YOANES 7

Bobenyañ be Yésus be nji buni nye

1E mvuse mame ma, Yésus a nga ke a lôtan e Galilé; a nji fe kômbô wulu e Yudé amu Beyude be mbe be jeñe na be wôé nye. 2Valé étôkan Beyude ba loone na bibem é nto bebé, 3e nde bobenyañe bé be nga jô nye na: Kôlôʼô mu, ô ke Yudéa, beyéʼé bôé be yene ñhe fe e mame wo bo. 4Amu na, môt éziñ a se ngule ya bo jam asoé nge a jeñe na a yené; e vôme wo bo e mame ma, litiʼi womiene bôt. 5Bobenyañ be mbe foʼo teke buni nye. 6E nde Yésus a nga jô be na: Eyoñ jam é ngenan te kpwaan, ve éyoñ jenan é ne nkôman kom ése. 7Bôte ya si nyô be se ngule ya siñe mia, ve ba siñe ma, amu ma tyiʼi mvaʼa na mimboone miab mi ne abé . 8Mfaʼa wônan, betan, mi ke abôk; ve mfaʼa wom maa ye ke tame bet a ke abôʼô te, amu éyoñe jam é ngenane te kpwaan. 9Eyoñ a maneya kobô nalé, ane nye a nga liʼi a too e Galilé.

Yésus a ne abôʼô bibem

(Lv 23:34-43)

10Ake bobenyañ be nga mane ke abôk, ane nye fe a nga téé a ke, sa éngengeñ, ve aval ane asoé. 11Beyude be nga ke ñhe ba jeñe nye abôk été be jôʼô na: A ne vé? 12Abui menyiñ e nga bo ñhe e bôte bôt ajô dé. Bevoʼo be jôʼô na a ne mbamba môt, ba bevoʼo na, tekeʼé, a viane yale bôt zene fe. 13Ve môt éziñ teke kobô ajô dé bôte be wôʼôk amu be ko Beyude woñ. 14Eyoñ abôʼô e nto ézezañ, ane Yésus a nga a zu nyiin e Nda Zambe, a nga yeʼele bôt. 15E nde beyude be nga semé be jôʼô na: Zʼavale ñyemane môte nyô a yeme mintilane di, nye teke mie yeʼé! 16Ane Yésus a nga nyoñe nkobô a jô na: Miñyeʼelane miam mi nji bo émiam, ve mi mi môt a nga lôme ma. 17Nge môt éziñ a kômbô bo nkômbane wé, a ye yem a miñyeʼelan, nge mia so be Zambe, nge ke na ma kobô ajô dame mamien. 18E môt a kobô ajô dé émien, a jeñe fe ve duma dé émien; ve nyô ki a jeñ duma môt a nga lôme nye, e nye a ne bebela, a ékotekot éziñ é nji bo be nye. 19Ye sa Môze nye a nga ve mia metiñ? A teke môt éziñe ya be mia a bo ane metiñ mete ma jô. Amu jé mia jeñe na mi wôé ma? 20E nde bôt be nga yalane na: Mbia nsisim a bili wo, za a jeñe na a wôé wo? 21Ane Yésus a nga nyoñe nkobô, nyee be na: Me nga bo ve jame da, nde mia bese mia semé. 22Mbôl Môze a nga ve mia atiñ ntyiʼan atyel, akôsa bo e nji so be Môze, e nga so e be bôbetô, e nde mia tyiʼi môt atyel jaʼane e môse Sabat. 23Nge môt a tyiʼiban atyel e môse Sabat, a nji tyam atiñe Môze, ve amu jé mia viane wôʼô ôlun a yaa ma amu na ma ke bo ngumba môte mvoʼé e môse Sabat! 24Te mia tyiʼi mejô e ñyenane ya mis, ve tyiʼane mejô zôsôô ntyiʼan.

