LUKAS 11

Meyeʼelan me Nti

(Mt 9:13)

1Yésus a mbe a yeʼelaʼane môs éziñ e vôm éziñ. Eyoñ a nga man, wua ya beyéʼé bé awôm a mebaé a nga jô nye na: A Nti, yeʼeleʼe bia ane bi yeʼelan, avale Yôanes a nga yeʼele beyéʼé bé. 2A nga jô be na: éyoñ mia yeʼelan, jôʼane na:

A Esaa!

E jôé dôé e boʼo étyi;

éjôé jôé é zaʼak!

3Vaʼa bia bidi biangan ya môs ôse.

4Jaméʼé bia e mam abé mangan, amu bia fe bia

jamé e ba bese ba bo bia abé;

a te bo bia na bi ku e mebôbelaʼa été.

Mengakaʼa ma tôñe meyeʼelan

(Mt 7:7-11; Lk 18:1-8; Yak 1:5-7; 1 Jn 5:14-15)

5A nga beta jô be na: e mbé ya be mia a ye bi mvôé ja ye ke be nye e zañ alu asu ya jô nye na: a mvôé jam, kôléʼé ma belet élaa, 6amu wua ya bemvôé bam a te kui be ma a soʼo dulu, a me nji bi jôme ya ve nye? 7Nge môte mbok a yalane nye e nda été na: Te ndeñele ma, mbé ô ntoo ndiban, bia be bone bam bi bômbeya si, me se fe nguleya kôlô si na me ve wo belet, 8ma jô mia de na: toʼo a nji kôlô si asu ya ve nye je a mu na a ne mvôé jé, a ye kôlô si amu éndeñelaʼa jé a a ye ve nye e jôm ése a kômbô. 9A ma ma jô mia na: Jakaʼan a ba ye ve mia; jeñan, a mia ye yen; kutane mbé a ba ye diine mia wô. 10Amu nyô ase a jaʼé a nyoñ, nyô a jeñ, a yen a nyô a kute mbé , ba dii nye wô. 11Esaa mbé ya be mia, nge monafame wé a sili nye belet, a ye viane ve nye akok? Nge na nge a sili nye kos a ye viane ve nye nyo éjiane kos? 12Nge na nge a sili atyi kup, a ye viane ve nye kata ôlet? 13Nge mia mi ne mbia be bôt mia yeme ve bone benane mbamba be biôm, kô fé Esaa a ne yôp a ye dañe ve Mfufube Nsisim e be ba ba sili nye nye.

Mvumvuʼu mbeʼe mbia nsisim wo saéban

(Mt 12:22-45; Mk 3:22-30; Mt 9:32-34)

14Yésus a mbe a saék mvumvuʼu mbeʼe mbia nsisim . Eyoñe mbia nsisim ô nga kui atan, e nde mvuvuʼu ô nga kobô, a bizuʼu bi bôt bi nga semé. 15Ve bevoʼo be nga jô na: A vaa mimbia minsisim a ngule njôô mimbia minsisim. 16Ba bevoʼo ki, asu ya veʼele nye, be nga sili nye e ndem éziñ ja so yôp. 17Mbôlô a mbe a yemek asimesane dap, a nga jô be na: éjôé ése é ne nkaban é wosaʼan ébien ja dilibane bita a menda mé ma ku si jia é betebeʼe nyô foʼo yôp. 18Ajô te ñhe nge Satan a kandane zañ a wosan émien éjôé jé ja ye tebe aya mbôlô mia jô na ma titane mimbia minsisim a ngule njôô mimbia minsisim? 19A nge ma ma titane mimbia minsisim a ngule njôô mimbia minsisim wôna bone benan ba titane mie a ngule fé? Amu ajô te bebiene ba ye bo betyiʼi mejô benan. 20Ve nge ma ma titane mimbia minsisim a e wo Zambe, wôna éjôé Zambe é siseya ñhe a kui be mia. 21Eyoñe môt a ne ngu a bili fe mengaa abime da yian a baʼale éfuse si jé, akume dé e ne tekʼatyelé nleme yôp. 22Ve nge nyô a dañe nye ngul a so atemetem a dañe nye, a mane wôlé nye mengale mese a too me ndi a mane kabe biôme a te wôlé nye. 23Nyô bia nye bi nji bo nsamba a ne ma e ngame yat, a nyô bia nye bi nji kôane biôm a tyamelane bie.

24Eyoñe mbia nsisim a kôlôya be môt, a tulane mevôm me ne ayet, a nga jeñ awoʼon, a amu a nji yene de, nye na: Ma ye bulan e nda jam e vôme me nga kôlô; 25a éyoñ a kuiya, a koone je mvosan a nkôman. 26Wôna a ke a nyoñe minsisime mife zamgbwa mia dañe nye abé , mi ve nyiin a tabe valé, a été môt ate a zu suʼulane tebe ve zu dañe ji yʼôsu abé .

27Yésus a ngenan a kobôʼô nalé, minga éziñ ve bete tyiñ ézezañe bôt a jô nye na: Ebotan a abum e nga beʼe wo a mebé me nga nyaa wo! 28Ve a nga yalane na: ébotan é vianeʼe ñhe bo e be ba ba wôʼô mejô me Zambe a bo me!

