MIMBOONE MINLÔMAN 19

Paul a ne Eféze, bôt bʼôsu ba duban

(Mm 8:14-17; 5:15-16; Rm 15:25-27)

1Melu Apôlôs a nga to Koréñt, mme Paul a nga suane Eféze. A nga tyii e zene mefôla me si ya minkôle yôp. Valé a nga koone beyéʼé bʼéziñ, 2a sili be na: Ye mi nga nyoñe foʼo mfufube Nsisim éyoñ mi nga bo bebuni ? Ane be nga yalane nye a jô na: Ye bi nga tame wôʼô wôʼô be kobôʼô ajô Mfufube Nsisim. 3Paul a nga sili na: Nduan ôvé ñwô mi nga nyoñ? Be nga yalane nye na: Nduane Yôanes. 4Ane Paul a nga beta nyoñe nkobô a jô na: Yôanes a nga bo bôt nduane ya nkôñelane minlem, a sili be na, be buni môt a ye zu nye mvus, e ne na Yésus. 5Ane be nga wôʼô nye, a nyoñe nduan a jôé Nti Yésus. 6Paul a nga beté be mo. Ane Mfufube Nsisim a nga zu e be be. Be nga kobô minkobô mife a kulu mejô. 7Be nga too bese bebé bôt awôm a bebaé.

Esaé Paul Eféze

8Paul a nga bo a kele aba Zambe ya Beyude bebé ngon élal ése, a kobôʼô bôt a ngul ése ajô éjôé Zambe. A mbe a jeñe mezene mese ya dutu bôt a nga kobô be. 9Bôte bevok be nga bo minleme ayet te ngule ya dutuban. Be nga viane tuʼulane ajô Zambe e zañe bôt. Paul a nga kandane be a dutu beyéʼé vôme wob étam, a yeʼele be Ajô Zambe môs ôse aba sikôlô ya Tiranôs été. 10Nalé a nga tabe mimbu mibaé akekui bôte bese ya Azi, Beyude a Begrék, be nga kui abime ya kôme wôʼô mejô me Zambe.

11Zambe a nga ve Paul ngule ya bo bitua bi mam. 12Be nga kui vôme ya bo bie minkôkon, a belane jaʼane bennebeken a biyé bi nga nambe nyôle jé. Bôte bete be nga saéban, a mimbia minsisim mi nga kôlô. 13Mingengañe Beyude mi nga wulu e minlame minlam, mie fe mi nga veʼele kobô bôt be nga bili mimbia minsisim a jôé Nti Yésus, be jôʼô na bia jô mia a jôé Nti Yésus Paul a kañete! 14Bone zamgbwale be beta ntuni ya Beyude, Séva, be nga veʼele bo nalé e be bebien. 15Ane mbia nsisim a nga kobô a jô na: Yésus ma yem, ma yeme fe môt a ne Paul, ve mia mi na beza? 16Eté été, môte mbia nsisim a nga too be nye a nga jimbi be a ngul. Ane be nga tup be too bebé ane minsoé, menyôle kpwetan a meveñ. 17Bôte bese ya Eféze, Beyude a Begrék, be nga mane wôʼô beta ajô nyô. Woñ ô nga bi be minlem. Ane be nga kañe anene ya jôé Nti Yésus.

18E jama bôt a nga buni a nga kobô tyiñe yôp a ve mintiñetane ya mimboone miap. 19Abui bôt e nga tôñe mame ya mebiañ e nga kôane bekalate bap a diʼi be nduan, bôte bese be lôô. Eyoñ ba fase tañe ya bekalate bete, ba yene na, be ne kui moné tañe toyini mewôm metan. 20Nde amu ngule Nti, ajô Zambe e nga fôé a bo ngul.

