YOANES 9

Yésus a bo môt a nga bialé ndim mvoʼé

(Mk 8:22-25; 10:46-52)

1Valé Yésus a lôtôk, ane a nga yene môt a nga bialé ndindim. 2E nde beyéʼé bé be nga sili nye na: A Rabbi, ye môte nyô, ye bebiaé bé, za nye a nga sem, nde a nga bialé de ndim? 3Ane Yésus a nga yalane na: Toʼo môte nyô, toʼo ke bebiaé bé, môt éziñ a nji sem, e ne foʼo ve amu na mimboone mi Zambe mi yené e be nye. 4Bi bili na bi boʼo bisaé bi môt a nga lôme ma e nté môs ô ngenan. Alu da zu, éyoñe môt éziñ a se fe ngule ya bo ésaé. 5Eyoñe me nee si ndône mu, me ne éfufub ya si ndôn. 6Akobô a nga kobô nalé, a tui mendene si, a nga fuʼu étek a menden, a woʼo nye ndoboʼo te e mis, 7a jô nye na: Kele woban étame ya Silôé (nalé a tinane na: Nlôman). E nde ñhe a nga téé, a mane ke woban, a nga bulan a yenek mvoʼé . 8E bôte baa be nye be nga too vôme wua, a ba be mbe be yene nye ôsusua a too nzezak, be nga ke ñhe ba jô na: Ye sa môte nyô e nye a mbe a too ve si a jakéʼé bôte biôm? 9Bôte bevoʼo be nga jô na: Emiene le, e ba bevoʼo ke na teke jôm, baa nye ba funa funan. E môte nyuna ki a jôʼô na: Mamiene foʼo nyô. 10Ane be nga jô nye na: E mise môé ma te kuiban aya? 11E nde a nga yalane na: E môte ba loone na Yésus a nga fuʼu étek, a woʼo me je mis a jô me na, Kele Silôé, ô wobaan. Ake me nga ke, me mane woban, ane me nga yen. 12Ane be nga jô nye na: Môte ate émien a ne vé? Nye na: Me nji yem.

Befarizieñ ba fas ajô mvoʼé ndindim

13E nde be nga kee môt a mbe ndime nyuna e be Befarizieñ. 14E môse Yésus a nga fuʼu éteʼe wu a kui nye mis, ô mbe môse Sabat. 15Ane Befarizieñ be fe be nga sili nye na mis mé me nga kôme bo mvoʼé aya? E nde nye kʼa nga jô be na: A nga woʼo ma éteʼe mis, me mane woban, ayene te ma yene di. 16Ane Befarizieñ bevoʼo bʼéziñ be nga jô na: Môt ate a nji so be Zambe, amu a nji baʼale atiñe Sabat! E ba bevoʼo na: E môt a ne nseme minsem a ne bo bitua bi mam ana aya? Ane nkandan ô nga bo e zañe jap. 17E nde be nga beta jô ndindime na: Wô wo jô ajô dé aya, amu na e nye a te kui wo mis? Ane nye kʼa nga jô na: Kʼa ne nkulu mejô! 18Ve da Beyude be teke yebe ajô dé na a mbe ndim, e nde a nga yen, akekui be nga bañete bebiaé be môte mise me nga yombô. 19E nde be nga sili be na: Ye môte nyô e nye a ne mone wônan mia jô na a nga bialé ndim? A yen éyoñe ji aya? 20E nde bebiaé bé be nga nyoñe nkobô a jô na: Bia yeme na e môte nyô a ne mbiane mone wongan, a na a nga bialé ndim. 21Aval avé a nga yen éyoñe ji, bi nji yem, a za émien ki a nga yooé nye mis, bi teke yem. Silaʼane émien, a nto môt, émien a ye kañete ajô dé. 22Bebiaé be môt ate be nga jô mame ma, be koo Beyude woñ, amu éyoñe te Beyude be maneya kui tyiñe na nge ba ye wôʼô môt éziñ a meme na Yésus a ne Krist, ba ye titane nye aba Zambe. 23Ajô te nde ñhe bebiaé be nga viane kobô na: Emien a nto môt, silaʼane nye minsili.

24E nde ñhe, éyoñe baa, be nga beta loone môt a mbe ndim a jô nye na: Vaʼa Zambe duma; ve mfaʼa wongan, bia yeme na môt ate a ne nseme minsem. 25Ane ndindim ô nga yalane na: Nge a ne nseme minsem, me maa yem kik; e jam dada ma yem e ne ve na me mbe ndim, ve éyoñe ji ma yen. 26E nde be nga beta jô nye na: A nga bo wo jé? A nga yooé wo mis aya? 27Ane a nga yalane be na: Me maneya kañete mia ajô di, ve mi teke yebe; jé éfe e nje mia kômbô beta wôk? Ye na mia fe mi nga kômbô bo beyéʼé bé, nga? 28Ane be nga kpweʼele nye be jôʼô na: Nge wʼô ne ñyeʼé wé, bi bi ne beyéʼé be Môze. 29Mfaʼa wongan, bia yeme na Môze nye Zambe a nga kobô nye, ve nyuna ki bi nji yeme mfaʼa a so. 30E nde môt ate a nga nyoñe nkobô a jô be na: E jame ma semé e ne na mi mi nji foʼo yem e mfaʼa a so, ve nye a te yooé me mis. 31Bia tuʼa fe yeme na Zambe a ne te wôʼô bebo mam abé , ve nge môt a ko Zambe woñ a boʼo fe nkômbane wé, Zambe a wôʼô nye. 32Bi ngenane teke tame wôʼô foé na, môt éziñ a nga yooé e môt a nga bialé ndindime mis. 33Nge e nga ye bo na môt ate a nji so be Zambe, a nji ke ye bo jam éziñe nalé. 34Ane be ke be nga nyoñe nkobô a jô nye na: E wo ô nga bialé e minsem été ngumba ngumba, wo zu yeʼele bia jé? E nde be nga titane nye, be kulu nye nseñ.

Ndim ya Nsisim

(2 Ko 4:3-6; 1 Pi 2:6-8)

35Yésus a nga mane wôʼô na be kuluya nye atan. Eyoñ a nga tôbane nye, ane a nga jô nye na: Ye wo buni foʼo Mone Môt? 36Ane nye kʼa nga yalane na: A ne za a Nti, ane me ne buni nye? 37E nde Yésus a nga jô nye na: Ke ô maneya yene yen nye, amu e nye ate a laane wo nyô. 38Ane a nga jô na: Ma buni, a Nti: e nde a nga kute meboñ si a kañe nye. 39Eyoñe te Yésus a zu jô na: Me nga zu tyiʼi ajô ya si ndône nyô, a ntoo na e bôte be nji yen, be nga yen, a ba ba yene ki be nga viane ku ndim. 40Awôʼô Befarizieñ baa be nye be nga too be wôʼôya mame ma, ane be nga jô nye na: ye na bia fe bi ne mindindime nga? 41Nde Yésus a nga jô be na: Nge mi too bo mindindim, ve mi nji bi nsem. Ve éyoñ ji mia jô na, bia yen, nsem wônan ô tootoo.

Currently Selected:

YOANES 9: BULU09

Highlight

Copy