Vama ndum mbeina 9

1Malaika ma vahlâ, mi bu adif mamba. An we tchitchiud’a tu ti ndeï kä yam andagad’a. A hat lakled’a hi zul la yiyika abod’u. 2Ti mal vun zul la yiyika woyo. Andosâ mi buzuk kei kur zul ndata d’igi andosâ halamba ngolina na, afata ki simetna a mbut nduvunda abo andosâ hi zula ngol ndatina. 3Djera ti buzuk kei aduk andos máma, ti wet tei yam andagad’a. A hat ad’enga d’igi ad’enga hi hurd’ud’id’a na. 4A dat ala: Ndak te asuna d’oze aguna d’oze vama zar ma ding ngi, wani ndak ge ni suma a kazi nga geuna hAlonina avorozi d’uo na hol. 5Djer ndata a hat nga lovota á tchi suma d’i, wani ti lazi ni ndaka tilâ vahl. Te mat ma tazi tazina mi ni d’igi hurd’ud’a ti ge sanid’a na. 6Kur til ma vahl máma, suma a mba hal matna, wani azi mba fum mbi, azi mba min ala matna mi tchaziya, wani mam mba mi ring ngei avoroziya.

7Djer ndata ti hle tat ni d’igi akulumei suma a minizi á dur ayînina na, avaval la kazid’a ni d’igi avaval la lora na, irazi ni d’igi ir suma na mi. 8Tumus sa kazid’a ni d’igi tumus sa yam aropmid’a na, siyazi mi ni d’igi si azlona na. 9Kongrong ma nga didigazina, mi ni d’igi kongrong ma kawei ma wurana na, gigingâzi mi siwelî d’igi pus ma ablau ma akulumeina a tanam ma djang á i ata yima dur ayînina na. 10Andjawazi ti ni d’igi andjau hurd’ud’a na; nata andjawazi ba, azi nga kad’enga á ge suma tilâ vahl. 11Amul mazina ni malaika ma yam zul la yiyikina, a yum ki vun Hebre-na ala Abadon, a yum ki vun Gre’â ala Apoliyon, nala, Ma b’lak suma.

12Zla d’a hohou d’a avoka ti kal wa. Gola! Zla d’a hohou d’a ar mbàd’a nga d’i mba bugol ahle ndazina.

13Malaika ma karagayana, mi bu adif mamba. An hum dela ti tcholï ata keng yima ngal dubang ma his djivid’a ma lor ma nga avok Alonina. 14Del ndata ti de mi malaika ma karagaya ma nga kadifa aboma ala: Ang but malaika suma fid’i suma a nga djinda kä ki kindjingâ avun alum ma Efrat-nina akulo. 15Mi but malaika suma fid’i ndazina. A minizi wa yam ler ndata, yam bur máma, yam til máma, yam biza ndata mi, kayam azi tchi suma a walazi aduk hindina abozi ma tuna woyo. 16A tagan ndumba hi azigar suma akulumeinid’a bubupa kikis mbà. 17Ata yima vana nde tam mbei irana, an we akulumeina ki suma a nga kazina, azi nga ki kongrong ma hleuna d’igi akud’a na, botlozid’a d’igi safira na, grumgrum d’igi sufred’a na. Yam akulumei ndazina ni d’igi yam azlona na. Akud’a nga d’i buzuk kei avunazi kandosâ d’igi andosâ hi sufred’ina na. 18Ahle suma tcho suma hindi ndazina a tchi abo suma a walazi aduk hindina abozi ma tuna woi kakud’a kandosâ ki sufred’a suma a buzuk kei avun akulumeinina. 19Kayam akulumei ndazina ad’eng mazid’a navunazi kandjawazi mi. Andjawazi ni d’igi guguyona na. Azi nga ki yamba, ni d’a azi nga le ki suma tchod’id’a.

20Ad’u suma a ar bei tchid’a abo ahle suma hindi ndazinina, a mbut nga huruzi yam ahle suma azi tazi lazina d’i. A ar nga bei kud’or muzuk ma tchona ki filei ma a lum ki lora ki ma kawei ma hapmina ki ma kawei ma hleuna kahinad’a kagunina d’i. Nahle suma ndak nga á wed’a d’oze á humba d’oze á tita d’uo na. 21Sum ndazina a mbut nga huruzi yam tchi mat mazina ki kum mazi ma ved’a ki mizeu mazina d’oze kul mazid’a d’i.

Currently Selected:

Vama ndum mbeina 9: BA

Highlight

Copy