Yésus a bene bo étua jam

(Mt 12:38-42; Mt 16:1-4)

29Bôt be mbe be sulaʼane beta nsamba, e nde a taté na a jô be na: e miaé bôte wu ô ne mbia miaé; wo jeñe ndem; e ndem ja ye vebane be je é ne foʼo ve nyô Yôna. 30Amu avale Yôna a mbe ndem e be bôte ya Ninive, avale te fe Mona Môt a ye bo ndem asu miaé wu. 31Njô bôte minga ya jôp da tôô a ye kôlô si, baa be bôte ya miaé wu a ve be mekua éyoñe ntyiʼane mejô, amu a nga so e mekuʼu ya si na a vôʼôlô e feʼe Solômon, ve yene na môt a dañe Solômon a ne va. 32Bôte ya Ninive ba ye tebe éyoñe ntyiʼane mejô baa be bôte ya miaé wu a ve be mekua, amu be nga kôñelane minlem e nkobane mejô me Zambe Yôna; ve yene na e môt a dañe Yôna a ne va.

Nkana lambe

(Mt 6:22-23; Mt 5:15; Lk 8:16-18)

33Môt éziñ a nji boʼé lambe asu ya telé nye asoé nge éwolo si, ve ba telé nye ételé lambe yôp, ndembene ba ba nyiine nda ba ye yen éfufup. 34Dise dôé é ne lambe ya nyôle jôé. Eyoñe dise dôé e ne mvoʼé , nyôle jôé ése fe é ne éfufub été; ve nge é ne abé , e nyôle jôé fe é ne e dibi été. 35Tabeʼe ñhe ntyele na éfufup é nee be wo é bo te bo dibi. 36Nge nyôle jôé ése é ne ñhe éfufub été, teke ébuʼa éziñ e dibi été, ése ja ye bi éfufup aval ane éyoñe lambe a faé wo éfufube jé.

Yésus a ve Beyem bekalate a Befarizieñ mekua

(Mt 23:1-36; Mk 7:1-16)

37Yésus a kobôʼô, e nde Farizieñ éziñ a yeʼelane nye na a di be nye. A nga nyiin a tabe tawôlô. 38Farizieñ a nga yen a kamek na a nji ke sôbe mo te na a di. 39Ve Nti a nga jô nye na: Mia, Befarizieñ, mia fubu élaé a ésua atan, ve éfase yʼété, mi ne njalan a mbia be mam a abé . 40A bôt be ne te fek! Nyô a nga bo atan ye saa e nye fe a nga bo été? 41E mvolan ô vaʼabaʼan ataté e nlem été, a biôm bise bia ye bo mfuban asu denan.

42Ve ngoʼé mia Befarizieñ! Amu mia yaʼane ngab awômô ya biôme mevale meva, ve mia biasé zôsôô a nyeʼane Zambe: e jam mi nga yiane taté bo e nde le, teke vaa ma ma liʼi.

43Ngoʼé mia Befarizieñ! Amu mia nyeʼe éto yʼôsu e meba me Zambe, a mebatan e mevôme bôt ba sulan.

44Ngoʼé mia! Amu mia funane mesoñ me ne tee ndem a e mme bôt ba wulu yôp teke yeme nalé.

45Wua ya beyeʼele metiñ a nga nyoñe nkobô a jô nye na: éyoñe wo jô nalé a Nyeʼele, bia fe wo bo bia abé . 46Yésus a nga yalane na: Ngoʼé mia, beyeʼele metiñe fe! Amu mia beté bôt mimbeʼe mi ne ayaé ya beʼe, e mie miabebien mi nji nnambe a sosoʼo anyu.

47Ngoʼé mia! Amu mia lôñe mesoñe bekulu mejô, ve e too na beésoo e mbe be nga wôé be. 48Ajô te mi ne bengaa a mi ayebe mimboone beésoo, amu mfaʼa wop, be nga wôé be a mia mia lôñe mesoñe map! 49Ajô te feʼe Zambe é nga jô na: Ma ye lôme be bekulu mejô a minlôman; ba ye wôé be a kpweʼele be. 50Ajô te sitoʼo a ye siliban e be miaé bôte wu ajô metyi bekulu mejô mese me nga sôéban ataté éyoñ émo é nga téban. 51Ataté metyi mʼAbél a kui e ma me Zakari, nyô a nga wôéban e zañe ataʼa metunaʼa a Nda Zambe; Yaa, ma jô mia de na: Sitoʼo yʼété a ye siliban e be miaé bôte wu.

52Ngoʼé mia beyeʼele metiñ, amu mi nga vaa édibaʼa ñyemane mam, miabebien mi nji ke nyiin été, a mi nga kamane ba be nga kômbô nyiine na be bo te nyiin.

53Eyoñ a nga kôlô valé, beyeme bekalate a Befarizieñ be nga taté na ba bametane nye a ayoʼo ese a bo nye na a kobô abui mam, 54be lame nye melam na be nyoñ bifia biziñ bia so nye anyu.

Currently Selected:

LUKAS 11: BULU09

Highlight

Copy