YOANES 8

1Ane Yésus nye a nga ke e nkôle beôlivié. 2Esala tyé, a nga beta ke Nda Zambe, ane bôte bese be nga zu be nye, a tabe ñhe si, a nga yeʼele be. 3E nde betili bekalate a Befarizieñ ba zu soo minga be nga bi a boʼo mejian , be tele nye e bôte zañ 4a jô Yésus na: A Nyeʼele, ba te bi minga nyuna, a boʼo mejian . 5E kalate metiñ été, Môze a nga bendé bia na bi lum avale binga di mekok; ve mfaʼa wôé wô wo jô aya? 6Be nga kobô nalé be veʼele nye, be bi ngume jame ya boʼolô nye. Ve Yésus a nga viane lumbu si a kañe minten e tyia a ônyu. 7Mbôle be nga yak a kee nye minsili ôsu, e nde a nga nyokane tetele a jô be na: E môte ya be mia a ne teke abé éziñ, nye a tatéʼé ñhe lume minga akok. 8Ane a nga beta fe lumbu si, a kañe minten e tyia. 9Awôʼô be nga wôʼô njôan ôte, be nga ke ba ke wua wua, a taté minnôm mi bôt a kui ba ya susuʼa, mi tele ôsu, Yésus a liʼi étam, minga ki a tele nseñe zañ. 10E nde Yésus a nga nyokane tetele a jô nye na: A minga, be ntoo vé? Ye môt éziñ teke wo ve mekua? 11Ane a nga yalane na: Teke môt éziñ, a Nti. Yésus nye na: Jaʼa ma me nji ve wo mekua, kele ñhe, ve da ataté éyoñe ji, te beta bo abé .

Yésus ya si nyô

12E nde Yésus a nga beta kobô be a jô na: Ma me ne éfufub ya si nyô, e môt a tôñe ma, aa ye ke wulu e dibi été, ve a ye bi éfufub ya ényiñ. 13Ane Befarizieñ be nga jô nye na: Wo tyiʼi womiene mvaʼa, e mvaʼa wo tyik a nji bo bebela. 14Yésus kʼa nyoñe ñhe nkobô a jô be na: Nge ma tyiʼi mamiene mvaʼa, e mvaʼa ma tyik a ne bebela, amu ma yem e mfaʼa ma so a mfaʼa ma ke; ve mia mi nji yem toʼo mfaʼa ma so, toʼo mfaʼa ma ke. 15E mfaʼa wônan, mia tyiʼi mam ntyiʼane ya minsôn, ve me kik me nji tyiʼi ajô môt. 16A nge ma tyiʼi ki ajô éziñ, ntyiʼane wom ô ne bebela, amu me nji bo étam, ve me ne bia Esaa wom a nga lôme ma. 17E kalate metiñe wônane miabebien été, e ne ntilane na e mvaʼa bôte bebaé ba tyik a ne bebela. 18Ma tyiʼi foʼo mamiene mvaʼa, a Esaa wom a nga lôme ma fe a tyiʼi mvaʼa ya be ma. 19E nde be nga jô nye na: Esaa wôé a ne vé? Ane Yésus a nga yalane na: Mi nji yeme ma nge ki Esaa wom; nge mi nga yeme ma, ve nge mi nga ye fe yeme Esaa wom. 20A nga kobô mejô mete a toʼo vôm éwolo akum é mbe, a yeʼeleʼe bôt e Nda Zambe été. Ve môt éziñ a nji bi nye, amu valé awolo dé e ngenane teke kpwaan.

Mfaʼa ma ke, mi voʼo zu wé

21Ane Yésus a nga beta jô be na: Ma zu ke, a mia ye jeñe ma, mia ye mane wu e abé denan été; a na, e mfaʼa ma ke, mi se ngule ya zu wôé. 22Beyude be nga ke ba kobô na, ye a ye wôé émien, éyoñ a jô jina na, e mfaʼa ma ke, mi se ngule ya zu wôé? 23E nde nye ki a nga jô be na: Mi mi ne bôte ya si nyô, me ki me ne môte ya yôp; mi mi ne bôte ya si ndône mu, me me nji bo môte ya si ndône nyô. 24Me kateya mia na mia ye mane wu e minseme mienan été. Amu na nge mia bo te buni na ME NE, mia ye foʼo wu e minseme mienan été. 25Ane be nga sili nye na: O ne ne za? Yésus a nga jô be na, ve jam me nga kobô fe mia ôsusua. 26Me ngenane me bili mam abui ajô denan e me ma yiane kobô a tyik, e môt a nga lôme ma a ne bebela, mamiene ki, e mame me nga wôʼô be nye, mame mete e me ma kobô si nyô. 27Ve da be teke yeme wôʼô na a kobô be ajô ya be Esaa. 28Ane Yésus a nga jô be na: Eyoñe mia ye bete Mone Môt e yôp, éyoñe te mia ye yeme na ME NE, amu me nji bo jam éziñ a mamien étam, ve avale mame Tate a nga yeʼele ma, avale te nde ma kañete. 29Amu na, e Môt a nga lôme ma bia nye bi ne; a ne te liʼi ma étam, ajô te e mam a wôʼô nleme mvaé, e me ma bo éyoñ ése. 30Eyoñe a kobôya mame ma, bôte abui be nga buni nye.

