YOANES 12

Marie a woʼo Yésus mbon

(Mt 26:6-13; Mk 14:3-9; Lk 7:36-38)

1Pak é ngenan ôsu melu mesaman, e nde Yésus a nga ke e Bétani, e vôm Lazar a mbe, e môt Yésus a nga wômôlô e miñwuan. 2Ane be nga mane yame nye bidi bi ngôʼé, Martha a nga belane be, Lazar ki a too wua ya bôte baa be nye be mbe be jaʼak. 3E nde Marie a nga nyoñe mbon ôlobinda naléda, étune kili, abeñe dia mbon, a nga woʼo wô Yésus e mebo, a fimi fe nye mebo a ésile jé. Nda ve mane jaé a menyum mʼôlobinda. 4Ane Yudas Iskariôt, wua ya beyéʼé bé, e nyô a ye koñe nye, a nga jô na: 5Amu jé be nji kuane mbon ôlobinda wu tañe bedenié mintete mila a ve bingôngole bi bôt? 6A nga kobô nalé sake amu na a mbe a mvamaʼane bingôngole bi bôt, ve amu a mbe ñwuwup, a bili fe nkob moné, a bo a maneʼe nyoñ e jôme ba futi été. 7E nde Yésus a nga jô na: Jôkéʼé nye, a bo jame te asu éjamembime jam. 8Amu na mi bili bingôngole bi bôt éyoñ ése, ve mi nji bi ma éyoñ ése. 9Bizuʼu Beyude abui bi nga yeme na a ne valé, ane be nga ke, sake ve asu Yésus étam, be kele fe na be yen e Lazar a nga wômôlô e miñwuan. 10Minlô Betuni be mbe fe be jeñe na ba wôé Lazar, 11amu ajô dé e nde Beyude abui be mbe be liʼi be a buni Yésus.

Nyiane ndañan Yésus e Yérusalém

(Mt 21:1-11; Mk 11:1-11; Lk 19:28-40)

12Tyé kpwa, abui bizuʼu bi bôt bi nga zu abôk, awôʼô bi nga wôʼô na Yésus a ke e Yérusalém, 13ane be nga nyoñe mintem melen, a ke tôbane nye, be yôtaʼane na:

Hôzana:

Ebotan a nyô a zu a jôé Nti,

Njô nnen ya Yésraél.

14Ayene Yésus a nga yen mon éjakas, e nde a nga tabe je yôp, aval ane ntilan ô ne na:

15Te ko woñ, a ngone Siyôn, ô lôô,

njôô nnen wôé le a zu,

a bete mon éjakase yôp.

16Beyéʼé bé be nga bo teke jiʼa yeme mame mete, ve éyoñ Yésus a maneya nyoñe duma, éyoñ éte ba zu simesane na mame mete me mbe ntilan, ajô dé, a na be nga bo nye mam mete. 17E nkunda bôt baa be nye be nga too éyoñ a nga ke loone Lazar a wômôlô nye e miñwuan, ô nga tuʼa ñhe kañete de. 18Ajô te ñhe éndundumba bôt é nga ke tôbane nye, amu be nga wôʼô nlañ étua jam éte. 19Ane Befarizieñ be nga ke ba jô bee be na: Ye mi lôô foʼo na mi nji bi mfi éziñ été! Ke bôt ya si ése ba ke ba tôñe nye!

Begrék bʼéziñ ba jeñ Yésus

20E bôte be nga bet na ba zu kañe Zambe abôʼô te, Begrék be mbe été. 21E nde bôte bete be nga subu Filip bebé, môte ya Béthsayid ya Galilé, a sili nye na: A Monti, bia kômbô yene Yésus. 22Ane Filip a nga ke kate André, André baa Filip ki be ke de kate Yésus. 23E nde Yésus a nga nyoñe nkobô a jô be na: Awolo Mone Môt a yiane nyoñe duma e kpwaneya. 24Ma bele foʼo ane ma jô mia na, nge fes ôvuʼu ja bo teke si a wu, fes éte ja langan étam; ve nge ja wu ki, ja wum bibuma abui. 25E môt a nyeʼe ényiñe jé a jañele je, ve nyô ki a vini ényiñe jé e si ndône mu a ye baʼale je asu ényiñe ya melu mese. 26Nge môt a bo ma ésaé, a zaʼa tôñe ma, a vôm me too, mbo ésaé wome fe a ye tabe valé; nge môt a bo ma ésaé, Tate a ye nyeʼe nye.

