Vama ndum mbeina 5
5
Mbaktumba ki Gor timina
1Bugola, an we mam ma nga kaka yam zlam mba amulina, mbaktum mba dut ta a b’ir kurut mi blogot mi d’a, ti nga ved’a abom ma ndjufâ. Ti nga b’ala ki dubangâ kid’iziya. 2An we malaika ma ad’engâ nga mi tchi wala ki delem akulo ala: Ni nge ba, mi ndak á hô dubangâ woi á mal mbaktum ndata woi ge? 3Wani sama kur akulod’a d’oze ma yam andagad’a d’oze ma kä ad’u andagad’a ma ndak á mal mbaktum ndata woi á golot hurutna nga d’i. 4An tchi ngola heî, kayamba a fe nga sama ndak á mal mbaktum ndata woi á golot hurutna nga d’uo d’a. 5Ma dingâ tu aduk suma nglona mi dan ala: Ang tchi d’i, ang gola! Azlo ma ad’u andjafâ hi Juda-nina, ni ma ad’u andjafâ hamulâ David-na mi, mi kus ayîna. Kayam ndata, mi ndak á hô dubang ma kid’iziyana woi á mal mbaktum ndata woi mi.
6An we Gor timi ma hle tamî d’igi ma tchuma na na mi nga tchola aduk zlam mba amula kahle suma ari suma fid’ina ki suma nglona. Mi nga kadifa kid’iziya ki ira kid’iziya mi, azi ni muzuk ma kid’iziya ma hAlona ma mi sunum mbei yam andagad’a petna. 7Gor timi máma, mi mat abomu, mi ve mbaktumba abo mam ma nga kaka yam zlam mba amulina abom ma ndjufâ.
8Ata yima mi hle mbaktum ndatina, ahle suma ari suma fid’i ndazina ki suma nglo suma dok mbà yam fid’i ndazina, a grif kä avok Gor timi máma. Nge nge pî adigazi nga ki adingâ abom ki angulei suma wulak suma a nga oîd’a kahle suma his suma afufuînina, nala ni tchenda hi suma hAlonina. 9Azi nga hle sawal la awilid’a ala:
Ang ndak á hle mbaktum ndata,
á hô dubang máma woi mi.
Kayam a tchang adjewe.
Ang gus suma mAlona ki buzuwang ad’u andjafâ pet,
ad’u vun ma ded’a pet ki suma pet,
ad’u andjaf suma teteng pet mi.
10Ang mbud’uzi sum mama,
ang mbud’uzi suma ngat buzuna á le sunda mAlo mamina.
Azi mba te leud’a yam andagad’a mi.
11An gola! An hum dela hi malaika suma ablau suma bubup dogo suma a ndak á ndumba d’uo na. Azi ngui zlam mba amula kä kahle suma ari suma fid’i ndazina ki suma nglona mi. 12A hle sawala ki delezi akulo ala:
Gor timi ma a tchum adjeuna,
mi ndak á ve sib’ika
ki ndjondjoîd’a ki ned’a
kad’enga ki hud’a
ki subura ki giled’a mi.
13An hum ahle suma led’a suma akulona pet kahle suma yam andagad’a kahle suma kä ad’u andagad’a kahle suma kur alum ma ngolâ kahle suma led’a suma kä aduk mbinina pet, a nga hle sawala ala:
Giled’a ki hud’a ki subura kad’enga
a nga mi mam ma nga kak kä yam zlam mba amulina
ki Gor timina gak didin.
14Ahle suma ari suma fid’ina a dala: Amin! Suma nglona a grif kä, a kud’urom mi.
Currently Selected:
Vama ndum mbeina 5: BA
Highlight
Share
Copy
Want to have your highlights saved across all your devices? Sign up or sign in
Azumeina Bible © Alliance Biblique du Tchad, 1999.