Zakari 14
14
Dur ma dabid’a ki mbad’a hi Ma didinid’a
1Gola! Burâ hi Ma didinina nga mi mba.
A mba b’rau ahle suma agi hurumuzina kä iragi na.
2Ma didina mba mi tok andjaf suma á dur Jerusalem.
A mba hlazì ma ngolâ,
a mba hurum azina,
a mba b’lak aropma,
abo azì ma ngolâ suma kuruma a mba yozi magomba.
Wani suma a arâ a mba dap pei kur azì ma ngolâ d’i.
3Ma didina mba mi nde woi
á dur kandjaf sum ndazina
d’igi mam nga mi dur adjeu dei
kur bur ma ayîna na.
4Kur bur máma mba mi tin asem
yam ahina d’a Olif fa ngagad’a yam Jerusalem
abo ma yorogonid’a.
Ahina d’a Olif ndata mba d’i wak kä aduk mbà.
Abot ma hina mba mi dadak kazigam abo ma norâ,
ma hina mba mi dadak kazigam abo ma sutna mi.
Hor ra ngola mba d’i ar adigaziya,
mba d’i i irat abo ma yorogona
kabo ma fladegena mi.
5Ata yi máma agi mba ringîgi
kur hor ra aduk ahuniyô manid’a,
kayam hor ndata mba d’i i gak Asal.
Agi mba ringîgi d’igi abuyogi ngolo a ring
abo giget ta andagad’a ti giget
kur atchogoid’a hi Oziyas amul ma Juda-nid’a na.
Ata yi máma Ma didina Alo mana
mba mi mba ki mam suma mi tinizi irazi vazina.
6Kur bur máma yina mba mi b’o d’i,
ab’lenga mba d’i le ki glasâ d’uo mi.
7Bur máma ni bur ma mba mi ka’î iram vam zenena,
Ma didina mi wumî mam hol,
faleid’a nga d’uo mi na,
andjeged’a nga d’uo mi,
wani b’od’a mba d’i ndeï woi ni fladege.
8Kur bur máma mbiyo ma he arid’ina
mba mi djangî woi kur Jerusalem.
Abom ma hina mba mi i iram
kur apo d’a Matna
abo ma yorogona,
abom ma hina mba mi i iram
kur alum ma ngol ma Mediterane-na
abo ma fladegena mi,
a mba le hina andol kawaliya.
9Ma didina mba mi ka’î
amul ma yam andagad’a petna.
Kur bur máma mba mi ar Ma didina ni mam tu go,
simiyêm mba mi arî mam tu go mi.
10Ambasa ki zla tat pet mba d’i mbut
ni d’igi fula na,
tcholï Giba dei gak mba Rimon
abo ma sutna hi Jerusalem-ma.
Jerusalem mba d’i arî ata yat akulo
kal yima nguyutna pet.
Ti mba d’i tinï ad’ud’a
avun agre’â hi Benjamin-na dei
gak mba avun agrek Ma adjeuna,
gak mba ata yima vun agre’â mi kong kuana,
tinï ad’ud’a ata gong nga fiyak
ka ndjola hi Hananel-la dei
gak mba ata yima a miret guguzlud’a hamulîd’a kuana.
11Suma a mba kak kuru,
a mba b’lagat bugol luo d’a,
mba d’i kak ki halasa.
12Wana ni tugud’ei d’a Ma didina mba mi tum
kandjaf suma pet suma a mba mba ki azigar mazina
á dur Jerusalem-mba:
Nge nge pî hliwim mba mi ndjulup pei akulo kasemu,
iram mba d’i ndjulup kur aziyad’u,
sinam mba d’i ndjulup avunam mi.
13Kur bur máma Ma didina mba mi tinizi
tcha d’a tatad’a ngola adigaziya,
nge nge pî mba mi ve ndrama abomu,
nge nge pî mba mi zi abom akulo yam ndrama mi.
14Suma Juda-na a mba dur yam Jerusalem,
a mba tok ndjondjoîd’a handjaf suma a nguyutna pet,
nala, lora ki kawei ma hapma
ki baruna ablaud’a mi.
15Tugud’ei d’a tum suma ndata
mba d’i tum akulumeina,
koro ma akulumei akulumeina,
djambala, korona
kahle suma abageina pet.
16Ata yi máma suma ar aduk andjaf suma pet
suma a mba á dur suma Jerusalem-mina,
a mba mba bizad’a ki bizad’a
á grif kä avok amul Ma didin ma ad’engêm kal petna,
á le vun til ma Zlub’ud’a mi.
17Le andjaf ma nga yam andagad’a ka hina
mi i nga Jerusalem á kud’or
amul Ma didin ma ad’engêm kal petna d’uo ni,
alona mba mi se yam ambas mamba d’i.
18Le suma Ezipte-na a i nga Jerusalem
á le vun til ma Zlub’ud’a d’uo ni,
a mba tumuzi ki tugud’eid’a
d’igi a tum kandjaf suma ding suma a i nga á lü
vun til máma d’uo na na mi.
19Ni hina ba, a mba ngop ki suma Ezipte-na
kandjaf suma ding suma a i nga
á lü vun til máma d’uo na.
20Kur bur máma
a mba b’ir ata aglenga hakulumeinina ala
Bei tchod’a ni d’a hi Ma didinid’a.
Duguyo suma kur gong nga kud’ora hi Ma didinid’a
a mba mbut ni d’igi angulei
suma a nga avok yima ngal ahle suma ngat buzunina na.
21Duguyo suma Jerusalem-ma pet
ki duguyo suma Juda-na
a mba tinizi irazi vazi
mi Ma didin ma ad’engêm kal petna.
Suma a mba mba á hahle suma ngat buzunina
a mba yi ki hliuna.
Kur bur máma a mba fe sama mbut abom
kur gong nga kud’ora hi Ma didin ma ad’engêm kal petna d’uo d’a.
Currently Selected:
Zakari 14: BA
Highlight
Share
Copy
Want to have your highlights saved across all your devices? Sign up or sign in
Azumeina Bible © Alliance Biblique du Tchad, 1999.
