Sawal la giled’a 78
78
Väd’u d’a yam Israel-lîd’a
1Ni sawal la gile d’a Asaf mi hlata.
Agi sum mana, agi humugi hat manda,
agi tinigi humagi humugi zla d’a avunanda.
2An mba ni mal vunan á de zla d’a d’ogola,
an mba ni de woi yam zla d’a ne d’a dedeid’a.
3Ni vama ei humizina, ni vama ei weizina,
ni vama abuyoi ngolo a veizi ad’uma mi.
4Ei mba ngeyeizi mi gureina d’i.
Wani ei mba dei woi mandjaf ma nga mi mba bugolâ,
yam subura hi Ma didinid’a,
yam ad’eng mamba ki sun nda ndandal la mam lata mi.
5Mi tin glangâsâ aduk sum mama,
mi tin gata aduk Israel-lâ,
mi he vuna mabuyoi ngolo ala
a hat zla ndata mi grozina.
6Kayam azi had’at mi suma
kur atchogoi d’a nga d’i mba bugola,
grozi suma a mba vud’uzi ndazina
a tchol a dat tei mi grozina
7tala azi tin huruzi yam Alona,
a mar yam sun mamba d’i,
a ngom vun mam ma hed’a mi d’a.
8Kayam azi le d’igi abuyozi ngolo
suma yam mba ad’eng suma bei hum vun
suma huruzi nga ade’esa d’uo
suma a nga d’engzeng avok Alona d’uo na hina d’uo d’a.
9Efraim groma a gan yeûd’a á durâ,
wani a ring kur bur ma dur ayîna,
10kayam azi ngom nga vun ma djin
ma Alona mi djinim ki sed’ezina d’i,
azi noî a tit yam gat mamba mi.
11Azi mar yam sun nda nglo d’a mam lata,
yam sun mam mba atchap pa mam tagazizid’a mi.
12Mi le sun nda atchapa avok abuyozi ngolo
kur Ezipte abagei kel avo Sowan.
13Mi wal alum ma ngolâ woi aduk mbà kayam azi djak keyo,
mi tchol mbina akulo gongzong d’igi sana mi ge damana na.
14Faleya, mam nga mi tinizi ki d’ugula;
andjege, nga mi tinizi ki b’od’a hakud’id’a mi.
15Mi wak ahina d’a hur fulîd’a woyo,
mi hazi mbiyo ma tched’a atat
d’igi ir mbiyo ma nga mi djang gugu’â na.
16Mi buzugï mbina woi ata ahinad’a
d’igi mbiyo golonga na,
mi djang kä d’igi mbiyo aluma na mi.
17Hina pet pî, azi nga le tcho d’a dinga avoromu,
azi kak djangûna ki Ma sä akulo ma kal teglesâ
abagei hur ful ma gangrasâ.
18Azi kuk Alona kuruzi krovo,
a tchen te ma djivi ma huruzi minima.
19Azi nga de zla d’a tchod’a yam Alona ala:
Na ni Alona mi ndak á hei tena abagei hur fulâ zu?
20Gola! Mi wat ahinad’a,
ti djang mbina d’igi toliyonda na
gak ti wet teyo!
Na ni mi ndak á hei tena ki hliuna mi zu?
21Wani Ma didina mi hum zla ndata, hurum zala.
Akud’a ti nde ti ngal andjafâ hi Jakob-ma;
ayî mama mi nde yam Israel-lâ.
22Kayam azi he nga gagazid’a kam mbi,
a tin nga huruzi yam sut mamba d’uo mi.
23Hina pet pî, mi he vuna mi d’ugul la akulod’a,
mi mal vun agrek ma akulona woyo.
24Mi yagazï manna kä á ted’a,
mi hazi awu ma tcholï akulona.
25Mi sunuzï te ma ndak yam mei mazid’ina;
azi te ni tena hi malaikanina.
26Mi he vuna mi simet ma abo ma yorogona ala
mi sir kur akulod’a,
kad’eng mamba mi mba ki simet ma abo ma sutna.
27Mi yagazï aluweina kä ablaud’a
d’igi les ma avun alum ma ngolîna na.
28Mi yagazizï kä kur kangâ,
ngui kangâ mi.
29Alona mi hazizi ndak yam min mazid’a,
a te, a hop ngola.
30Wani kid’a vama azi minima ndagazi nga d’uo tua
a nga te te máma abozi keid’a,
31Alona hurum zal kaziya.
Mi tchi suma gangrangâ adigaziya,
mi tchi gro azungeî mazi suma iratna woi mi.
32Hina pet pî, azi ar nga bei le tchod’a d’i,
azi he nga gagazid’a yam sun mam mba ndandala d’uo mi.
33Wani mi tchazi woi atogo d’igi simetna mi kal na;
mi dabazi bizazi woi ni ki mandarâ.
34Ata yima Alona mi tchi suma dingâ adigazi woina,
suma a arâ a hulongî gevemu,
a hulong a mba gevem á halam ki hur ma tuna.
35Azi nga djib’er ala Alona nahina mazi d’a ngei tazid’a;
Alo ma sä akulo ma kal teglesâ ni grang mazina mi.
36Wani azi nga lobom ki zla mazi d’a ded’a,
azi nga kam zlad’a mi.
37Huruzi nga ade’esa ki sed’em mbuo,
a nga d’engzeng yam vun mam ma djinda d’uo mi.