Mone Môt a yiane beteban e yôp

27Eyoñ ji nlem wom wo kpwemetan mʼabum, me me jô aya? Ye na: A Tat, nyiʼi ma été me tele awolo dina ji? Ve jame te foʼo e nde me nga zuu de a zu kui awolo di. 28A Tat, vaʼa jôé dôé duma. Ane tyiñ é nga so yôb na: Me wumuluya de, a ma ye fe beta wumulu de. 29Nkunda bôt ô nga tele valé ô wôʼôk nkobô ôte, ô nga jô na zoʼoyañ ja te bam, e ba bevoʼo ke na éngele a te zu kobô nye. 30Ane Yésus a nga nyoñe nkobô a jô na: Tyiñe nyô é nji so asu dam, ve asu denan. 31Eyoñe jina ajô ya si nyô e tyiʼiya, éyoñe ji njôô ya si ndône nyô, a zu wuaban atan. 32Ve mfaʼa wome ki, éyoñe ma ye kôlô si a betebane yôp, ma ye dutu bôte bese, be zu be ma. 33A nga kobô jame te a liti aval awu avé a yiane wu. 34E nde babôtô a nga yalane nye na: Bi bi nga wôk e Kalate metiñe na Krist a ye langan a too e nnôm éto, ve wô wo jô aya na Mone Môt a yiane beteban e yôp? Mone Môt ate a ne za? 35Ane Yésus a nga jô be na: Mon éyoñ a liʼiya tyôtyoé éfufub é to be mia; wulaʼane ñhe nté mi bili éfufup, dibi e za bi mia; amu môt a wulu e dibi été a nji yem e mfaʼa a ke. 36Nté mi bili éfufup, bunaʼan éfufup éte, nde te mia ye bo bone ya éfufup. Eyoñe Yésus a maneya kobô mejô mete, ane a nga jañe be e mis.

Ayete minlem Beyude

(Dt 18:18-19)

37Akôsa mane bo akaʼa abui mendem di e mise mab été, ve be teke buni nye, 38nde mejô me nkulu mejô Ezayi ma ye tôéban ane a nga jô na:

A Nti,

za a nga buni foé jangan?

A na:

ngule ya mbonnômô Nti é nga yené e be za?

39Ajô te be nga bo te ngul ya buni, amu Ezayi a nga jô fe na:

40A nga ve be ndim e mis,

a bo be ayete minlem,

be za yen a mise map,

a bi feʼe minlem, a kôñelan,

ane ma ye saé be.

41Ezayi a nga kobô mejô mete amu a nga yene étôtoʼo jé, a kobô fe ajô dé! 42Akôsa bo nalé, abui ya minlô mi bôt be nga buni nye, ve be nga bo te mem nalé amu be nga ko Befarizieñ, woñ be za titane be Aba Zambe. 43Amu be nga viane nyeʼe duma bôt a dañe duma ya be Zambe.

Ntyiʼan ajô amu mejô me Yésus

44Ane Yésus a nga yôtan tyiñe yôb a jô na: E môt a buni ma, a nji buni ma, a buni môt a nga lôme ma, 45a nyô a yene ma a yene Nyô a nga lôme ma. 46Ma me ne éfufub, me nga zu si ndône na e môt ase a buni ma a bo te langan a too e dibi été. 47A nge môt éziñ a wôʼô minjôane miam, ve te baʼale mie, sake ma ma tyiʼi ajô dé, amu me nji ke so na ma zu ve si nyô mekua, me nga so na me zu nyii si ndôn. 48E nyô a bene ma, teke nyoñe minjôane miam, a bili môt a tyiʼi ajô dé: Mejô me maneya kobô, e me ma ye tyiʼajô môt ate e môs yʼasuʼulan. 49Amu na mejô mam me nji so e be mamien, ve Tate wom a nga lôme ma, émien nye a nga bendé ma jam ma yiane jô a jam ma yiane kobô. 50A ma yeme na atiñe dé e nde e ne ényiñe ya nnôm éto. Ajô te, mejô ma kobô, ma kobô me aval ane Tate a nga jô ma.

Currently Selected:

YOANES 12: BULU09

Highlight

Copy