Romê-na 15
15
Ang halî vama mi le ndrangâ tam djivid’ina
1Ei suma ad’enga kur he gagazid’ina, ar ei ndjuni suma amangeîna á zizi amangeî mazid’a. Ar ei halei ni vama mi lei tei djivid’ina d’i. 2Ar nge nge pî adigei mi hal ni vama mi le ndrama tam djivid’a á wulum akulo kur he gagazid’ina. 3Kayam Christ tamba mi hal nga vama mi lum tam djivid’ina d’i, wani d’igi mbaktumba hAlonid’a ti de na ala: Ngul la suma a nga ngulunga ti hulong kanu. 4Ahlena pet suma a b’irizi kur mbaktumba hAlonid’a adjeuna ná had’eya, kayam ei tini huri kam ki ve tad’a, zlapa ki b’leng hur ma mbaktumba hAlonid’a ti b’lengeîzina. 5Ar Alo ma ve tad’a ki b’leng hur ma tcholï atama, mi hagi djib’er ra tud’a aduk tagi d’igi djib’era hi Jesus Christ-sa na. 6Ni hina ba, agi pet agi gilegi Alona Abu Saleina Jesus Christ ki djib’er ra tud’a ki vun ma tuna mi.
Zla d’a Djivi d’a yam suma peta
7Ar nge nge pî adigagi mi ve wiyema atam d’igi Christ mi vagi atam yam subura hAlonid’a na. 8Kayam an nga ni dagi ala Christ mi mbut ma sunda hi Juif-fîna á ndak vun vun ma hle ma Alona mi hlum mi Abraham, mi Isak ki Jakob memetna á tak woi abu ala Alona ni Ma d’engzengâ, 9kayam andjaf suma dingâ a subur Alona yam we hohou mamba mi. D’igi mbaktumba hAlonid’a ti de na ala:
Kayam ndata, an mba ni suburung aduk andjaf suma dingâ,
an mba ni gileng simiyêng ki sawala mi.
10Ti de kua ala:
Agi andjaf suma dingâ, agi lagi furîd’a zlapa ki suma Alona mi manazina.
11Ti de kua ala:
Agi andjaf suma pet, agi gilegi Ma didina.
Agi suma pet, agi gilemu.
12Isai pî mi dala:
Sideina hi Jesse-na mba mi mba,
mba mi te yam andjaf suma dingâ,
a mba tin huruzi kam mi.
13Ar Alo ma tin hurâ tcholï atama mi oyôgi ki furîd’a ki b’leng nga halasa kur he gagazi magi d’a agi hat kamba. Hina wani, hur ma tin magina mba mi i avogovok yam ad’enga hi Muzuk ma bei tchod’a ba nid’a.
ZLA D’A DABID’A KI DEP PA GED’A HI PAUL-LA
(5.14—16.27)
Paul mi b’ir hina ni kayam me ge?
14B’oziyona, an tanda ni we woi tetet ala agi ni suma djivina, agi wagi ad’u ahlena pet, agi ndak á had’agi tagi mi. 15Wani kur mbaktum manda, an nga ni dagi zlad’a bei mandarâ ba á gagi humagi yam ve d’a Alona mi van sumad’a 16á mbud’un ma sunda hi Jesus Christ-sâ yam andjaf suma dingîd’a. Ata yima an nga ni tchi wal Zla d’a Djivid’a hAlonid’ina, an ni d’igi ma ngat buzuna na kayam andjaf suma dingâ a mbut vama ngat buzu ma lAlona tam djivid’ina, kayam azi ni suma Muzuk ma bei tchod’a ba na mi tinizi irazi vazina. 17Yam Jesus Christ, an nga ni subur tan yam sun man nda an nga ni lat yam Alonid’a. 18Le an nga ni de zlad’a bei mandarâ ba ni, an nga ni de ni vama Christ mi lum ki sed’en á mba kandjaf suma dingâ á ge yazi kä ad’uma hol. Mi le na yam zla man nda ded’a ki sun man nda led’a, 19yam ad’enga hahle suma simata kahle suma atchapma, yam ad’enga hi Muzuk ma bei tchod’ina mi. Hina, an tchi wal Zla d’a Djivid’a hi Christ-sa ngola tinï Jerusalem dei gak mba yam andaga d’a nguyuta gak mba yam andaga d’a Iliri-d’a. 20An min tchi wal Zla d’a Djivid’a ata yima Christ simiyêm mi yi nga kua d’uo na hol. An le hina kayam an min ala an min va akulo yam ad’u ge d’a sama dingâ mi gata d’i. 21Wani d’igi mbaktumba hAlonid’a ti de na ala:
Suma a tchazi nga wal zla mamba d’uo na
a mba wat ad’ud’u,
suma a hum nga zla mamba d’uo na
a mba humut ad’ut mi.
Paul mi de yam i mam mba Rom-mba
22Wana ni vama d’elen teteu á id’a sä hatagina. 23Wani ki tchetchemba, an dap wa sun manda kur ambas sa kä wanda d’a. Bizad’a ngola an hat hurun á iza á d’ugiya. 24Wani an min ala fata an i yam ambas sa Espaî-d’a, an tin hurun ala an mba ni hleza kagi á kak ki sed’egi ndjö, bugol tua ba, agi mba tinin sä kua mi. 25Wani ki tchetchemba, an nga ni i Jerusalem kahle suma ndjunda mi suma hAlonina. 26Kayam kretiyê suma Maseduwan-na ki suma Akai-na a nga huruzi ala azi tok he d’a hawa mazid’a yam suma hohou suma hAlona suma Jerusalem-ma. 27Azi tazid’a nga huruzi á le hina. Wani gagazi, azi ndak á le ki suma hohou ndazina hina. Le kretiyê suma Jerusalem-ma a b’rau ahle mazi suma djivina hi Muzu’îna kandjaf suma dingâ ni, djivid’a andjaf suma dingâ a ndak á ndjunuzi kahle mazi suma a nga abozina mi. 28Fata an dap wa sun ndata, an hazi wa he d’a hawa ndata pet mi ni, an mba ni hleza kagiya, tua ba an kal ni i Espaî. 29An wala fata an iza hatagid’a, an mba ni fagi ki b’e vuna hi Christ-sâ kagiya.
30B’oziyona, an nga ni tchenegi ki simiyê Saleina Jesus Christ ki o d’a Muzu’â hAlonina mi heizid’a, ar agi zlabagi ki sed’en agi tchenegi Alona kan ngola. 31Ar agi tchenegi Alona ala mi prud’un ndei abo suma bei he gagazi suma Jude-na, kayam he d’a hawa d’a an nga ki sed’et á it mi suma hAlona suma Jerusalem-mid’a a vat ki djivid’a mi. 32Ni hina ba, le Alona mi mina ni, an mba ni iza hatagi ki furîd’a, an mba ni tuk tan sä hatagi mi. 33Ar Alo ma hei b’leng nga halasina, mi kak ki sed’egi pet. Amin!
Currently Selected:
Romê-na 15: BA
Highlight
Share
Copy
Want to have your highlights saved across all your devices? Sign up or sign in
Azumeina Bible © Alliance Biblique du Tchad, 1999.