Mendum ma bo Eféze a Paul a kôlô

21Mvuse ya beta be mam mete mese, Paul e nsisim été, a nga nyoñe ntyiʼane ya ke Yérusalém a lôte Masédôan a Akayi. A nga kobô na: Nge me kele wé, da ye bo mvoʼé na me beta ke Rôme. 22Ane a nga lôme Timôté baa Eraste Masédôan, be mbe bevolô bé. Ve émien a nga ke ôsu a tabe ôbe nté Azi. 23Melu mete mme ôbe abui ézezam ô nga boban ajô zen éte. 24Môt éziñ, nlui biôme bi or, ba loone nye jôé afe na Démitrius, a nga bo a lôñe menda me zambe Artémis a moné. A nga volô mintyetyeñe na mi bi ébeʼe beʼe moné. 25Ane a nga sulane mintyetyeñe bebo bisaé mié, a ba bese be nga bômane nye, a jô be na: Mia yem a bemvôé bam na, nne mvolane wongane wo so ve ésaé bia bo ji. 26Ve mia bese mia yen a wôk, sa ve Eféze étam, ve ngume Azi ôse na, Paul nyô, a fôʼô jama bôt. A yeʼele be na, bezambe bia lui a mo mangan, be nji bo bezambe. 27Ajô te sa ve asu ésaé dangan étam nde da ye biaséban, ve nalé fe duma ya ndaa beta zambe minga, Artémis#19:27 Artémis: nge na Diane. da ye bo momo, e zambe bôte bese ya Azi a si ése ba kañ.

28Eyoñ be nga wôʼô nkobô te, be nga yaa a dañe bete metyiñe yôp a jô na: Artémis ya Eféze a ne anen. 29Ane zôʼé é nga yiane tison ése. Ane bôt abui be nga ke mimbil e nda bivôé, a bi bôte bebaé ya Masédôan be nga wulu nsamba Paul. E ne na, Gayius ba Aristark. 30Paul a mbe nkômane ya ke ndôbaʼan. Ve bebuni be nji kañese. 31Bemvôé bevoʼo ya Azi be nga lebe nye na, a bo te veʼele ke nda bivôé. 32Ekôan été, môt ase a nga yôtan, te wôʼô jôme nyô mbok a jô, avale ya na, abui bôt e mbe te yeme yem amu jé be nga sulane ékôan. 33Bôt bʼéziñe ya ékôan, be nga ve Alékzandre fek, nye Beyude be nga telé ôsu viap. Ane Alekzandre a nga fep ékôane bôt wo na, a kômbô faé be éfufup. 34Ve éyoñe be nga yeme na a mbe mone Beyude, bese be nga zametan a yôtane tyiñe jia, bebé tañe mewolo mebaé, be jôʼô na: Artémis ya Eféze a ne anen! 35Akôsa bo nalé, ntili bekalate a nga kui vôme ya jeʼe ékôan a mejô mana na: A bôte ya Eféze, ye môt éziñ a ne dimi na, tison Eféze é ne mfufube tison e beta zambe Artémis, a beta éveʼela wé a nga ku a soʼo yôp? 36Amu éyalane ya nsili wu é ne teke bisô. Mia yiane volôbane minlem, a saʼale mbia mimboon. 37E bôte mia te bi, a zuu be va, be nji bo mbia jam ya biasé nye. 38Nge Demétrius a mintyetyeñe bebo bisaé ba tôñe nye, be bili mejô a môt éziñ, meba mejô me ne. Bejô bôt be ne. Be kele ñhe nda mejô. 39A, nge mi ngenane mi bili mam mefe ya fas, ajô da ye tyiʼi ékôan é ne ntelan. 40Bi ne bebé ya bi bijô bi nzametaʼan amu ékôane ya dene ji. Amu bi nji bi amu ya ndôkaʼane bôte nyô. 41Eyoñ a nga mane kobô nalé, ane a nga suu bôt be ke.

Currently Selected:

MIMBOONE MINLÔMAN 19: BULU09

Highlight

Copy