Ye nyuna a ne Krist

25Bôte ya Yérusalém bevok be nga jô na: Ye sa môte nyuna nye ba yi na be wôé? 26Ke mia yen ane a kobô éngengeñ, be teke nye jô jôm. Ye bejôô nlam be yemeya bebela na e nye a ne Krist? 27E môte nyô bia kôme yem e mfaʼa a so; ve Krist kik, éyoñ a ye so, tekeʼe môt a ye yem e mfaʼa a so. 28Ane Yésus a nga yôtan, a yeʼeleʼe bôt e Nda Zambe été, a jô na: Ma foʼo mia yem, mi yeme fe mfaʼa ma so; ve me nji so asu dam mamien; amu môt a nga lôme ma a ne bebela, e nye mi nji yem. 29Ma ma yeme nye, amu ma so be nye, a e nye a nga lôme ma. 30Bôte be nga jeñe ñhe na be bi nye, ve môt teke futi nye mo e nyôl, amu awolo dé e ngenane te kpwaan.. 31E nkunda bôt été va, abui e nga buni nye, be jôʼô na: Krist émien, éyoñ a ye so, ye a ye bo bitua bi mam bia dañe e bi môte nyuna a boya!

Bʼôkeminlôman ba ke bi Yésus

32Eyoñe Befarizieñ be nga wôʼô nkunda bôt wo ke wo nyiñe mame mete, ane bivet Betuni a Befarizieñ be nga lôme bôte na be bi nye. 33E nde ñhe Yésus a nga jô na: Me ngenane ve mon étun éyoñ, bia be mia, me bulan e be môt a nga lôme ma. 34Mia ye jeñe ma, teke yene ma, a e vôme ma ye tabe, mi se ngul ya zu wôé.. 35Beyude be nga ke ba kobô zañe jab na: E môte nyô a kômbô ke avale vôm avé na bi bo te yene nye? Ye a zu ke e be ba be nga mane mialan e be, Begrék, a tame fe ke yeʼele Begreek? 36Jé é ne avale nkobô a kobô di na, Mia ye jeñe ma, mi teke yene ma, a na, e vôme ma ye tabe, mi voʼo zu wôé?

Asôé bevevee mendim

37E môse wo suʼulan, e ñwô wo dañe beta môse ya Abôk, ane Yésus a nga kôlô si a yôtane na: Nge môt a wôʼô évé, a zaʼa be ma a zu nyu. 38E môt a buni ma, aval ane Ntilane wo jô: Asôé mendime ma ve ényiñ da ye kui nye abum été. 39Ve a nga jô nalé a kobôʼô ajô ya Nsisim bôte ba buni nye ba ye nyoñ. Valé Nsisimi a ngenane te bo, amu éyoñ éte Yésus a ngenane te nyoñe duma.

Bôt ba kandane zañ ajô Yésus

40E nkunda bôt été va, éyoñe bôte be maneya wôʼô mame ma, be nga ke ba jô na: E môte nyô a ne foʼo nkulu mejô bebela. 41E bôte bevoʼo na: E môte nyôna nye a ne Krist, e ba bevoʼo ke na, ye Krist a ne so e mfaʼa ya Galilé? 42Ye Mintilan mi nji jô na Krist a ye so e mvoñe bôte David, e Bétéléhém, nlame David a nga too? 43Ane bôt be nga kandan a bo metyiñ metyiñ ajô dé. 44Bevoʼo ya été be nga jeñe na be bi nye, ve môt éziñ teke bete nye mo nyôl. 45E nde ñhe bekeminlôman be nga bulan e be bivet betuni a Befarizieñ, ane be nga jô bôte bete na: Amu jé mi nji soo nye? 46E nde be nga yalane na: Môt éziñ a ngenane te yeme nkobô avale ane môt ate. 47Ane Befarizieñ be nga yalane be na, ye mia fe mi maneya duʼuban? 48Za éziñ ya betebe ôsu nge Befarizieñ a buniya nye? 49Ke foʼo ve zezé babôtô a ne te yeme metiñe nyô, mbe be ne biyoʼé. 50Eyoñe te Nikôdem, e môt a nga tame taté ke be Yésus ôsusua, a too fe wua ya be be, a nga jô be na: 51Ye metiñe mangan me ne tyiʼi ajô môt, te taté wôʼô nkobô wé a yeme jam a nga bo? 52Be nga yalane nye na: Ye wo fe ô ntoo môte ya Galilé? Tame tuʼa fas ô yene na nkulu mejô a ne teke so e Galilé.

Minga mejian

(Sam 50:16-21; Rm 2:1-3,17-23)

53E nde be nga téé môt ase a kele nda jé.

Currently Selected:

YOANES 7: BULU09

Highlight

Copy