Sawal la giled’a 77
77
Djib’eregi yam sun nda ndandala hAlonid’a
1Ni sawal la gile d’a Asaf mi hlat mi hat mi ma ngolâ hi suma hle sawalina.
2An nga ni tchi yam Alona ki delen akulo,
an nga ni yAlona akulo, kayam mi tin humam mi humunu.
3Ata yima an nga kur ndakina, an nga ni hal Salad’a,
kur andjeged’a an nga ni tchenem bei kaud’a ba,
an noî b’leng hurâ woi mi.
4Ata yima human gan yam Alonina, an nga ni zam tanu;
ata yima an nga ni djib’erâ, tan tchuk susub’ok.
Tchol ndjö
5Ang son iran ndei bei bur sena,
djib’er manda b’laga, an we nga vama ni duma d’i.
6An nga ni djib’er yam bur ma kal leina,
yam biza d’a kal lei dedeid’a mi.
7Kur andjeged’a an nga ni djib’er yam sawal manda,
an nga ni dugud’ot kurun krovo,
muzugan nga mi fek ad’u ahle ndazina ala:
8Na ni Salad’a mi arei ni woi ki iram fafat tchu?
Mba mi wei hohowei kua d’uo zu?
9O mam mba didin nda mi lat keid’a,
ti dap mi daba ki irat fafat tchu?
Mba mi dei zlad’a kua bugol luo d’ang zu?
10Na ni Alona mi marî á vei sumad’a zu?
Kur ayî mama mi b’alî hurum kei zu?
Tchol ndjö
11Bugola, an de kurun ala: Vama han ndakina ba wana:
Alo ma sä akulo ma kal teglesâ
nga mi ndjuni d’igi avoka na d’uo d’a.
12Ma didina, human nga d’i gan
yam sun nda ang lata.
Gagazi, human nga d’i gan
yam sun nda ndandal la ang lat adjeud’a.
13An nga ni djib’er yam sun nda teteng nga ang lata,
an nga ni de kurun teteu yam sun nda nglo d’a ang lata.
14Alo mana, sun mang nga led’a ni vat zenen,
nalo ma lara ba, mi ngola d’igi ang na ge?
15Angî Alo ma lahle suma atchapmina,
ang tak sib’ik manga woi aduk andjaf suma dingâ mi.
16Ni kad’eng manga ba,
ang prut sum mangâ Jakob groma ki Josef groma woyo.
Tchol ndjö
17Alo mana, mbiyo ma nglona mi wangû.
Ata yima mi wangâ, mi tum sora wü.
Gagazi, galileina mi zlak mi.
18D’ugula nga d’i se mbina kûkû,
d’ugula nga d’i breî mi.
Gagazi, wile manga nga d’i djang kikilir ata yina pet
d’igi yeûd’a nga d’i djang na.
19Del la breîd’a halo mangîd’a, ti nga aduk mbirlimba,
wiled’a nga d’i b’o yam suma kur duniyad’ina,
andagad’a nga d’i le mandarâ, nga d’i yir mi.
20Ang ge lovot manga kur alum ma nglona,
ang kal tita kä kur galileina;
sa nga mi wang balum aseng ngi.
21Ang tak Moise azi ki Aron á pol sum mangâ
d’igi suma a pol tumiyôna na.
Currently Selected:
Sawal la giled’a 77: BA
Highlight
Share
Copy
Want to have your highlights saved across all your devices? Sign up or sign in
Azumeina Bible © Alliance Biblique du Tchad, 1999.
