Sawal la giled’a 66
66
Sawal la gile Alona
1Ni sawal la gile d’a a hlat a hat mi ma ngolâ hi suma hle sawalina.
Agi suma yam andagad’ina pet,
agi suburugi Alona.
2Agi hlagi sawala á gilegi simiyêm ma subura,
agi suburum ki sawal la giled’a.
3Agi dagi mAlona ala:
Sun manga ni sun nda ndandala.
Yam ad’eng manga,
mang suma djangûna a hulong yazi kä avorongû.
4Suma yam andagad’ina pet a grif kä,
a gileng ki sawala, a gileng simiyêng mi.
Tchol ndjö
5Agi mbeyegï gologi sunda hAlonid’a.
Ni sun nda ndandal la nga mi lat yam sumid’a.
6Mi so alum ma ngolâ woyo,
a djak alum ma Jurdê-na kaseziya.
Ata yi máma, ami lami furîd’a kamu.
7Nga mi te yam suma kad’eng mamba gak didin,
iram nga tinda yam andjaf suma;
ar suma so vuna a subur tazi d’i.
Tchol ndjö
8Agi suma, agi suburugi Alo meina,
agi gilegizi ki delegi akulo mi.
9Ni ma ngomei ei boi nga d’uo na,
ni ma arei asei ka nga azlard’eid’a d’uo mi na.
10Alo mamina, ang kugumiya wa,
ang yoromi wa d’igi sana mi yor kawei ma hapma na.
11Ang arami wa kur ndaka,
ang tinimi anek ka ngola kamiya.
12Ang ar suma a kal kami djangâ kakulumeina,
ami kalami aduk akud’a ki mbina mi,
wani ang pad’ami woi kur á b’lengêmi hurumiya.
13An mba ni i kur gong manga kahle suma ngat buzu suma ngala,
an mba ni ndak vun vun ma hle ma an hlangzina.
14Nahle suma an dang kazi ki vunan
ata yima an nga kur ndakina.
15An mba ni hang d’uwar ma d’orâ ki gamlâna,
an mba ni hang amuhlâ ki mbekmberena
yam yi mang ma ngal ahle suma ngat buzuna,
an mba ni ngalangziya;
andozozi ma his ma afufuîna mba mi fang sä akulo.
Tchol ndjö
16Agi suma pet suma lagi mandara Alonina,
agi mbeyegiya, agi humugiya;
an mba ni dagi yam ahle suma mi lazi kana.
17An tchi kam á ndjununu,
an nga ni gilem mi.
18Ladjï an ngom tchod’a kurunu ni,
Salad’a mba mi humun ndi.
19Wani Alona mi humunu,
mi tin humam mi hum tchen manda mi.
20An nga ni subur Alona,
kayam mi ar nga bei hum tchen manda d’i,
kayam mi walan nga woi ki o mam mba didinda d’uo mi.
Currently Selected:
Sawal la giled’a 66: BA
Highlight
Share
Copy
Want to have your highlights saved across all your devices? Sign up or sign in
Azumeina Bible © Alliance Biblique du Tchad, 1999.
