MIMBOONE MINLÔMAN 18

Mbamba Foé a nyoñeban e Koréñte

(1 Ko 1:1-9; 2:1-5; 2 Ko 11:5-12; 12:12-13)

1Eyoñe Paul a nga kôlô Aténe, a nga ke Koréñte. 2Ane a nga tôbane mone Beyude wé, a too jôé na Akilas, môte ya Poñ, a ndôme so Italie, ba minga wé Prisile, amu njô bôte Claude a nga ve atiñe na, Beyude bese be kôlô Rôme. Paul a nga ke yene be. 3A, amu a mbe a yeme asu ésaé dap, asu ésaé ya tiñe bindelé, a nga tabe e nda jap, a boʼo ésaé te valé. 4Sabat ase, a nga nyoñe nkobô, a ve ngule ya dutu Beyude a Begrék. 5Ve éyoñe Silas baa Timôté be nga so Masédôan, Paul a nga ve éyoñe jé ése mfaʼa ya nkatane Mbamba Foé. Nlô éfia ya kobô e zañe Beyude ô too ve na: Mesie nye a ne Yésus. 6Eyoñe Paul a nga yen ane ba wosane nye a taa nye, a nga samese mengômesane mé a jô be na: Metyi menane me tabeʼe mia minlô. Me seke fe ajô. Ataté éyoñe ji, ma ye ke be meyoñe bikuu. 7Nkôlane ya valé, a nga ke e be môt, be loʼone nye jôé na Titus Yustus, nkañe Zambe. Nda jé é too fefele aba Zambe Beyude. 8Gripus, évete ya aba Zambe Beyude, a nga buni Zambe a nda jé ése. Bekoréñtieñ abui, éyoñe be nga wôʼô bisulan bi Paul, be nga kôñelan a bo bebuni , a duban. 9Wôna alu éziñ, Nti a nga kui Paul nlô a jô nye na: Te ko woñ, kele ôsu a kobô, te tabe évô. 10Amu me ne be wo. A teke môt éziñ a ye nambe wo mfaʼa ya bo wo mbia jam. Amu jama bôt a ne mvebane be ma e tisone nyô. 11Ane Paul a nga tabe été tañe ngume mbu a ngon ésaman, a yeʼeleʼe mejô me Zambe.

Paul a kate étom asu Galioñ

12Melu njôô bôte ya Akayi a nga too, Beyude abui be nga fulan, a wosane Paul. Ane be nga ke somane nye e nda mejô. 13Be nga boʼolô nye na: Môte nyô a kee bôt e ñyebe Zambe ô nji bo ane metiñ. 14Eyoñe Paul a nga ye kobô, ane Galioñ a nga yalane Beyude a jô na: Nge ajô di e nga ye bo étom éziñ, nge ntyamane atiñ , me nga ye nyoñ ésomane jenan a mia Beyude! 15Vʼamu mintañete mienan mia nnambe ajô ñyeʼelan, ajô môé a metiñe menan, ajô te da fombô mia. Ma, me voʼo tyiʼi avale ajô di. 16Ane a nga vaa ajô te nda mejô. 17Ane bese be nga bi Sostén, évete ya aba Zambe Beyude, a woʼo nye ébôm e nseñe nda mejô. Ve njô bôte Galioñ teke veʼele kee dis.

Paul a lôte Antiôche a ke a beta bo ésaé

(Mm 21:23-26; 20:16)

18Paul a nga beta tabe ôbe nté Koréñt, ane a nga liʼi bobenyañ a ke Siri, baa be Prisile a Akilas. A nga tyeñebane nlô e Sañkré, amu a nga bo ntiñetan éziñ. 19Ane be nga ke Eféze, vôme Paul a nga kandane bôt ba be nye be nga ke nsamba. Ve nye, a nga ke aba Zambe Beyude a kobô be. 20Be nga buʼu nye a beta tabe ôbe nté e be be. Ve a nga ben. 21Eyoñ a nga kôlô, a nga jô be na: Ma ye beta zu e be mia nge Zambe a kañese. Ane a nga fubu sitima Eféze, 22ane a nga ke Sézaré a ke batane Keké, a suʼulane ke Antiôche. 23E wé, a nga tabe ôbe nté. A nga beta bulane afôla ya Galate a Frigi a kele a ve beyéʼé ngule nlem .

Dulu nkatane Mbamba Foé lale

(Mm 15:41; 16:4-6; 1 Ko 3:4-8)

24Mone Beyude, jôé na Apôlôs, môte ya Alékzandri a nga kui Eféze. A mbe éwôlô ñyeme mam. A nga ve nlô wé mfaʼa ya lañe mimfufube mintilan. 25A nga yéʼé ajô zene Nti. Njalan a évé, a nga kañete a yeʼele ajô Yésus ne sañesañ. A nga boʼo a yeme ve nduane Yôanes. 26A nga kobô a ngul ése aba Zambe Beyude été. Ve éyoñe Prisile baa Akilas be nga wôʼô nkobô wé ajô Yésus, be nga nyoñe nye nsamba wop, a tuʼa beta liti nye zene Zambe. 27Amu a nga bili nkômbane ya ke Akayi, bobenyañ, be nga vaʼa jame te. Ane be nga bendé bobenyañ ya wé na, be nyoñe nye mvoʼé . Eyoñ a nga kui, a nga bo beta mvolan amu mvame Zambe e be bebuni ya wé. 28Nalé a too, amu bifia bié, mbie bi nga so kalate Zambe, bi mbe adit e mise Beyude, mfaʼa ya tuʼa liti be na, Mesie nye a ne Yésus.

Currently Selected:

MIMBOONE MINLÔMAN 18: BULU09

Highlight

Copy