Vama ndum mbeina 10

Malaika ma ad’engâ ki mbaktum mba gora

1An gol malaika ma ad’engâ mi tcholï akulo mi tchugï asem kä. D’ugula ti kulubumu, vir ma b’al alona mi nga kam mi. Iram mba gola ni d’igi afata na, asemî d’igi kawei ma murguli ma a gum aduk akud’ina na. 2Mi nga tchola ki mbaktum mba gora mala woi abomu, mi tin asem ma ndjufâ yam alum ma ngolâ, mi tin ma gulana yam andagad’a mi. 3Nga mi tchi d’igi azlona mi oî na. Bugol tchi mama, alo ma breî d’a kid’iziyad’a mi breî ngola. 4Ata yima an hum breî d’a kid’iziyad’a halonid’ina, an min ala ni b’ir ahle ndazina. Wani an hum del la tcholï akulod’a ti dan ala: Ang ve breî d’a kid’iziya ndata kurungû, ang b’irit ti.

5Ata yi máma, an we malaika ma an wum tchola yam alum ma ngolâ kandagad’ina, mi hlabom ma ndjufâ akulo hur alona. 6Mi gun tam ki simiyê Alo ma nga kaka karid’a gak didin ma lakulod’a kahle suma kurutna pet kandagad’a kahle suma kurutna pet kalum ma ngolâ kahle suma kuruma pet mi na. Mi de woi ala: Djupa nga d’uo d’a. 7Wani bur ma malaika ma kid’iziyana mba mi bu adif mambina, ata yi máma, Alona mba mi ndak vun nga hur mam ma mudurina d’igi mi de mazungeî mam suma djok vuna na.

8Del la tcholï akulo d’a an humut avoka, ti de kua ala: Ang i hle mbaktum mba gor ra nga mala woi abo malaika ma nga tchola yam alum ma ngolâ kandagad’ina. 9An i gen malaika máma, an dum ala mi hanï mbaktum mba gor ndata. Mi dan ala: Ang ve, ang mud’ud’u. Mba d’i mbut aglara kurungû, mba d’i mbut adj’ibeta avunang d’igi ayuma na. 10An ve mbaktum mba gor ndata abomu, an mud’ud’u. Ti mbut avunan adjib’eta d’igi ayuma na, wani ata yima an ligitna, ti mbut aglara kurunu.

11A dan ala: Ang mbeya, ang djok vun zlad’a hAlonid’a woi kua mi suma ablaud’a, mandjaf suma, mi vun ma ded’a hi sumina, mamuleina mi.

Currently Selected:

Vama ndum mbeina 10: BA

Highlight

Copy