Romê-na 16
16
Dep pa ged’a hi Paul-la
1An nga ni lagi glangâsâ yam wiyeid’a Fibi ta nga d’i le sunda kur Tok ka Sengkre-d’id’a. 2Ar agi vagizi atagi yam simiyê Salad’a d’igi suma hAlonina a nga ve tazi na. Agi ndjunut kur ahlena pet suma ndat minizi atagina, kayam ndat tata ti ndjun suma ablaud’a ki an tanda mi.
3Agi gagi Prisil ki Akila ndron suma sunda hi Jesus Christ-sâ depa. 4Azi he tazi woi kanu, wani nga ni an hol ba, nga ni lazi mersi d’i, wani Tok ka aduk andjaf suma dingîd’a pet nga d’i lazi mersi mi. 5Agi gagi Tok ka avo hatazid’a depa mi. Agi gagi Epenet man ma o ma mi he gagazid’a yam Christ avok kikidji kur ambas sa Asi-d’ina depa. 6Agi gagi Marie d’a le sun nda ngola heî kagid’a depa. 7Agi gagi Andronikus ki Juniyas suma ala nandjavan ni ndron suma dangeina na depa mi. Azi ni suma suma a sunuzina a nga yorozi heîna. Azi he gagazid’a navoron mi.
8Agi gagi banan ma an le kam heîna Ampliyatus ma he gagazid’a yam Salad’ina depa. 9Agi gagi Urbain ndrei ma sunda hi Christ-sâ zlapa ki banan ma an le kam heîna Estasis depa mi. 10Agi gagi Apeles ma a kugum yam Christ-sâ depa. Agi gagi suma avo hi Aristobul-lâ depa. 11Agi gagi Herodiyon ma ala nandjavanu na depa. Agi gagi suma avo hi Narkis suma a he gagazid’a yam Salad’ina depa. 12Agi gagi Trifen ki Trifos arop suma a nga le sunda hi Salad’id’ina depa. Agi gagi banan nda an le kat heîd’a Persit ta le sunda ngola yam Salad’id’a depa mi. 13Agi gagi Rufus ma Salad’a mi manam yam sun mambina kasum mba mbut asun mi d’a depa. 14Agi gagi Asinkrit, Flegon, Hermes, Patrobas, Hermas ki b’oziyoi suma a nga zlapa ki sed’ezina depa. 15Agi gagi Filolok, Juli, Nere ki wiyemba Olimpas ki suma hAlona suma a nga zlapa ki sed’ezina depa. 16Agi b’ed’egi tagi kokok ki dep pa ged’a. Toka hi Christ-sa pet ti gagi depa.
Hum mba ge d’a bugola
17B’oziyona, an nga ni gigid’egi yam suma a nga mba ki wala suma a nga vit suma a he gagazid’ina woina. Azi ni suma hat mazid’a ndjak nga ki hat magi d’a agi vat adjeud’a d’uo na. Ar agi walagi woi dei ki sed’eziya. 18Kayam suma hina na a le ni sunda hi Christ Saleinid’a d’i, wani ni yam huruzi go. Ki zla mazi d’a de d’a djivid’a ki vunazi ma mbulâ a nga mbut hur suma bei ned’ina kä. 19Suma pet a wala agi nga gagi yagi kä ad’u Salad’a. Kayam ndata, an nga ni le furîd’a kagiya, wani an min ala ar agi kagagi ki ned’a á lahle suma djivina, ar agi walagi woi kahle suma tchona mi. 20Alo ma hei b’leng nga halasina mi ar go á miret Seitan kä ad’u asegiya.
Ar Saleina Jesus mi vagi sumad’a.
21Timote ndran ma sunda zlapa ki Lusiyus, Jason ki Sosipater suma ala nandjavanu na a gagi depa.
22An Tertiyus ma b’ir mbaktum ndatina, ni gagi depa ki simiyê Salad’a.
23Gayus ma an tchuk nga avo hatama, ni ma Toka nga tok avo hatama, mi gagi depa. Eraste ma ngom beged’a kur azì ma ngolâ ki wiyeina Kuartus a gagi depa.
[24Ar Saleina Jesus Christ mi vagi sumad’a pet. Amin!]
Gile d’a dabid’a
25Ar ei suburi Alona! Mi ndak á siragi kur he gagazi magid’a yam Zla d’a Djivid’a hi Jesus Christ sa an nga ni tchat walata. Ni Ma mi nde zla d’a muduri d’a mi ngeyet kur atchogoi d’a kal dedeid’a woina. 26Wani ki tchetchemba, zla d’a muduri ndata a ndat tei kur mbaktumba hi suma djok vun Alonid’a. Alo ma didina mi he vuna ala a tagat tei mandjaf suma pet, kayam a he gagazid’a, a ge yazi kä ad’um mi.
27Ar ei suburi Alo ma tu ma ned’ina yam Jesus Christ gak didin! Amin!
Currently Selected:
Romê-na 16: BA
Highlight
Share
Copy
Want to have your highlights saved across all your devices? Sign up or sign in
Azumeina Bible © Alliance Biblique du Tchad, 1999.