LUKAS 10

Yésus a lôme beyéʼé mewôme zamgbwa

Ôbane mbamba foé

(Mt 10:7-10; Nlb 11:16-17)

1Mvuse mam mete, Yésus a nga beta lôme beyéʼé befe mewôme zamgbwa, bebaé bebaé, ôsu vié, e tison ése a e vôm ase émien a mbe na a yiane ke. 2A mbe a jôʼô be na: nkôane bidi ô ne abui, ve bebo bisaé be ne tyôtyoé. Yeʼelaʼane ñhe masa nkôane bidi na a lôme bebo bisaé e nkôane bidi wé. 3Kelan. Mi lôô ma lôme mia ane bone mintômba ézezañe beze été. 4Te mia jaé mfek nge ékpwaé, nge besilefas a te mia batane môt e zen . 5E nda éziñ mi ne nyiin, tataʼa jôane na: mvoʼé é tabeʼe e nda nyô! 6Nge mona mvoʼé a ne valé, e mvoʼé jenan ja ye tabe be nye; nge nalé momo, wôna ja ye bulane be mia. 7Tabaʼan e nda éte été, jaʼan a nyaʼan e jôm é ne été; amu mbo ésaé a yiane maʼane mé. Te keane menda menda. 8E tison éziñ mi ne nyiin, a e vôm ba ye nyoñe mia, jaʼane jôm ba ye ve mia, 9saane minkôkon mia ye bo valé, a jôʼane mie na: éjôé Zambe é subuya mia bebé. 10Ve tison éziñ mi ne nyiin a e vôme ba ye bo te nyoñe mia, kelan e mevôme ya tison été a jôʼane na: 11a mbia nlem ase mfaʼa wônan, bia sas jaʼane mbuluk ôbiene ya tisone jenan ô nga kabetan e mebo mangan si; ve da yemane na: éjôé Zambe é subuya mia bebé. 12Ma jô mia na, môs ôte ayaa mfaʼa Sodom da ye bo si a di tison éte ja ye tôbane de.

13Ngoʼé wo a Kôrazin! Ngoʼé wo a Bétsayida! amu nge bitua bi mam bi nga boban ézezañe jenan bi too ye boban e Tir a Sidoñ ve be nga maneya kôñelane nlem a ayap a njaane nkuta a ñwoban asup. 14Amu ajô te éyoñe ntyiʼane mejô, Tir a Sidoñ ba ye bi ayaa é nji dañe ngu ane éndenan. 15Wôna wo, Kapernawum, ye wo ye beteban a kui yôp? Momo, wo ye silibane si a kui étabaʼa miñwuan.

16Nyô a ve mia mewôk a ve fe ma mewôk, a nyô a bene mia a bene fe ma, a nyô a bene ma a bene fe nyô a nga lôme ma.

17Bemewôme zamgbwale bete be nga bulan a jô na: A Nti, jaʼane mimbia minsisim mia wôʼô bia a jôé dôé. 18Yésus nye be na: Me mbe me yenek Satan a soʼo yôp a kpwaʼa si ane feleves. 19Mi lôô, me nga ve mia ngule ya wulu benyo yôp a alé, a nguleya wulu e ngule nsiñ ése, a teke jôm éziñ é ne ngule ya ndeñele mia. 20Ve da, te mia vak amu minsisim mia wôʼô mia, ve vaʼan amu môé menan me ntoo ntilane yôp.

Mbamba Foé a ne nliteban e be bon

(Mt 11:25-27)

21Eyoñe te ébien, Yésus a nga fôn a mevak a ngule Mfufube Nsisim a jô na: A Esaa wom, Masa ya yôp a si, ma kañe wo, amu ô nga solé mame ma e be mimfefek a mintyetyeñ, a amu ô nga liti me bon . Yaa, a Esaa wom, amu avale te nde mbamba nkômbane wôé a mbe. 22Esaa wom a nga ve ma mam mese a teke môt a yem za a ne Mon, vengevenge ve Esaa, nge yem za a ne Esaa vengevenge ve Mon a e nyô Mon a kômbô nye liti. 23A éyoñ a kôñelaneya e be beyéʼé, a nga jô be be too be be na: e mise ma yene mam mia yen me ne ébotan! 24Amu ma jô mia na: abui bekulu mejô a bejô bôt be nga kômbô yene mam mia yen ve be nji ke me yen, be kômbô fe wôʼô mam mia wôk ve be nji ke me wôk.

Nkana mbamba môte ya Samari

(Mt 7:12; Rm 13:8-10)

25E nde a zu bo na, nyeʼele metiñ ve kôlô si a jô nye na: A Nyeʼele, ma yiane bo aya ane ma ye nyoñ ényiñe ya melu mese ane ngap? 26Yésus a nga jô nye na: Jé é ne ntilan e metiñ? Wo lañ été aya? 27Nye na: Wo ye nyeʼe Nti e Zambe wôé, a e nleme wôé ôse a nsisime wôé ôse, a e ngule jôé ése, a ôsimesane wôé ôse a e môte mbok ane womien. 28Ô yemeya yalan, nalé Yésus a nga jô nye; boʼo nalé wôna wo ye nyiñ. 29Ve nye, a nga kômbô kale émien, e nde a nga jô Yésus na: Ve za a ne ma môte mbok? 30Yésus a nga beta nyoñe nkobô a jô na: Môt éziñ a mbe a silikiʼi e mfaʼa ya Yérikô a soʼo Yérusalém. A nga ku ézezañe beze mimfaka, mbe bete be nga mane wôlé nye biôm, be mane fe tyaʼa nye ébôm, be mane ke a liʼi nye ane mbim. 31A teme teme na, ntuni éziñ nyeʼe ki a nga siliki fe zen éte; ve yene môt ate a lôt teke bisi. 32Mone Lévit éziñe fe a nga kui vôm ate, ve yene nye a lôt teke bisi. 33Ve môte ya Samari éziñ, a too dulu zañ, a nga kui nye bebé, a yene nye a ko nye éngôngo. 34A nga ke bebé a tiñeti nye meveñ a nsôane mbon a woon été; mvus éte, a nga tooé nye e tite mimbeʼe jé yôp, a kele nye e nda beyeñ a baʼale nye. 35Tyé kpwaa, a nga kuli bedenié bebaé a kee be mbaʼale beyeñ a jô na: baʼaleʼe nye, a tañe wo ye dimili ane abet mamien ma ye yaʼane wo je éyoñ ma ye bulan. 36E mbé ya bôte bana belaa a yené ane nyô a mbe môte mbok e be môt a nga ku ézezañe beze mimfaka? 37A nga yalane na: e nyô a nga mvamane nye? Yésus a nga jô nye na: Kelek a wo boʼok avale te.

Maata baa Marie

(Yoa 11:1-3; 12:1-7; Mt 8:33; Yer 15:16)

38A too e dulu zañ e nde a nga nyiin e nlam éziñ a minga jôé na Maata, a nga nyoñe nye e nda jé. 39A nga bili monyañ jôé na Marie a nga zu tabe e mebo me Nti a wôʼô mejô mé. 40Abui minjuʼu yʼésaé e nga bili Maata, e nde a zu a jô na: A Nti, ye jame te teke ndeñele wo na mojañ a liʼi ma me bo ésaé étam? Jôʼô ñhe nye na a volô ma. 41Nti a nga yalane nye na: A Maata, Maata, e nlem ô tyele wo yôp a abui mam da ndeñele wo. 42Ve jame da étam é ne mfi: Marie a tobeya e ngap é ne mvaé ba ye bo te vaa nye je.

Currently Selected:

LUKAS 10: BULU09

Highlight

Copy