YOANES 13

Yésus a sôbe beyéʼé mebo

(Lk 22:1-6; Mk 10:43-45)

1E nde ñhe, ôsusua abôʼô Pak, Yésus a nga yeme na awolo dé e kpwaneya na a kôlô si ndône nyô a bet e be Esaa, a nga nyeʼe bôte bé ya si ndôn, ane a nga nyeʼe be akekui asuʼulan. 2Valé be jaʼak mame ngôʼé, éyoñe te Satan a nyineya nlem Yudas mone Simon Iskariôt, na a koñe nye, 3amu Yésus a nga yeme na Esaa a nga ve nye mam mese e mo été, a na a nga so be Zambe a bulane fe ke e be Zambe, 4ane a nga kôlô si e ndiane zañe va, a vaa ayab ngômesan ya yôp, a nyoñe aboñ éyé a tiñeti de angeteñ. 5E nde a nga sôôé mendim e fandé, a nga ke ñhe a sôbe beyéʼé bé mebo a fimine me a aboñ éyé ya angeteñ. 6Eyoñ a nga ke kui e be Simon Pierre, ane Simon a nga jô nye na: A Nti, ye wo wo viane sôbe ma mebo? 7Ane Yésus a nga nyoñe nkobô a jô na: E jame ma bo, ôô voʼo de yem éyoñe ji ve wo ye suʼulane yeme wôʼô de e melu ôsu. 8Ane Pierre a nga jô nye na: Teke foʼo mone bebé na wo ye sôbe ma mebo! E nde Yésus ki a nga yalane nye na: Nge me nji sôbe wo mebo, wôna ô nji bi ngab e be ma. 9Eyoñ éte Simon Pierre a zu jô nye na: A Nti, saa ve mebo étam, ve nalé fe mo a nlô bise. 10Ane Yésus a nga jô nye na: E môt a maneya woban, a yiane foʼo sôbe ve mebo, étam, amu a ne mfuban nyôl ése. Mfaʼa wônan, mi ne mfuban , ve sake mia bese. 11Amu a mbe a yemek e môt a ye koñe nye, e nde a nga jô na, sake mia bese mi ne mfuban . 12Eyoñ a maneya sôbe beyéʼé mebo, ane a nga beta jaé ngômesane jé wé a ke tabe si. E nde a nga kee nkobô ôsu a jô be na: Ye mia tuʼa wôk e jam ma mane bo mia di? 13Mia loone me na: Nyeʼele, a Nti, mia bele, amu me ne foʼo bie. 14Nge ma sôbe mia mebo, ma Nti a Nyeʼele, mia fe mia yiane sôbane mebo wua a nyô mbok.. 15Amu ma te ve mia éveʼelaʼa na avale ma te bo mia, mia fe mi bo nalé. 16Bebela, bebela foʼo ma kate mia nyô na, mbo ésaé a nji dañe masa wé, nalé fe nke nlôman te dañ môt a nga lôme nye. 17Nge mia tuʼa yeme nalé, mi ne ébotan nge mia bo mam mete. 18Me nji kobô ajô mia bese. Mamien ma yem e bôte me nga top. Ve da ntilan wo yiane tôéban na: E môt a nga di bidi biam a nga tibi ma étimekili jé. 19Ve ma kate mia de éyoñe ji, jam ebien e ngenan te boban, na, éyoñ da ye boban, mi buni na ME NE. 20Bebela, bebela foʼo, ma kate mia na, nge môt éziñ a nyoñe môt ma lôm, a nyoñe fe mamien, a e nyô ki a nyoñe ma, a nyoñe fe môt a nga lôme ma.

Yésus a kulu ajô nkoñane wé

(Mt 26:20-25; Mk 14:17-21; Lk 22:21-23)

21Eyoñe Yésus a maneya kobô mam mete, ane nlem ô nga juʼulane nye abum été, ane a nga tuʼa jô ne ngeññ na: Bebela, bebela émien, ma kate mia na, wua ya be mia a ye koñe ma. 22Beyéʼé be nga ke foʼo ba fomban, be teke yem za nye a jôô nye. 23Nyeʼé wua, e nyô Yésus a mbe a nyekeʼe, a nga too nye fefe, a yeʼe nye tôé. 24E nde ñhe Simon Pierre a nga feb nye wo a jô na: Siliʼi môt Yésus a jôô nye. 25Ane nye ki a nga sili, a yeʼe Yésus e tôé a jô nye na: A Nti, a ne za? 26E nde Yésus a nga yalane na: A ne môt ma ye ve nduban éfuse belet. A dube ñhe éfuse belet, a nyoñé a ve je Yudas mone Simon Iskariôt. 27Nnéé ane a nga mane nyoñe éfuse belet, ane Satan a nga nyiin e be nye. E nde Yésus a nga jô nye na: E jam wo bo, boʼo dʼavô. 28Ve jame te ese, teke môt éziñ ya ba be mbe valé a nga yem amu jé a nga jô nye nalé. 29Ajô te, mbôl Yudas nye a nga bili nkop, bôte bevok be nga siʼako na Yésus a jô nye na, kele kuse biôme ya abôk, nge na vaʼa bingôngol bi bôt jôm éziñ. 30Eyoñ a nyoñeya éfuse belet, e nde a nga kui atan été été, éyoñ éte alu e vineya.

Mfefé atiñ

(Mt 22:34-37; Mk 12:28-34; 1 Jn 4:7-11)

31Eyoñe nye a keya, ane Yésus a nga jô na: Eyoñe jina Mone Môt a nyoñeya duma, Zambe a nyoñeya fe duma e be nye. 32A nge Zambe a nyoñeya duma e be nye, Zambe émien a ye fe ve nye duma, a ye ve nye duma te anaʼana. 33A ayôme bon dam, me ngenan bia be mia ôyôme mon nté; mia ye jeñe ma; aval me nga kobô Beyude na, e vôm ma ke, mi se ngul ya zu, avale te fe ma kobô mia éyoñe ji. 34Ma ve mia mfefé atiñe na, nyeʼesaʼané, aval ane me nga nyeʼe mia, nalé fe mia mia nyeʼesaʼané. 35E jame di nde bôte bese ba ye yeme na mi ne foʼo beyéʼé bam, nge mia nyeʼesan e zañe jenan, wua a nyu mbok.

Pierre a katee Yésus

(Mt 26:31-35; Mk 14:27-31; Lk 22:31-34)

36Ane Simon Pierre a nga jô Yésus na: A Nti, wo ke ke vé? E nde Yésus a nga yalane na: E vôm ma ke, ô se ngul ya tôñe me wé éyoñe ji, ve melu ôsu, wo ye zu wo tôñe ma e mvus. 37Ane Pierre a nga jô nye na: A Nti, amu jé me se ngul ya tôñe wo éyoñe ji? Ma ye ju ényiñe jam e butane wo. 38Ane Yésus a nga yalane na: Ye wo ye ju, ényiñe jôé a butane énjam? Bebela, bebela émien foʼo ma kate wo na, nnôme kub a ngenan te loñ, wo ye kate ma biyoñ bilaa.

Currently Selected:

YOANES 13: BULU09

Highlight

Copy