Zla d’a d’ogolâ 3
3
Ned’a ki ge yam mba kä avok Alonid’a
1Gorona, ang mar yam hat manda d’i, ang ngom vun man ma hed’a kurungû. 2Kayam azi mba ing burung fiyaka, ang mba le bizad’a ablaud’a yam andagad’a ki b’leng nga halasa. 3Ar ang wal lei ki djivid’a ki gagazid’a d’i. Ang djinizi kelengû, ang b’irizi kä kurung mi. 4Alona ki suma a mba yorongû, ang mba kak ki halasa ki sed’ezi mi. 5Ang he tang mi Ma didina ki hurung pet, ang deng tang yam ne manga go d’i. 6Ang wum mbei tetet kur sun mang nga led’a pet, ni mam ba, mba mi blazang lovot manga kä mi. 7Ar ang gol tang ala angî sama ned’a d’i, ang le mandara Ma didina, ang wal tang ngei ki tchod’a mi. 8Ahle ndazina a mba mbut ni lafiya d’a yam hliwinga, ni b’leng nga halas sa yam asogonga mi. 9Ang he ngola mi Ma didina ki bege manga kahle mang suma a ne avo’â ki suma a vut avo’â pet mi. 10Hina wani, avurei mangâ a mba oî kawuna, agolongeî mangâ a mba oî ki süm guguzlu d’a awilid’a, mba d’i sulul kä woi mbumbû mi. 11Gorona, ang gol gat ta Ma didina nga mi gad’anga is si, ang gol ngop pa nga mi ngobonga ni vama tcho d’uo mi. 12Kayam Ma didina nga mi ngop sama mam le kama d’igi sana nga mi ngop gorom ma hurum vum heîna na mi.
Ned’a ki furîd’a
13Sama mi fe ned’ina mi le furîd’a, sama mi mbut ma wad’ud’ina mi le furîd’a mi. 14Kayam mbiyo ma ang fum kur ned’ina, mi kal ma ang fum kur beged’ina, fe mat ta peta kal lora mi. 15Guzut kal ahina d’a guzut kal teglesa; aduk ahle suma ang hurung minizina pet ma d’igi ndat na na nga d’i. 16Kak ka karid’a tatâ d’a ti nga hur abot ma ndjufâ, ndjondjoîd’a ki subura a nga hur abot ma gulana mi. 17Lovot mata ni lovot ta djivid’a, lovot mat ta gureid’a pet ni halasa. 18Ndat nagu ma harina yam suma a vabozi atatna; suma a vatna a le furîd’a. 19Ni ki ned’a ba, Ma didina mi le kandagad’a; ni ki wad’ud’a ba, mi sira kakulod’a mi. 20Ni ki we mamba ba, mbiyo ma nglo ma d’id’ilima vunam mal leyo, d’ugula ti lau woi ti se alona mi.
Ma didina nga mi ngom sama ned’a
21Gorona, ar ang ngom zla d’a irata ki djib’era, ar a wal lei ki sed’eng ngi. 22A mba mbut ni ari manga, ni vama djif ma ang gum kelengâ mi. 23Hina wani, ang mba tit kur lovot manga bei mandarâ ba, aseng mba mi dap ata va d’uo mi. 24Ata yima ang bur kä na, mandarâ mba mi lang ngi; ata yima ang bur kä na, ang mba nde sena d’angzang. 25Ang le mandara ndak ka mba kang dumuzid’a d’oze nde d’a suma asa’atna a nde kanga d’i. 26Kayam ni Ma didina ba, mba mi hang hur ma ade’esâ, mba mi ngomong aseng ngala mi kal kur dauna d’uo d’a.
Ang le yam ndrangâ
27Ata yima ang ndak á le vama djivina mi suma a ndak á lazizina, ang ar bei lazizi d’i. 28Ar ang de mi ndrangâ ala: Ang iya! Ang hulongîya! Avin an mba ni hang va tua ata yima ang nga ki va abong á humzina d’i. 29Ar ang djib’er á le tchod’a mi ndrangâ ata yima mi nga kaka geveng ki halasina d’i. 30Ar ang yal ki sa bei zlad’a ba ata yima mi lang nga vama tcho d’uo na d’i. 31Ar ang le d’od’oka yam sama hurum akud’ina d’i, ar ang hlum zla mamba d’uo mi. 32Kayam Ma didina nga mi gol suma a nga le zla d’a ata yat tuo d’ina is, wani mi ni suma iratna banazina. 33Vun ma ged’a hi Ma didinina mi nga yam azina hi suma asa’atnina, wani nga mi b’e vunam yam yima kaka hi suma d’ingêrîna. 34Nga mi las suma a nga las sumina, wani nga mi ve suma halasa sumad’a. 35Suma ned’a a mba te subura djona, wani suma lilid’a a mba te zulo ma ngolâ djona mi.
Currently Selected:
Zla d’a d’ogolâ 3: BA
Highlight
Share
Copy
Want to have your highlights saved across all your devices? Sign up or sign in
Azumeina Bible © Alliance Biblique du Tchad, 1999.