be mia, ye mia buni na ma ye yene mia mvaé? Nalé Nti ya minsamba mewosan a jô. 10Ngoʼé nge môt éziñ ya be mia a ye dibe mbé nda Zambe, nalé mia ye bo te boʼé nduane ya ataʼa metunaʼa dam e zesé! Me nji yene mia mvaé, nalé Nti ya minsamba mewosan a jô, a me nji kômbô nyoñe mvean éziñ e mo menan! 11Amu na ataté e jôbe da tôô a kui e jôbe da dim, e jôé dam e nʼanene meyoñ me bôt été. Ba diʼi ôtu vôm ase amu duma ya jôé dam. Nalé Nti ya minsamba mewosan a jô. Nalé fe na ba zu ve mvean ô ne mfuban , amu jôé dam e nʼanene meyoñ été, nalé Nti ya minsamba mewosan a jô. 12Ve mia mia ndaman vôm wé a ne étyi éyoñ mia jô na: Tawôlô Nti a ne mvin, a jôm ése ba nyoñ été é ne ji ya biasé. 13Mia jô na: Za njuʼu wu! Mi kele mia bete bitu, nalé Nti ya minsamba mewosan a jô. Ve mia viane zuu jôme wup, ji ja feñke nge ji é nʼéyem: Mvean mia zuu ma wô ñwô le! Ye ma ye nyoñe wô e mo menan, nalé Nti a jô. 14Biyoʼé e be mvômvôle môt wo bo na a bili nnôm éyem a ne mvoʼé e mbame wé, a tiñeti atiñ , vʼéyoñe te a viane ve Nti e tit é nji bo mvoʼé ! Amu me ne beta njô bôt, nalé Nti ya minsamba mewosan a jô, a ba yiane ko jôé dame woñ e meyoñ me bôt été.

Currently Selected:

MALAKI 1: BULU09

Highlight

Copy