Bebelaa ye bo mia beti

31E nde Yésus a nga jô Beyude be nga buni nye na: Nge mia wulu e ñyeʼelane wom été, mia ye bo beyéʼé bame bebela, 32a mia ye fe yeme jôm é ne bebela, a bebela ate a ye bo mia beti. 33Ane be ki be nga yalane nye na: Bi ne mvoñ bôt Abraham, a bi ngenane te tame bo ôlo môt toʼo môs éziñ; ô ne jô aya na mia ye bo fili? 34Yésus a nga yalane be na: Bebela, bebela foʼo ma kate mia na e môt ase a bo abé a ne ôlo ya abé . 35Olo ô nji tabe nda atabatabe, mone ya nda e nye a tabe atabatabe. 36Ajô te, nge Mon e nye a ve mia éto fili, mia ye foʼo bo fili. 37Ma yeme foʼo na mi ne mvoñ bôt Abraham, ve da mia jeñe na mi wôé ma, amu mejô mam me nji yen éto e be mia. 38E mame me nga yen e be Esaa wom, e me ma kobô; ve mia ki mia bo e mame mi nga wôk e be ésaa wônan.

Esaa wônan a ne Satan

39Ane be nga nyoñe nkobô a jô nye na: Abraham nye a ne ésaa wongan. Yésus nyee be na: Nge mi ne foʼo bone be Abraham, boʼone ñhe mimboone mi Abraham. 40Ve éyoñe ji mia viane jeñe na mi wôé e ma me ne môt me nga kate mia e bebela me nga wôʼô e be Zambe; Abraham a nji bo nalé. 41Mia bo mimboone mi ésoo wônan. Ane be nga jô nye na: Bi nji bialé ébamba bi bili, Esaa wuwua ve Zambe. 42E nde Yésus a nga jô be na: Nge Zambe a too bo mia Esaa, ve nge mi nga ye nyeʼe ma, amu tine jam me nga so é ne be Zambe, a me soya; amu me nji ke so a ngule jam mamien, e nye a nga lôme ma. 43Ve amu jé mi nji yeme wôʼô nkobô wom, foʼo ve amu mia kate wôʼô mejô mam. 44Esaa wônan, a ne Satan, a mia jeñe na mi bo mbia minkômbane mi ésaa wônan. Satan a ne ñwôé bôt aso atataʼa, a nji bi étabaʼa e bebela été, amu bebela a nji bo e be nye. Eyoñ a laa minsos, a kobô mame mé émien, amu a ne nlaaminsos, a ésaa ya minsos. 45Ve ma ma kobô bebela, mi nji yebe ma. 46Za éziñ ya be mia a ne lañe ma ébuʼu yʼajô nsem? Nge ma kate mia bebela, vʼamu jé mi nji buni ma? 47E môt a so be Zambe, a wôʼô mejô me Zambe; ajô te ñhe mi nji wôk, amu mi nji so be Zambe.

Abraham a za bialéʼé, me too

48Ane Beyude be nga nyoñe nkobô a jô na: Ke bia kobô bebela ane bia jô na ô ne mone Samari, a na ô bili mbia nsisim ? 49E nde Yésus a nga yalane na: Me nji bi mbia nsisim , a ma ko Esaa wome woñ, ve mfaʼa wônan, mia biasé ma. 50Mfaʼa wom, me nji jeñe duma dam; e môt a jeñe de, a tyiʼi fe mbamba mvaʼa a ne. 51Bebela, bebela foʼo, ma kate mia na, nge môt a baʼale mejô mam, aa voʼo yen awu akekui nnôm éto. 52Ane Beyude be nga jô nye na: Eyoñe jina ñhe bi yemeya foʼo na ô bili mbia nsisim . Abraham a wuya, bekulu mejô fe, ve wô wo jô na, nge môt a baʼale mejô mam, teke na a ye veʼele tyeʼé jam éziñe ya awu akekui nnôm éto. 53Ye wo dañ ésaa wongan Abraham, nye a nga wu? A bekulu mejô be nga mane wu? Wo kômbô tele telé womien été évé? 54E nde Yésus a nga yalane na: Nge ma ve mamiene duma, e duma dam e ne zezé; Esaa wom e nye a ne môt a ve me duma, e Nyô mia jô na a ne Zambe wônan, 55ve mi nji yeme nye, ma ma yeme nye. A nge ma jô na me nji yeme nye, ma ye bo nlaa minsos, aval ane mia. Amu ma yeme nye, me baʼaleʼe fe mejô mé. 56Abraham a nga jaé a mefôn amu na a ye yene môse wom; ane a nga yen wô, a nga fôn. 57E nde Beyude ki be nga jô nye na: Mimbu mewôm metaan ô ngenane teke bi, ve Abraham nye ô nga yen? 58Ane Yésus a nga jô be na: Ma bele foʼo ane ma jô mia na, te yen Abraham a za biaéʼé, me me too. 59E nde be nga nyoñe mekok na ba lume nye. Ane Yésus a nga sobô, a kolô Nda Zambe été.

Currently Selected:

YOANES 8: BULU09

Highlight

Copy