Vama ndum mbeina 4
4
Kud’or ra sä akulod’a
1Bugol ahle ndazina, vama dingâ mi nde tam mbei iranu. An we vun azì ma akulona mi mal leyo.
Del la ti tchi d’igi adifa na d’a an humut avoka ti dan ala: Ang djagï ka hî. An mba ni tagang ahle suma a nga mba bugolâ. 2Atogo hina zak, Muzu’â hAlonina mi van sä kur akulod’a, an we zlam mba amula tu nga, sana nga kaka kad’u. 3Iram mba gola nga d’i wile d’igi ahina d’a kal tegles sa jasped’a d’igi d’a sarduwanda na. Zlam mba amul ndata nga nguid’a ki vir ma b’al alona, nga mi wile d’igi ahina d’a emerota na. 4Zlam mba amul ndata nga nguid’a ki zlam mba dinga dok mbà yam fid’i. Suma nglona dok mbà yam fid’i a nga kaka yam zlumiyô ndazina ki baru d’a hapa ataziya, avaval la lora nga kazi mi. 5Wiled’a ki siwela ki breîd’a halonid’a a buzuk kei ata zlam mba amul ndata. Lalam mba akud’a kid’iziya nga d’i ngal avok zlam ndata, azi ni muzuk ma kid’iziyana hAlonina. 6Vana nga avok zlam ndata d’igi alum ma ngol ma ngal tchitchilingâ na, mi wile d’igi kristal na.
Ata yi máma na wat, ahle suma ari suma fid’i suma a nga ki ira avorozi mi blogozi mi na, a ngui zlam ndata kä. 7Ma ari ma avo’â mi hle tamî d’igi azlona na, ma mbàna mi hle tamî d’igi gor amuhlâ na, ma hindina iram mbi hle tat ni d’igi ir sana na, ma fid’ina mi hle tamî d’igi agigilau ma nga mi pirâ na mi. 8Ahle suma ari suma fid’i ndazina, ma lara pî mi nga ki gigingâ karagaya karagaya, azi nga ki ira ata yima lara ge pet, krovo, abu mi. Andjege ki falei azi nga ar bei hle sawala ala:
Ma bei tchod’a, Ma bei tchod’a, Ma bei tchod’a
ni Ma didina Alo ma ad’engêm kal petna,
ni Ma nga adjeu deina, ni Ma nga na, ni Ma nga mi mbana mi.
9Ata yima ahle suma ari suma fid’i ndazina a nga subur Alona, a nga lum ad’umu, a nga le mersi mi ma nga kaka yam zlam mba amula ma nga kaka gak didina, 10ata yi máma na wat, suma nglo suma dok mbà yam fid’ina a grif kä avok mam ma nga kaka yam zlam mba amulina, a kud’or mam ma nga karid’a gak didina. A tchuk avaval mazid’a kä avok zlam mba amula, a dala:
11Â, Salamina Alo mamina,
ang ndak á subura, á hud’a, á vad’enga mi.
Kayam ahlena pet ang lazi ni angû;
nata min manga ba, azi nga, azi nga karid’a mi.
Currently Selected:
Vama ndum mbeina 4: BA
Highlight
Share
Copy
Want to have your highlights saved across all your devices? Sign up or sign in
Azumeina Bible © Alliance Biblique du Tchad, 1999.