Romê-na 14
14
Ar agi kagi sariyad’a yam wiyegi d’i
1Ar agi vagi sama amangeî ma kur he gagazid’ina atagiya, wani ar agi kagi sariyad’a kam yam djib’er mamba d’i. 2Sama ding nga ki he gagazid’a á tahlena pet, wani ma ding ma amangeî ma kur he gagazid’ina, mi te ni hum aguna hol. 3Ar sama nga mi tahlena petna, mi gol sama nga mi tahlena pet tuo na is si. Ar sama nga mi tahlena pet tuo na, mi ka sariyad’a yam sama nga mi tahlena petna d’uo mi, kayam Alona mi vum wa atamu. 4Angî nge ba, ang ka sariyad’a yam azongâ hi ndrangîna ge? Le mi nga ni kaka ad’enga kur sun mamba d’oze mi puk kä ni, ni zlad’a hi salamid’a. Gagazi, mam mba mi kak kad’enga, kayam Salad’a mi nga kad’enga á tcholom akulo.
5Sama dingâ nga mi djib’er ala bur ma dingâ kal ndrama. Sama dingâ nga mi djib’er ala burâ pet mi nabo tam tu. Ar nge nge pî mi kak ki djib’er mamba kurumu. 6Sama nga mi wal burâ irama, mi walamî á hu Salad’a. Sama nga mi te tena petna, mi tumî á hu Salad’a, kayam nga mi le mersi mAlona. Sama nga mi te tena pet tuo na, mi te d’uo ná hu Salad’a, kayam nga mi le mersi mAlona mi. 7Kayam sama adigei ma kak karid’a yam tama nga d’i, sama mit yam tam nga d’uo mi. Le ei nga karid’a ni, ei nga karid’a ni yam Salad’a; 8le ei boya, ei boi ni yam Salad’a; le ei kagei karid’a d’oze le ei boya ni, ei ni suma hi Salad’ina mi. 9Kayam ndata, Christ mi mid’a, mi tchol akulo aduk suma matna karid’a á mbut Sala suma matna ki suma arina mi. 10Wani ni kayam me ba, ang ka sariyad’a yam wiyengâ ge? Wani ni kayam me ba, ang gol wiyengâ is ke? Kayam ei pet mba tcholei avok zlam mba ka sariyad’a hAlonid’a. 11Kayam mbaktumba hAlonid’a ti dala:
Ma didina mi dala: An ni Ma bei matna.
Kayam ndata, suma pet a mba tchuk guguvazi kä avoronu,
a mba de woi ala an nAlona mi.
12Ni hina ba, nge nge pî adigei mba mi mba ki zla mamba avok Alona.
Ar ang b’lak hur wiyengâ d’i
13Kayam ndata, ar ei kei sariyad’a yam tei d’i. Vama kalâ, ar ei djib’erei hina: Ar sa mi mbut ahina d’a dap asema avok wiyema á pugum kur tchod’a d’i. 14Kayam an nga zlapa tu ki Salad’a Jesus, an wala vama ndjendje ma yam tama nga d’i. Wani vama ndjendjed’a ir sanina, mi ni ndjendjed’a iram mam hol. 15Le ang nga b’lak hur wiyengâ yam te mangâ ni, ang nga tit kur od’a d’uo d’a. Ar ang ba sama Christ mi mit kama woi yam te mangâ go d’i. 16Vama ala ni djivid’a kagina, ar suma a lazagi ki sed’em mbi. 17Kayam leud’a hAlonid’a nga ni yam vama te d’oze vama tche d’uo mi, wani ni d’ingêra, b’leng nga halasa ki furî d’a Muzuk ma bei tchod’a ba na mi heizid’a. 18Sama le sunda yam Christ hina na, ni ma Alona tam lum djivid’a kama, suma a yorom mi.
19Kayam ndata, ar ei halei ahle suma a nga mba ki b’leng nga halasa suma a nga minï akulo kur he gagazid’ina. 20Ar ang b’lak sunda hAlonid’a woi yam tena d’i. Gagazi, tena pet mi ndak á ted’a, wani le te mangâ mi puk wiyengâ kur tchod’a ni, ni tchod’a. 21Djivid’a ang te hliuna d’i, ang tche süma d’i, ang noî ahlena pet suma á puk wiyengâ kä kur tchod’ina woyo. 22Ar ang ngom he gagazi mang nga yam zla ndatid’a avok Alona. Le sama djib’er mamba nga d’i kam sariyad’a kam yam vama mam wum djivid’a iram á led’ina d’uo ni, mi le furîd’a. 23Wani sama mi te ki gigritina, Alona mba mi kam sariyad’a kamu, kayam mam te nga ki he gagazid’a d’i. Kayam ahlena pet suma a lazi bei he gagazid’ina ni tchod’a.
Currently Selected:
Romê-na 14: BA
Highlight
Share
Copy
Want to have your highlights saved across all your devices? Sign up or sign in
Azumeina Bible © Alliance Biblique du Tchad, 1999.
