MALAKI 3
3
1Mi lôô ma ye lôme nlômane wom. A ye kôme zen ôsu viam. Nti mia jeñ, nlôman yʼélat mia kômbô nye le a zu, a ye nyine nda Zambe jé atemetem, nalé Nti ya minsamba mewosan a jô. 2Za a ye jibi môse ya nsoone wé? Za a ye tebe tetele e môs a ye yené? Amu a funane nduane nyemé biôm, a funane sobô bewoseman. 3A ye tabe na a nyemé a fubu argent. A ye tune betuni, bone be Lévi. A ye fubu be ane ba fubu or a argent. Eyoñ éte Nti a ye yene be mvaé amu ba ve aval mvean da yian. 4Mveane Yuda a wu Yérusalém, Nti a ye yene mie mvaé aval ane melu mvus, aval ane mimbu ya mvus. 5Ma ye subu mia bebé asu ntyiʼane mejô. Ma ye bo nyô a jiʼa boʼolô bebo majik, a bekañe bengunemelan, bekane ngana meduʼan, ba ba seʼé bebo bisaé tañe jap, ba ba tibili nkus, monenyui a ntabe a teke ko ma woñ, nalé Nti ya minsamba mewosan a jô. 6Amu ma me ne Nti, a me ngenan te tyendé, a mia mi ngenane fe ve bone be Yakob.
Ngab awômô
7Ataté melu bʼésoo mi nga kôlô minjôane miam été, mi nji ke baʼale mie. Bulaʼane be ma a ma ye bulane be mia, nalé Nti ya minsamba mewosan a jô. Ve mia jô na: Bi beta bulan aya? 8Ye môta binam a ne duʼu Zambe? Ve mia duʼu ma! A mia jô na: Bi duʼuya wo vé? Ajô ngab awômô a mimvean mivoʼo mise. 9Mi ntoo mbiban a biyoʼé, a ma mia duk , mia ngum ayoñe wuna ôse? 10Zaʼane ñhe ngab awômô ése e nda ba naan akum, nalé nda jam ja ye bi bidi bi ne nnaan; tama veʼelane ma a avale mboone te, nalé Nti ya minsamba mewosan a jô, éyoñe te mia ye yen nge ma ye bo te dii mia mezene mendime ya yôp, a nge ma ye bo te sôé mia bibotan abui mi to te fe vôm ya futi bie. 11Ma ye bame ndi biôm asu denan, nalé a ye bo te ndaman bibuma bienane ya si. Ndiʼi woone fe wo ye bo te telé ñwumane bibuma e mefane menan été, nalé Nti ya minsamba mewosan a jô. 12Meyoñ mese ma ye jô na mi ne mevak, amu mia ye bo si ya mefok, nalé Nti ya minsamba mewosan a jô.
Bôte ba saane Nti be bili ébotan
(Yb 34:7-9; Eza 3:10-11)
13Mi nga kobô ma nkobô njet, nalé Nti a jô. Ve mi nga jô na: Za njete nkobô bi nga kobô wo? 14Mi nga jô na: Bia saane Zambe e fufuli. Maʼane mangan me ne jé éyoñe bia baʼale mebendé mé a éyoñe bia wulu mbot asu amu Nti ya minsamba mewosan? 15Eyoñe ji bi lôô na bôt be ne mbia anyu mbe be bili mvaé. Bi lôô fe na e bôt be ne nkpwala mbe mame mab ma ke ôsu. Nge ba veʼele Zambe, be fame fe! 16Nalé ate bôt ba ko Nti woñ be nga kobô wua a nyô mbok; Nti a too ne séé a vôʼôlôʼô, nde be nga tili môé me bôt be ne ngame ba ba ko Nti woñ a semé jôé dé e kalate ba tili mame ya simesan. 17Ba ye bo émbam, nalé Nti ya minsamba mewosan a jô. E môse ma kômesan, ba ye bo jôme jame mamien. Ma ye kamane be ane môt a kamane mona fame wé a saane nye. 18Eyoñe te mia ye beta yen nkandan e zañe zôsôa môt a mbo abé , e zañe môt a saane Zambe a nyô a nji saane nye.
Môse Nti
(Mt 24; 2 Tes 1:6-10; 2 Pi 3:7,10-14)
19Amu ô lôô môse Nti wo zu,
ayôñ ane mbeʼe nduan.
Ba bese be ne bimañ
a ba be ne nkpwala
ba ye bo ane mimbop;
e môse wo zu ôte wo ye diʼi be,
nalé Nti ya minsamba mewosan a jô,
teke nkañ nge ntyaé wo ye liʼi be be.
20Ve mia mia ko jôé dame woñ,
jôbe zôsôô da ye tôô,
a ñyetane bôt wo ye bo e mefabe mé si;
mia ye kui atan a tyelé ane bone benyak ba kui nkaʼalé.
21Mia ye tibi bebo abé e mebo si;
amu ba ye bo ane asup
e mebo menane si e môse ma kômesan,
nalé Nti ya minsamba mewosan a jô,
22Mi simesaʼan atiñe mbo ésaé wom Môze
nyô me nga ve minjôan a mebendé e nkôl Oréb
asu Israél ase.
23Mi lôô mamien ma ye lôme lôme mia nkulu mejô Elie
môse Nti ô ngenane te so,
e môs ô nʼanen a angôndô.
24A ye bulane minleme bʼésaa e be bon ,
a mi bon e be bʼésaa,
me zaa zu mane jiane ngume si.
Currently Selected:
MALAKI 3: BULU09
Highlight
Share
Copy
Want to have your highlights saved across all your devices? Sign up or sign in
© LʼAlliance Biblique du Cameroun, 2009