38Wani mi wazi hohowoziya,
mi vat hurum mbei yam tcho mazid’a,
mi dabazi nga woi d’i,
nga mi d’el tam kur ayî mam ma bibiliuna teteu.
39Mi djib’er ala azi ni suma hawa,
a ni d’igi simet ma nga mi iya nga mi hulong nguo na na.
40Ni yazi ga ba,
azi kak djangûna ki sed’em abagei hur fulâ ge?
Ni yazi ga ba,
azi b’lagam hurum abagei hur ful ma gangrasâ ge?
41Azi hulong kugumu,
azi b’lak hur Alo
ma tin tam irat vat yam Israel-lîna.
42Azi djib’er nga yam ad’eng nga mi lat kazi
ata yima mi pad’azi woi abo ma djangûnina d’i.
43Azi mar yam ahle suma ndandal
suma mi lazi avo Ezipte-na,
kahle suma atchap suma mi lazi abagei kel avo Sowan-na.
44Ni kua ba, mi mbud’uzi apo alum mazi ma Nil-lâ buzuna;
azi ndak á tche mbiyo toliyon mazid’a d’i.
45Mi tchuk aro ma tchona atazi mi ed’eziya,
mi b’lagazi djib’er mazid’a,
mi tchuk greneûna atazi mi b’lagazi ahligiyezi woi pet mi.
46Mi tchuk abara ata awu mazina,
djera ti b’lagazi ahle suma azi kau tazi ki sed’ezina woyo.
47Mi b’lak guguzlu mazid’a woi ki mogoina,
mi b’lak tulumei mazina woi kalo ma se ma tchona.
48Mi tchi d’uwar mazi ma nglona woi ki mogoina,
mi tchi d’uwar mazi ma gureina woi kalo ma breîd’a mi.
49Hurum zal kazi ngola heî,
nga mi djulul kayîna, mi mbut d’igi sama guruta na,
mi sun malaika suma a le suma tchod’ina ataziya.
50Nga mi i avogovok kur ayî mama,
mi arazi nga bei tchid’a d’i,
wani mi b’lagazi woi
ki tugud’ei d’a tcho d’a tchi matna.
51Mi tchi gro suma Ezipte
suma a vud’uzi avok sumala nandjafâ hi Ham
sumala nad’eng mazi d’a avoka na woyo.
52Ma didina nga mi i ki sum mama
d’igi sana mi i kaho’â na,
nga mi tit ki sed’ezi abagei hur fulâ
d’igi sana mi pol tumiyôna na.
53Mi i ki sed’ezi ki halasa; a le nga mandar ri.
Mi hlup mazi suma djangûna kä woi ki mbina mi.
54Mi i ki sed’ezi yam andaga mam mba mi tinit irat vata,
yam ahina mam mba mam hlat kad’eng mambid’a.
55Mi dik andjaf suma dingâ woi
avok andjafâ hi Israel-lîna,
mi b’rawazi djona, mi hazi yi mazi ma kaka mi.
56Wani azi kuk Alo ma sä akulo ma kal teglesâ,
a kak djangûna ki sed’emu,
azi ngom nga vun mam ma hed’a d’uo mi.
57Azi nga d’ingêr avorom mbi,
azi mbud’um iram d’igi simiyêzi na,
azi mbut ni d’igi yeû d’a bringîzlinga na.
58Azi nga zalam hurum
ki tuwal la azi nga tuwal
alona handjaf suma bei dingîd’a,
azi nga zalam hurum ngola heî
ki filei ma azi nga tcholom ata yina tetengâ.
59Alona mi we hina wani, hurum zal ataziya,
mi golozi is.
60Mi djok kei avo Silo
ata yi mam ma kak ma aduk sumina.
61Wani zanduk mam ma a tinim iram vam mala
ni vama taka yam ad’eng mamba ki subur mamba na,
mi aram abo suma djangûna á hlum hurumba.
62Mi ar sum mama abo suma á tchid’a,
hurum zal ata sumala ni sum mama na.
63A tchi gro azungeî mazina avun ayîna,
gro yuguneina a nga fe lovota á gadjo d’a tela d’i.
64Mam suma ngat buzuna a tchazi avun ayîna ki mbigeu d’a fiyaka,
arop mazi suma modonod’a a fe nga lovota á tchi horâ d’i.
65Ata yi máma Salad’a mi zlit akulo
d’igi sama mi bur senina na,
d’igi sama ad’eng ma mi tche süma mi er kad’um akulona na mi.
66Mi dik mam suma djangûna a ringâ,
a mbut zulona ki irazi fafat.
67Mi ar andjafâ hi Josef-fâ woyo,
mi man nga andjafâ hi goroma Efraim-ma d’uo mi.
68Wani mi man andjafâ hi Juda-na,
mi man ahina d’a Siyon nda hurum vat heîd’a.
69Mi min gong mam mba mi tinit irat vata akulo
d’igi yima ndingâ na,
d’igi andaga d’a mi sirat ngingring burâ ki burîd’a na.
70Mi man azong mama David,
mi pad’amï woi kur kangâna hi tumiyônina.
71Mi vumï woi ata yima nga mi pol tumiyônina,
kayam mi mbut ma pol sum mama andjafâ hi Jakob-ma,
Israel sumala ni djo mama na.
72David mi polozi ki hur ma tuna,
mi polozi ki d’alâ mi.
Currently Selected:
Sawal la giled’a 78: BA
Highlight
Share
Copy
Want to have your highlights saved across all your devices? Sign up or sign in
Azumeina Bible © Alliance Biblique du Tchad, 1999.
